यिर्मयाह 38

यिर्मयाह खे जेला दे पाणा

1 एकी दिने जो वचन यिर्मयाह नबी सबी लोका खे बोलो था, सेयो वचन मत्तानो रे पाऊ शपत्याह, पशहूरो रे पाऊ गदल्याह, शेलेम्याह रे पाऊ यूकल ओर मल्किय्याह रे पाऊ पशहूरे सुणे। 2 यहोवा ईंयाँ बोलोआ, "जो कोई एस यरूशलेम शईरो दे रणा से तलवार, अकाल़ ओर बमारिया साथे मरना, पर जो कोई बेबीलोनिया गे नठी की निकल़ोगा से आपणे प्राण बचायी की जिऊँदा रणा। 3 यहोवा ईंयाँ बी बोलोआ कि ये यरूशलेम शईर बाबेलो रे राजे री सेना गे पूरी तरआ ते देई देणा ओर तेस ये लई लणा।" 4 इजी री खातर तिने चऊँ परदाने राजे खे बोलेया, "तेस मर्दो खे कुल़वाई दे, कऊँकि से जो एस शईरो रे बचे रे सिपाई ओर बाकी सबी लोका खे एड़े-एड़े वचन बोलोआ जेते कि तिना रे आथ-पैर टीले ऊई जाओए, कऊँकि से मर्द एसा प्रजा रे लोका री पलाई नि बुराई चाओआ।" 5 सिदकिय्याह राजे बोलेया, "सुणो, से तो तुसा रे वशो दे ए, कऊँकि एड़ा नि ऊई सकदा कि राजा तुसा रे बिरोदो दे कुछ करो" 6 तेबे तिने यिर्मयाह खे ल्याई की राजे रे पाऊ मल्किय्याह रे तेस गड्डे दे जो मईलो रे पईरा देणे वाल़े आँगणो दे था, रस्सिया साथे उतारी की पायी ता ओर तेते गड्डे दे पाणी नि, बल्कि दल-दल था ओर यिर्मयाह चीकड़ो दे तसी गा। 7 तेस बखते राजा बिन्यामीनो रे बड़े द्वारो गे न्याय करने खे बैठी रा था, इजी खे जेबे एबेदमेलेक कूशिये, जो मईलो दे एक खुसरा था, सुणेया कि तिने यिर्मयाह गड्डे दे पायी ता रा। 8 तेबे एबेदमेलेक मईलो ते निकल़ी की राजे खे बोलणे लगेया, 9 "ओ मेरे मालक, ओ राजा, तिने लोके यिर्मयाह भविष्यबक्ते साथे बऊत बुरा करी राखेया, कऊँकि तिने से गड्डे दे पायी ता रा, तेती से पूखे की मरी जाणा, कऊँकि शईरो दे कोई रोटी नि रयी गी दी ए।" 10 तेबे राजे एबेदमेलेक कूशिये खे ये आज्ञा दित्ती, "एथा ते मेरे तीई सिपाईया खे साथे लई की यिर्मयाह नबीए खे मरने ते पईले गड्डे ते निकयाल़।" 11 तेबे एबेदमेलेक तिना तीई सिपाईया खे साथे लई की राजे रे मईलो रे पण्डारो दे तलि़या रे कअरे गया ओर तेथा ते फटे-पुराणे टाल्ले ओर चिथड़े लई की यिर्मयाह गे तेती गड्डे दे रस्सिया साथे उतारी ते। 12 तेबे एबेदमेलेक कूशिये यिर्मयाह खे बोलेया, "इना पुराणे टाल्लेया खे आपणी काछा दे रस्सिया ते थाले राखी दे।" यिर्मयाहे तेड़ा ई कित्तेया। 13 तेबे तिने लोके यिर्मयाह रस्सिया साथे खींजी की गड्डे ते बारे काडेया ओर यिर्मयाह मईलो दे पईरा देणे रे आँगणो दे रणे लगेया।

