1 पईले म्हारे लोक शुद्ध सूईने जेड़े थे, पर एबे सेयो बेकार ऊईगे दे ए।* जेड़े मन्दरो रे रत्न बिखरी रे, तेड़े ई म्हारे जवान बी बिखरी रे। 2 सिय्योनो रे किमती जवान माणूं जो कुन्दनो जेड़े थे, पर एबे सेओ कुम्हारो रे बणाए दे माट्टिया रे कड़े जेड़े केड़े बेकार गिणी राखे! 3 माये गीदड़िया बी आपणे बच्चेया खे खाणा खल़ाओईया, पर मेरे लोक आपणे बच्चेया ते बुरा बर्ताओ करोए; सेयो बणो दे रणे वाल़ेया शुतुरमुर्गेया जेड़िया ए जो आपणे अण्डे छाडी देओए। 4 मेरे लोका रे दूद पींदे बच्चेया री जीब त्याय लगणे रिया बजा ते ताल़ूए साथे चिपकी गी री; बाल-बच्चे रोटी माँगोए, पर तिना खे कोई नि देंदा। 5 एड़े लोक जो स्वाद खाणा खाओ थे, सेयो एबे थोड़ी जी रोटिया रिया तँईं पटकदे फिरोए। जो मखमलो रे टाल्लेया दे पल़े थे। सेओ कूड़ेया रे टेरो पाँदे लेटोए। 6 सदोमो रे लोका पाँदे अचाणक विपत्ति आई, ओर तिना खे बचाणे वाल़ा कोई नि था; पर मेरे लोका खे सदोमो रे लोका ते बी कठोर दण्ड देई राखेया ए।* 7 सिय्योनो रे परदाना रा बर्ताओ पईले बऊत शुद्ध, बर्फ ओर दूदो ते बी जादा सफेद ओर चमकदार था; तिना रा शरीर मूँगेया ते जादा लाल ओर तिना री सुन्दरता नीलमणिया जेड़ी थी। 8 पर एबे तिना री शक्ल न्हेरे ते बी काल़ी ए, सेयो सड़का रे पछयाणदे पनि; तिना री चामड़ी आड्डिया साथे सटी गी री ओर लकड़िया जेड़ी सूकी गी री। 9 एड़े लोक जो लड़ाईया दे तलवारी साथे मारे दे पूखा री मारा ते ज्यादा ठीक थे जिना रे प्राण डोरूआ री उपजा ते बिना पूखा रे मारे आऊल़े-आऊल़े मरदे जाओए। 10 जो जवाणसा पईले दया करने वाल़िया थिया तिने आपणे ई बच्चे काई की खाणे खे पकाये; कऊँकि जेबे यरूशलेम शईर दुश्मणा रे सिपाईए केरेया था तेबे तिने आपणे बच्चे काई की खाई ले। 11 यहोवे आपणी पूरी जल़न बरसायी, तिने आपणा कोप बऊत ई पड़काया; ओर सिय्योनो रे एड़ी आग लगाई जेते कि तेतेरी निऊँ तक फूकी गी। 12 तरतिया रा कोई राजा या दुनिया रे कोई रणे वाल़ा इजी रा कदी परोसा नि करी सको था, कि बिरोदी ओर दुश्मण यरूशलेमो रे बड़े द्वारो दे कूसी सकणे। 13 ये तेथो रे भविष्यबक्ता रे पाप ओर तेथो रे पुरोईता रे पापो रे कामो रिया बजा ते ऊआ; कऊँकि सेयो तेती तर्मिया री अत्या करदे आई रे। 14 नबी ओर पुरोईत सड़का रे एड़े फिरोए मानो सेयो अन्दे ओ। कोई बी तिना खे छूओं नि था कऊँकि तिना रे टाल्लेया पाँदे काये दे लोका रे खूनो रे तब्बे लगी रे थे। 15 जो लोक जिऊँदे थे सेयो जोरे की बोलोए, "आसा ते दूर रओ! तुसे अशुद्ध ए।" जेबे सेयो नठी की मारे-मारे फिरने लगे, तेबे दूजी जातिया रे लोके बोलेया, "तुसे एती नि रूकी सकदे।" 16 सेओ लोक यहोवे आपणे रोषो रिया बजा ते तित्तर-बित्तर करीते, तेस तिना पाँदे फेर दया नि करनी; ना तो पुरोईता रा आदर ऊआ ओर ना बुजुर्गा पाँदे कोई दया कित्ती। 17 म्हारी आखी बेकार ई मताद न्याल़दे-न्याल़दे थकी गिया, आसे लगातार एक एड़ी जातिया रिया तरफा खे ताकदे रये जो बचाई नि सकदी। 18 लोक आसा पीछे एड़े पड़े कि आसे आपणे शईरो रे चौको दे पनि चली सके; म्हारा अन्त नेड़े आया; म्हारी उम्र पूरी ऊई; कऊँकि म्हारा अन्त आई गा था। 19 सेयो लोक जो आसा पीछे पड़ी रे थे सेयो सर्गो रे उकाबा ते बी जादा तेज चलो थे; सेओ लोक पाह्ड़ा पाँदे आसा पीछे पड़ी गे ओर उजाड़ जगा दे आसा खे पकड़ने खे म्हारी ताका दे बैठीगे। 20 म्हारा राजा, जो यहोवे चूणी ला था, सेई था जिने आसे जिऊँदे रणे जोगे बणाए से सेई था जेस पाँदे आसे परोसा कित्तेया था कि तेस आसे दूजे देशो री सेना ते बचाणे। पर से एड़ा पकड़ी ला जेड़े जानवरा खे खड्डे दे फसाओए। 21 ओ एदोम देशो रे लोको जो ऊज देशो दे रओए तुसे एते गल्ला ते खुश ऊई सकोए कि आसा साथे क्या ऊणे लगी रा, पर यहोवे तुसा खे सजा देणी। तुसे नशे दे ऊई जाणे ओर बेज्जत ऊई जाणे कऊँकि तुसा रे दुश्मणे तुसा रे टाल्ले खोली ते दे। 22 ओ सिय्योनो रे लोको, तुसा रे पापो री सजा खत्म ऊई, यहोवे तुसे फेर गुलामिया दे नि राखणे; पर ओ एदोमो रे लोको, तुसा रे पापो री सजा तेस तुसा खे देणी, तेस तुसारे पाप बताणे।