यिर्मयाह 21

सिदकिय्याह रा अनुरोध अस्वीकार

1 ये वचन यहोवे री तरफा ते यिर्मयाह गे तेस बखते पऊँचेया जेबे यहूदा रे सिदकिय्याह राजे तेसगे मल्किय्याह रा पाऊ पशहूर ओर मासेयाह पुरोईतो रा पाऊ सपन्याह रे आथो दे एते बिनतिया साथे ये सन्देसा पेजेया, 2 पशहूर ओर सपन्याहे यिर्मयाहो खे बोलेया, "यहोवे ते आसा लोका रिया तँईं पूछ ओर तेसते प्रार्थना कर कि से आसा री मताद करो। यहोवे ते पूछो कि क्या ऊणा आसे जाणना चाऊँए, कऊँकि बाबेलो रा राजा नबूकदनेस्सर आसा लोका रे खलाफ युद्ध करने लगी रा, क्या पता यहोवा आसा साथे आपणे सारे अचम्बे रे कामो रे मुताबिक एड़ा बर्ताओ करो कि से आपणी सेना लई की आसा गे ते चली जाओ।"

3 तेबे यिर्मयाहे पशहूर ओर सपन्याह खे जबाब दित्तेया। तिने बोलेया, "राजा सिदकिय्याह खे बोलो, 4 इस्राएलो रा परमेशर यहोवा ईंयाँ बोलोआ कि देखो, जो युद्ध करने रे अथियार तुसा रे आथो दे ए, जिना साथे तुसे बाबेलो रे राजा ओर दवाला ते बारे केरने वाल़े कसदिया साथे लड़ने लगी रे, सेयो मां वापस करी की एस शईरो दे कट्ठे करने; 5 ओर मां आपू तुसा री सेना साथे बऊत सामर्थी ऊई की लड़ना, कऊँकि आऊँ तुसा पाँदे बऊत गुस्से आ, मां आपणी बाँई री तागती साथे तुसा रे खलाफ लड़ना। मां तुसा रे खलाफ बऊत बड़ा युद्ध करना ओर दखाणा की आऊँ कितणा गुस्से आ।" 6 मां एस यरूशलेम शईरो दे रणे वाल़े क्या माणूं, क्या जानवर, सारे काई देणे, सेयो बड़ी बमारिया साथे मरने। 7 तिजी ते बाद यहोवे री ये बाणी ए कि ओ यहूदा रे राजा सिदकिय्याह, मां तूँ, तेरे अधिकारी ओर लोक, बल्कि जो लोक एस शईरो दे मरी, तलवार ओर अकाल़ो ते बची जाओगे, सेयो मां बाबेलो रे राजा नबूकदनेस्सर ओर तिना रे दुश्मणा रे आथो दे करी देणे। तेस सेयो तलवारी की काई देणे, तेस तिना पाँदे ना तो तरस खाणा, ना नरमाई ओर ना ई कोई दया करनी।*21:7 लूक. 21:24 8 यरूशलेम शईरो रे लोका खे आगे बोल कि यहोवा ईंयाँ बोलोआ कि देखो आऊँ तुसा जीवन देणे वाल़िया बाटा दे ओर मौता रिया तरफा खे लई जाणे वाल़िया बाटा बीचे चुणने रा मौका देणे लगी रा। 9 जो कोई एस यरूशलेम शईरो दे रओगा, से तलवार अकाल़ ओर मरिया साथे मरना, पर जो कोई निकल़ी की तिना कसदिया गे जो तुसा खे केरोए नठी जाओगा, से जिऊँदा रणा ओर तेसरे प्राण बची जाणे। 10 कऊँकि यहोवा आगे बोलोआ, "कि मैं आपणा मूँ एस शईरो रिया तरफा खे पलाईया रिया तँईं नि, बल्कि बुराईया रिया तँईं ई करी राखेया, ये बाबेलो रे राजे रे वशो दे पड़ी जाणा ओर तेस ये फूकवाई देणा।"

दाऊदो रे कराने रिया तँईं सन्देश

11 यहोवे माखे ईंयाँ बी बोलेया, "यहूदा रे राजकुलो रे लोका खे बोल कि यहोवे रा वचन सुणो। 12 ओ दाऊदो रे कराने, यहोवा एड़ा बोलोआ कि प्यागा खे न्याय चुकाओ ओर लूटे रे खे अन्देर करने वाल़े रे आथो ते छुड़ाओ, नई तो तुसा रे बुरे कामो रिया बजा ते मेरे रोषो री आग पड़कणी ओर एड़ी बल़दी रणी कि कोई तिजी खे बजयाई नि सकणा।" 13 ओ यरूशलेम, तूँ काअटिया पाँदे बैठी रा ओर मैदानी देशो री चट्टान, तुसे जो बोलोए कि आसा पाँदे चढ़ाई कुण करी सकोआ ओर म्हारे रणे री जगा दे कुण आई सकोआ? यहोवा बोलोआ कि आऊँ तुसा रे खलाफ ए। 14 ओर यहोवे री वाणी ए, "मां तुसा खे सजा देई की तुसा रे कामो रा फल तुसा ते पुगताणा। मां तुसा रे मईलो दे आग लगाणी ओर तिजी रे चऊँ कनारे सब कुछ फूखी जाऊणा।"