1 एक बखत था जेबे यरूशलेम शईर लोका साथे परी रओ था,

से एबे कल्ली बैठी री बिदुआ जवाणसा जेड़ा कऊँ बणीगा?

एक बखत था जेबे से प्रदेशा री राणिया बीचे महान थी, एबे से गुलाम बणी की दूजेया राजेया खे कर देओई।

2 से सारिया राती फूटी-फूटी की रोंदा रओआ, तेसरे आसू खाखा पाँदे छूटोए;

तेसरे सबी दोस्ता बीचे एबे कोई तेसखे शान्ति देणे वाल़ा कोई नि बची रा;

तेसरे जो देश पईले दोस्त थे तिने तेस साथे विश्वासघात कित्तेया ओर एबे यरूशलेमो रे दुश्मण बणी गे रे।

3 यहूदा दु:ख ओर कठण गुलामिया ते बचणे खे परदेसो दे चली गी;

पर दूजी जातिया बीचे रंदे ऊए तेसा खे राम करने री जगा नि मिलदी;

तेसा खे सबी खदेड़नेवाल़ेया से तेसा री मुसीबता दे पकड़ी ती।

4 सिय्योन मन्दरो रे पाह्ड़ो रिया बाटा शोग करोईया,

कऊँकि तेती ठराए रे त्योआरो पाँदे कोई नि आऊँदा,

तेसरे सारे बड़े द्वार सुनसाण पड़ी रे, तेथो रे पुरोईत कणोए;

तेथो रिया कुआँरिया दु:खी ए ओर सेयो सब कठण दु:ख सयीन करने लगी रिया।

5 यरूशलेमो रे दुश्मण जीती गे रे, तेसरे दुश्मण तरक्की करने लगी रे,

कऊँकि यहोवे आपू तेसखे तेसरे बऊत पापो रिया बजा ते दु:ख देई राखेया;

तेसरे बाल-बच्चेया खे दुश्मण दूजे देशो दे गुलाम बणाई की लईगे।

6 सिय्योनो रिया बेटिया रा सारा प्रताप छुड़ाई ला दा ए।

तेथो रे परदान एड़े ईरणो जेड़े ऊईगे रे जिना खे चरने खे कुछ नि मिलदा;

सेयो खदेड़नेवाल़ेया रे सामणे ते कमजोर ऊई की नठी जाओए।

7 यरूशलेमो रे लोके इना दु:खी ओर संकटो रे दिना दे, जेबे तेथो रे लोक दुश्मणा रे आथो दे पड़े

ओर तिना रा कोई मतदगार नि रया, तेबे आपणी सब अच्छी चीजा जो पुराणे बखतो ते तिना रिया थिया, याद कित्तिया।

तेसा रे जीतणे वाल़ेया से ऊजड़ देखी की आसिया लगाईया।

8 यरूशलेमो रे लोके बड़ा पाप कित्तेया, इजी री बजा ते से अशुद्ध जवाणस जी ऊई गी री,

जितणे तेसा रा आदर करो थे, सेयो सब तेसा री बेज्जती करोए,

कऊँकि तिने से नांगी देखी राखी, आ, एबे से शईर आपू कणने लगी रा, ओर शर्मा रे मारे मूँ लकोणे लगी रा।

9 तेसरी अशुद्धता तेसरे टाल्लेया पाँदे ई; तिने आपणा अन्त याद नि राखेया;

इजी री खातर से खतरनाक तरीके ते रूड़ाया ओर तेसखे कोई शान्ति नि देयो था।

से यहोवे ते दया खे बिनती करोई। ओ यहोवा, मेरे दु:खो खे देख, कऊँकि दुश्मण मेरे खलाफ सफल ऊई रा!

10 दुश्मणे तेथो रिया सब खरिया चीजा पाँदे आथ बढ़ाई राखेया; आ,

दूजी जातिया खे, जिना रे बारे दे तैं आज्ञा दित्ती थी कि सेयो तेरी पवित्र सभा दे नि आई सकदे,

सेयो तिने तेरी पवित्र जगा दे कूसदे ऊए देखी राखे।

11 यरूशलेमो रे सारे रणे वाल़े पीड़ा साथे कणदे ऊए खाणे रिया चीजा टोल़ोए;

तिने आपणे प्राण बचाणे खे आपणी खरिया चीजा बेची की खाणे रिया चीजा खरीदी राखिया।

सेयो मतादा रिया तँईं रोओ ए। सेयो बोलोए ओ यहोवा, देख, त्यानो साथे देख, कऊँकि आऊँ तुच्छ ऊई गी री।

12 ओ सब यात्रियो, क्या तुसा खे एते गल्ला री कोई बी फिकर नि ए?

