यिर्मयाह 52

यरूशलेम शईरो रा नाश

1 जेबे यहूदा रा राजा सिदकिय्याह राज करने लगेया, तेबे से इक्की साला रा था ओर यरूशलेम शईरो दे ग्यारा साला तक राज करदा रया। तेसरी माया रा नाओं हमूतल था जो लिब्ना जगा दे रणे वाल़ी यिर्मयाह री बेटी थी। 2 राजा सिदकिय्याहे राजा यहोयाकीमो रे सारे कामो रे मुताबिक सेई कित्तेया जो यहोवे री नजरा दे बुरा ए। 3 जरूर यहोवे रे रोषो रिया बजा ते यरूशलेम ओर यहूदा री एड़ी दशा ऊई री कि अन्तो रे तिने से आपणे सामणे ते दूर करी ता ओर सिदकिय्याहे बाबेलो रे राजे साथे बगावत कित्ती। 4 सिदकिय्याह राजे रे राजो रे नऊए सालो रे दसुए मीन्ने रे दसुए दिनो दे बेबीलोनो रे राजा नबूकदनेस्सरे आपणी सारी सेना लई की यरूशलेम शईरो पाँदे अमला कित्तेया ओर तिने तेती डेरे लगाई की तेतेरे चऊँ कनारे कीला बणाया। 5 ईंयाँ यरूशलेम शईर केरी ता ओर सिदकिय्याह राजे रे राजो रे ग्यारुए सालो तक केरेया रा राखेया। 6 तेस ई सालो रे चौथे मीन्ने रे नऊए दिने शईरो दे अकाल़ एथो तक बढ़ी गा कि लोका खे कोई रोटी नि रयी। 7 तेबे बेबीलोनो री सेने यरूशलेम शईरो री दवाल तोड़ी ती ओर दुँईं कांदा बीचे जो बड़े द्वार राजे रे बगीचे रे नेड़े था, तेथा ते सारे योद्धा नठी की रातो-रात शईरो ते निकल़ी गे ओर अराबा खे गये। कऊँकि तेस बखते कसदी लोके शईर केरी राखेया था। 8 पर तिना री सेने सिदकिय्याह राजे रा पीछा कित्तेया ओर से यरीहो रे अराबा गे पकड़ी ता, तेबे तेसरी सारी सेना तेसगे ते नठी गी ओर से कल्ला रयी गा। 9 तेबे सेयो सिदकिय्याह राजे खे पकड़ी की हमात देशो रे रिबला शईरो दे बाबेलो रे राजे गे लईगे ओर तेती तिने तेसखे सजा री आज्ञा दित्ती। 10 बाबेलो रे राजे सिदकिय्याह रे पाऊ तेस सामणे काईते ओर यहूदा रे सारे परदान बी रिबला दे काईते। 11 तेबे बाबेलो रे राजे सिदकिय्याह रिया आखी फूटवाई तिया ओर से साँगल़ा दे बानी की बाबेलो तक लईगा ओर से जेला दे पाईता। से जदुओ तक मरेया नि, तदुओ तक तेथी रया।

