1 ओ यहोवा, याद कर कि आसे कितणा दु:ख सईन करी राखेया ओर म्हारी मताद कर; ओ यहोवा म्हारी तरफा खे नजर करी की म्हारी बेज्जती देख! 2 जमीना रा म्हारा इस्सा परदेशिया रा ऊईगा ओर म्हारे कअर परदेशिया रे ऊईगे रे। 3 आसा रे दुश्मणे म्हारे बाओ काईते ओर आसे अनाथ ऊईगे; तिने म्हारी माया बिदुआ बणाई तिया दिया ए। 4 आसे पाणी मोले लई की पिऊँए, आसा खे लकड़ू बी मोले मिलोए। 5 दौड़ाणे वाल़े म्हारी क्याड़िया पाँदे टूटी की पड़ी रे; आसे थकी गे रे, आसा खे राम नि मिलदा। 6 आसे जिऊँदे रणे खे खाणा लणे रिया तँईं आपू ई मिस्र ओर अश्शूरो रे वशो दे ऊईगे, ओर तेथो रे लोका रिया तँईं काम करने खे त्यार ऊईगे। 7 म्हारे बुजुर्गे तेरे खलाफ पाप कित्तेया ओर सेओ मरी की राची गे; पर आसे से सजा पुगतणे लगी रे जो तिना री थी। 8 बाबुलो रे अधिकारी जो पईले गुलाम थे, एबे आसा पाँदे राज करोए, ओर एड़ा कोई नि आ जो आसा खे तिना ते बचाई सको। 9 कऊँकि उजाड़ जगा दे लोक तलवारा लई की कूमेया करोए, इजी री खातर जेबे आसे खाणे पीणे रिया चीजा लणे खे तेती जाऊँए, तो आसे आपणे प्राण खतरे दे पाऊँए। 10 अकाल़ो रिया गर्मिया ते आसा रे शरीरो री चामड़ी बी चूल्ली जेड़ी गर्म ऊईगी री।

11 आसा रे दुश्मणे सिय्योनो रे पाह्ड़ो पाँदे म्हारिया जवाणसा साथे गल़त काम कित्तेया, ओर तिने यहूदा रे शईरा रिया कुआँरिया बेटिया बी आपणे कब्जे दे करने खे मजबूर करी राखिया ए। 12 परदान आथो रे पारे टाँगी ते रे ओर बुजुर्गा रा कोई आदर नि कित्तेया। 13 तिने म्हारे जवान मर्द चाक्किया दे आटा पीसणे खे मजबूर करी राखे, ओर जेबे तिना ते पारी लकड़िया रा बोजा चकणे खे बोलेया जाओआ तेबे सेयो लड़खड़ाओए। 14 आसा रे परदाना खे शईरो रे बड़े द्वारो पाँदे न्याय रिया तँईं मिली की बैठणे री अनुमति नि ए। ओर ना ई जवाना रे गीत सुणदे। 15 आसे एबे खुश नि ए। पर आसे बऊत दु:खी ए, इजी री खातर एबे आसे ओर नि नाचदे। 16 म्हारे सिरो पाँदला मुकुट छूटीगा रा;* आसा पाँदे हाय, कऊँकि आसे पाप कित्तेया! 17 इजी बजा ते म्हारा मन कमजोर ऊईगा, इना गल्ला रिया बजा तेई म्हारिया आखी तुँदल़िया पड़ी गिया, 18 आसे बऊत दु:खी ए कऊँकि तिने सिय्योनो रिया दवाला ओर कअर नाश करीते दे। एबे तिना पाँदे बणो रे जानवर गीदड़ चलोए। 19 पर ओ यहोवा, तूँ तो सदा तक रणा; तेरा राज पीढ़ी-पीढ़ी तक बणेया दा रणा। 20 ओ परमेशर, तैं आसे सदा खे कऊँ पुलाई ते ओर आसे बऊत बखतो तक कऊँ छाडी ते? 21 ओ यहोवा, आसा खे आपणी तरफा खे आऊणे दे म्हारी मताद कर, तेबे आसे फेर सुदरी जाणे। आसा खे फेर तेड़ा ई जीवन जिऊँणे रा मौका दे जेड़ा आसे पईले जिऊँणे लगी रे थे। 22 ओ यहोवा, आसे ये परोसा करूँए कि तैं आसे बिल्कुल त्यागी नि राखे ओर तूँ आसा ते बऊत जादा नराज नि आ।