आपणियां आखी खोली की देखो, क्या मेरे दु:खो ते बढ़ी की

ओर कोई पीड़ा ए जो यहोवे आपणे रोषो रे दिने मां पाँदे पाईती री?

13 तिने पाँदा ते मेरी आड्डिया पाँदे आग लगाई ओर सेयो तिदे स्वा ऊईगिया,

तिने मेरे पैरा खे जाल़ लगाया ओर आऊँ उल्टी फेरी ती,

तिने आऊँ एड़ी करी ती की आऊँ त्यागी री जी ओर बमारिया रिया बजा ते कमजोर रऊँई।

14 परमेशरे जूँगड़े री रस्सिया जेड़े मेरे पाप आपणे आथो साथे गूड़ी राखे;

परमेशरो रा जूँगड़ा मेरिया कांदा पाँदे आ ओर तिने मेरी तागत कटाई ती री;

जिना रा आऊँ सामणा पनि करी सकदी, आऊँ यहोवे तिना रेई वशो दे करी ती री।

15 परमेशरे मेरे सारे पराक्रमी योद्धा तुच्छ जाणे, तिने ठराए रे त्योआरो रा प्रचार करी की लोक मेरे खलाफ बुलाए,

ताकि मेरे जवाना खे पीसो; यहूदा रे लोक यहोवे मानो कोल्हूए दे अंगूरा रा रस काडणे खे जोड़ी राखे।*

16 इना सबी गल्ला रिया बजा ते आऊँ रोऊँई, मेरिया आखी ते आसू निकल़दे रओए,

कऊँकि जेस शान्ति देणे वाल़े रिया बजा ते मेरा जियू अरा फरा ऊई जाओ था, से मांते दूर ऊईगा;

मेरे लोक कल्ले ऊईगे, कऊँकि दुश्मण प्रबल ऊई रा।

17 सिय्योनो रे लोके मतादा रिया तँईं आथ फैलाई राखे, तेसखे कोई शान्ति नि देंदा।

यहोवे याकूबो रे वंशो रे बारे दे ये आज्ञा देई राखी कि तेथो रे चऊँ कनारले रणे वाल़े तेसरे दुश्मण ऊई जाओ;

यरूशलेम तिना बीचे अशुद्ध जवाणसा जेड़ी ऊई गी री।

18 यहोवा सच्चाईया पाँदे ए, कऊँकि मैं तेसरी आज्ञा नि मानी।

ओ सारे लोको, सुणो, ओर मेरी पीड़ देखो! मेरे जवान माठे ओर बेटिया गुलामिया दे चली गे रे।

19 मैं आपणे दोस्ता खे आका पाईया, पर तिने बी माखे तोखा दित्तेया,

जेबे मेरे पुरोईत ओर परदान इजी री खातर खाणे रिया चीजा टोल़ने लगी रे थे कि खाणे ते तिना दे जान आई जाओ,

तेबे तिना रे प्राण शईरो देई निकल़ी गे।

20 ओ यहोवा, माखे देख, कऊँकि आऊँ मुसीबता दे ए,

मेरी आंतड़िया कमजोर ऊणे लगी रिया, मेरा दिल उल्टा ऊईगा रा, कऊँकि आसे तेरे खलाफ बऊत बगावत करी राखी।

बारे तो आऊँ तलवारी साथे बेऔलाद ऊँई ओर कअरे मौत बैठी री।

21 लोके सुणेया कि आऊँ पीड़ा साथे कणदी रऊँई, पर माखे कोई शान्ति नि देंदा।

ओ यहोवा, मेरे सबी दुश्मणे मेरी मुसीबता रे बारे दे सुणेया, सेयो ये सुणी की खुश ऊईगे कि तैं ई ये करी राखेया।

पर जेस दिने न्याय रे दिनो री चर्चा तैं प्रचार करी की सुणाई राखी, तिजी खे तूँ दखा, तेबे सेयो बी मां जेड़े ऊई जाणे।

22 ओ यहोवा, मेरे दुश्मणा री सारी दुष्टता खे देख

ओर जेड़ी तैं माखे मेरे सारे पापो रिया बजा ते सजा देई राखी, तेड़ी ई तिना खे बी सजा दे;

कऊँकि आऊँ पीड़ा रिया बजा ते बऊत कणदी रऊँई

ओर मेरा दिल बमारिया रिया बजा ते कमजोर ऊईगा रा।