12 तेबे तेस सालो रेई, मतलब बाबेलो रे राजा नबूकदनेस्सरो रे राज रे उन्निए सालो रे पाँजुए मीन्ने रे दसुए दिने अंगरक्षको रा परदान नबूजरदान जो बाबेलो रे राजे रा नौकर था, यरूशलेम शईरो रे आया। 13 नबूकदनेस्सरे यहोवे रा मन्दर, राजे रे मईल ओर यरूशलेम शईरो रे सारे बड़े-बड़े कअर आग लगाई की फूकवाई ते। 14 तेबे कसदिया री सारी सेना जो अंगरक्षको रे परदानो साथे थी, तिने यरूशलेम शईरो रे चऊँ कनारली दवाल टाल़ी ती। 15 तेबे नबूजरदान कंगाल़ लोका बीचा ते कईया खे, जो लोक शईरो रे रयी गे थे, जो लोक बाबेलो रे राजे गे नठीगे थे ओर जो कारीगर रयी गे थे, तिना सबी खे बन्दी बणाई की लईगा। 16 पर नबूजरदान कंगाल़ लोका बीचा ते कईया खे अंगूरा रे बगीचे रे काम ओर जिम्मीदारा करने खे छाडी गा। 17 यहोवे रे मन्दरो रे जो पीतल़ी रे खम्बे, कुर्सिया ओर पीतल़ी रे अऊद थे, तिना सबी खे कसदी लोक तोड़ी की तिना रा पीतल़ बाबेलो खे लईगे। 18 सेयो आँडिया, फरूए, कैंचिया, कटोरे, तूपदान ओर पीतल़ी रे ओर सबी पांडेया खे, जिना साथे लोक सेवा करो थे, सेयो लईगे। 19 तसले, कड़छे, कटोरिया, आँडिया, दीवट, तूपदान ओर कटोरेया बीचा ते जो कुछ सूईने रा था, तिना रे सूईने खे ओर जो कुछ चाँदिए रा था तिना रे चाँदिए खे बी अंगरक्षको रा परदान लईगा। 20 दोनों खम्बे, एक अऊद ओर पीतल़ी रे बारा बल़द जो पावेया निठे थे, यो सारे तो राजा सुलैमाने यहोवे रे मन्दरो खे बणाए थे ओर इना सबी रा पीतल़ तोलणे ते बारे था। 21 जो खम्बे थे तिना बीचा ते एक-एक सताई फूट ऊच्चा, केरा बारा फूट, मोटाई तीन ईंच थी ओर सेयो खोखले थे। 22 एकी-एकी री काँगणी पीतल़ी री थी ओर एक-एक काँगणी पाँज आथ ऊच्ची थी ओर तेते पाँदे चऊँ कनारे जो जाल़ी ओर अनार बणी रे थे, सेयो सारे पीतल़ी रे थे। 23 काँगणिया रे चऊँ कनारे छयानुए अनार बणी रे थे ओर जाल़िया पाँदे चऊँ कनारे सौ अनार थे। 24 जेबे नबूजरदान बाबेलो ते वापस आया, तेबे तिने सरायाह बड़ा पुरोईत ओर तेसते थालले सपन्याह पुरोईत ओर तीनो मन्दरो रे दरवाजे रे पईरेदार पकड़ी ते 25 ओर शईरो ते तिने एक खुसरा पकड़ी ता, जो सिपाईया पाँदे सरदार था ओर जो मर्द राजे री सेवा करेया करो थे, तिना बीचा ते सात जणे जो शईरो दे मिले ओर सेनापतिया रा मुन्शी जो आम लोका खे सेना रे परती करो था ओर आम लोका बीचा ते साठ ओर खास मर्द जो शईरो दे मिले, 26 इना सबी खे नबूजरदान रिबला दे बाबेलो रे राजे गे लईगा। 27 तेबे बाबेलो रे राजे सेयो हमात देशो रे रिबला रे एड़े काये कि सेयो मरी गे। ईंयाँ यहूदी आपणे देशो ते कैद ऊई की चलीगे।

गुलामा री गिणती

28 जिना लोका खे नबूकदनेस्सर बन्दुआ बणाई की लईगा था, सेयो यो ए, मतलब तेसरे राज रे सातुए सालो दे 3,023 यहूदी, 29 फेर आपणे राज रे ठारूए सालो रे नबूकदनेस्सर यरूशलेम शईरो ते 832 माणूंआ खे बन्दुआ बणाई की लईगा, 30 तेबे नबूकदनेस्सरो रे राज रे तेईए सालो रे नबूजरदान 745 यहूदिया खे बन्दुआ करी की लईगा, सारे माणूं मिलाई की 4,600 ऊए। 31 तेबे यहूदा रे राजा यहोयाकीनो री गुलामिया रे सैंथिये सालो रे, मतलब जेस सालो रे बाबेलो रा राजा एवील्मरोदक था, तेसरे ई बारूए मीन्ने रे पच्चिये दिने तिने यहूदा रा राजा यहोयाकीन जेला ते निकयाल़ी की तेसखे बड़ी पदवी दित्ती 32 ओर तेसखे मीठिया-मीठिया गल्ला बोली की, जो राजा तेस साथे बाबेलो दे गुलाम थे, तेसरा सिंहासन ओरी रे सिंहासनो ते ऊच्चा कित्तेया। 33 तेसरे जेला रे टाल्ले बदली ते ओर से पूरी जिन्दगी रोज राजे साथे रोटी खाओ था 34 ओर जदुए तक यहोयाकीम जिऊँदा रया, बाबेलो रा राजा तेसखे रोजके आपणे जरूरती रे समानो खे खरीदणे खे खर्चे रिया तँईं तेसखे कुछ पैसा देयो था। ये पैसा यहोयाकीमो खे तदुओ तक मिलदा रया जदुओ तक से मरेया नि।