यिर्मयाह 27

यिर्मयाह री क्याड़िया पाँदे जूँगड़ा

1 योशिय्याह रे पाऊ, यहूदा प्रदेशो रे राजा सिदकिय्याह रे राजो रे शुरूओ दे यहोवे री तरफा ते ये वचन यिर्मयाह गे पऊँचेया। 2 यहोवे माखे ये बोलेया, "बान ओर जूँगड़े बणवाई की आपणी क्याड़िया पाँदे राख। 3 तेबे तिना खे एदोम, मोआब, अम्मोन, सोर ओर सिदोनो रे राजेया खे सन्देश तिना दूता रे आथो दे पेजणा, जो यहूदा रे राजा सिदकिय्याह ते मिलणे यरूशलेम शईरो दे आई रे।" 4 तिना देशा रे राजेया खे ये आज्ञा दे, "इस्राएलो रा परमेशर, सेना रा यहोवा ईंयाँ बोलोआ कि आपणे-आपणे मालको खे ईंयाँ बोलो कि 5 मैं तरती ओर तरतिया पाँदे सारे रणे वाल़े माणूं ओर डांगर मैं आपणी सामर्थ ओर शक्तिया साथे बणाई राखे ओर आऊँ ये तरती जेस केसी खे चाऊँआ तिना खे देई देऊँआ। 6 एबे मैं यो सारे देश, आपणे दास बाबेलो रे राजा नबूकदनेस्सरो खे आपू ई देई ते रे ओर मैदानो रे जीव-जन्तु बी मैं तेसखे देई ते रे ताकि सेयो तेसरे वशो दे रओ। 7 यो सब जातिया तेसरे ओर तेसते बाद तेसरे माठे ओर तेसरे पोते रे वशो दे तेस बखतो तक रणियां जदुओ तक तेसरे आपणे देशो रे नाशो रा बखत नि आई जाओगा, तेबे बऊत सारिया जातिया ओर बड़े-बड़े राजेया बी तेसते आपणी सेवा करवाणी। 8 पर जो जाति या राज्य बाबेलो रे राजा नबूकदनेस्सरो रे वशो दे नि ओ ओर तेसरा जूँगड़ा आपणी कांदा पाँदे नि लई लओगा, तेसा जातिया खे मां तलवार अकाल़ ओर बमारिया री सजा तदुओ तक देंदे रणा जदुओ तक तेसखे तेसरे आथो साथे नि खत्म करी देऊँ, यहोवे री येई बाणी ए।"

9 इजी री खातर तुसे आपणे भविष्यबक्ता, मरे रे माणूंआ री आत्मा साथे गल्ल करने वाल़े, जादू ओर तांत्रिको रिया तरफा खे आपणा मन नि लगाओ जो तुसा खे बोलोए कि तुसा खे बाबेलो रे राजे रे वशो दे नि ऊणा पड़ना। 10 कऊँकि सेयो तुसा गे चूठी भविष्यबाणी करोए, जेते कि तुसे आपणे-आपणे देशो ते दूर ऊई जाओ ओर आऊँ आपू तुसा खे दूर करी की नाश करी देऊँ। 11 पर जो जाति बाबेलो रे राजे रा जूँगड़ा आपणी कांदा पाँदे लई की तेसरे वशो दे रओगी से मां तेस ई देशो दे रणे देणी ओर से जाति तिदे खेतीबाड़ी करी की बसी दी रणी, यहोवे री येई बाणी ए।

सिदकिय्याह रिया तँईं चतौणी

12 जेबे मैं नेड़ो-तेड़ो रे राज्या रे अधिकारिया ते गल्ला कित्तिया तेबे मैं यहूदा रे राजा सिदकिय्याह खे बी यो गल्ला बोलिया, "आपणी प्रजा समेत तूँ बाबेलो रे राजे रा जूँगड़ा आपणी कांदा पाँदे लओ ओर तेसरे ओर तेसरी प्रजा रे वशो दे रयी की जिऊँदा रओ। 13 जेबे यहोवे तेसा जातिया रे बारे दे जो बाबेलो रे राजे रे वशो दे नि ओ, ये बोलेया कि से तलवार, अकाल़ ओर बमारिया साथे नाश ऊणी, तेबे तूँ आपणी प्रजा समेत कऊँ मरना चाएया? 14 जो भविष्यबक्ता ताखे बोलोए कि ताखे बाबेलो रे राजे रे वशो दे नि ऊणा पड़ना, तिना री नि सुण, कऊँकि सेयो तांगे चूठी भविष्यबाणी करोए। 15 यहोवे री ये बाणी ए कि मैं सेयो चूठे नबी नि पेजे, सेयो मेरे नाओं ते चूठी भविष्यबाणी करोए ओर तेतेरा फल येई ऊणा कि मां तूँ देशो ते निकयाल़ी देणा ओर तूँ तिना नबिया समेत जो तांगे भविष्यबाणी करोए, नाश ऊई जाणा।"

16 तेबे मैं पुरोईत ओर तिना सबी लोका खे बोलेया, "यहोवा ईंयाँ बोलोआ कि तुसा रे जो भविष्यबक्ता तुसा गे ये भविष्यबाणी करोए कि यहोवे रे मन्दरो रे पांडे एबे चट ई बाबेलो ते वापस आई जाणे, तिना री नि सुणो, कऊँकि सेयो तुसा गे चूठी भविष्यबाणी करोए। 17 तिना चूठे नबीया री नि सुणो, बाबेलो रे राजे रे वशो दे ऊई की ओर तेसरी सेवा करी की जिऊँदे रओ। यरूशलेम शईर खण्डहर कऊँ बणीगा? 18 ये शईर उजाड़ नि ऊणा चाईयो। जे सेयो भविष्यबक्ता बी ओ ओर जे यहोवे रा वचन तिना गे ओ, तो सेयो सेना रे यहोवे ते प्रार्थना करो कि जो पांडे यहोवे रे मन्दरो दे ओर यहूदा रे राजे रे मईलो दे ओर यरूशलेम शईरो दे रयी गे रे, सेयो बाबेलो दे नि जाई सको। 19 कऊँकि सेना रा यहोवा ईंयाँ बोलोआ कि जो खंबे ओर पीतल़ी री नांद, गंगाल, कुर्सिया ओर बाकी पांडे एस शईरो दे रयी गे रे, 20 जिना खे बाबेलो रा राजा नबूकदनेस्सर तेस बखते नि लईगा, जेबे से यहोयाकीमो रे पाऊ यहूदा रे राजा यकोन्याह खे ओर यहूदा ओर यरूशलेम शईरो रे सबी बड़े लोका खे बन्दी बणाई की यरूशलेम शईरो ते बाबेलो खे लईगा था। 21 जो पांडे यहोवे रे मन्दरो दे, यहूदा रे राजे रे मईलो दे ओर यरूशलेम शईरो रे रयी गे दे, तिना रे बारे दे इस्राएलो रा परमेशर, सेना रा यहोवा ईंयाँ बोलोआ कि सेयो बी बाबेलो दे पऊँचणे 22 ओर जदुओ तक आऊँ मन्दरो रे खजाने री सम्बाल़ नि लऊँ सेयो तदुओ तक बेबीलोनो दे रणे जदुए तक आऊँ तिना खे यरूशलेम शईरो दे ल्याऊणे रा फैंसला नि करी लऊँ, यहोवे री येई बाणी ए।"