सिदकिय्याह रा डर ओर यिर्मयाह री सलाह

14 एकी दिने सिदकिय्याह राजे यिर्मयाह भविष्यबक्ता यहोवे रे मन्दरो रे तीजे द्वारो गे आपू गे बुलाया ओर राजे यिर्मयाह ते बोलेया, "आऊँ तांते एक गल्ल पूछूँआ, मांते कुछ नि लकोणा।" 15 यिर्मयाहे सिदकिय्याह खे बोलेया, "जे आऊँ तांगे बताऊँगा, तो तां आऊँ मरवाई देणा ओर चाए आऊँ ताखे सलाह् बी देऊँ, तेबे बी तां मेरी नि मानणी।" 16 तेबे सिदकिय्याह राजे कल्ले जे यिर्मयाह ते कसम खाई, "यहोवा जो आसा खे बनाणे वाल़ा ए, तेसरी जिन्दगिया री कसम, ना तो मां तूँ मरवाणा ओर ना तिना माणूंआ रे वशो दे करना, जो ताखे काणा चाओए" 17 तेबे यिर्मयाहे राजा सिदकिय्याह खे बोलेया, "सेना रा परमेशर यहोवा, जो इस्राएलो रा परमेशर ए, से ईंयाँ बोलोआ कि जे तूँ बाबेलो रे राजे रे परदाना गे सच्ची खेई निकल़ी जाएगा, तेबे तो तूँ जिऊँदा रणा ओर ये शईर फूकणा नि ओर तूँ आपणे कराने समेत जिऊँदा रणा। 18 पर जे तूँ बाबेलो रे राजे रे हाकिमा गे नि जाएगा, तो ये यरूशलेम शईर बेबीलोनिया रे वशो दे करी देणा ओर तिना ये फूखी देणा ओर तूँ तिना रे आथो ते बची नि सकणा।" 19 तेबे सिदकिय्याह राजे यिर्मयाह खे बोलेया, "जो यहूदी लोक कसदिया गे नठीगे रे, आऊँ तिना ते डरूँआ, एड़ा नि ओ कि माखे तिना रे वशो दे करी देयो ओर सेयो मेरा मजाक उडाओ।" 20 यिर्मयाहे बोलेया, "तूँ तिना रे वशो दे नि करना, जो कुछ आऊँ तुसा खे बोलूँआ, तेतेखे परमेशरो री गल्ल समजी की मानी लो तेबे तेरा पला ऊणा ओर तेरे प्राण बचणे। 21 पर जे तूँ तिना रे सामणे आपू जाणे खे ना करेया, तो जो गल्ल परमेशरे माखे दर्शणो रे जरीये बताई राखी, से ये ए: 22 देख, यहूदा रे राजे रे मईलो दे जितणिया जवाणसा रयी गी रिया, सेयो बाबेलो रे राजा ओर परदाना गे निकयाल़ी की पऊँछाईया जाणिया ओर तिना जवाणसा ताखे बोलणा कि तेरे दोस्ते तूँ बईकाया ओर तिना री इच्छा पूरी ऊई गी ओर जेबे तेरे पैर चीकड़ो दे तसी गे तो सेयो फेर पीछे फिरी गे रे।" 23 तेबे मैं बोलेया, "तेरी सारी जवाणसा ओर बाल-बच्चे बेबीलोनिया गे निकयाल़ी की पऊँचाई देणे ओर तूँ बी बेबीलोनिया रे आथो ते नि बचणा, बल्कि तूँ पकड़ी की बाबेलो रे राजे रे वशो दे करी देणा ओर एस यरूशलेम शईरो रे फूकणे री बजा तूँ ई ऊणा।" 24 तेबे राजा सिदकिय्याहे यिर्मयाह खे बोलेया, "इना गल्ला रा केसी खे बी पता नि लगणा चाईयो, नई तो तूँ मारेया जाणा। 25 जे परदान लोक ये सुणी की कि मैं तां साथे गल्ल-बात करी राखी तांगे आई की पूछणे लगो, आसा गे बता कि तैं राजे गे क्या बोलेया, आसा ते कोई गल्ल नि लको ओर आसा तूँ मरवाणा नि ओर ये बी बता कि राजे ताखे क्या बोलेया, 26 तेबे तैं तिना खे बोलणा, ‘मैं राजे गे गिड़गिड़ाई की बिनती कित्ती थी कि माखे योनातानो रे कअरे फेर वापस नि पेज, नयी तो आऊँ तेती मरी जाणा’।" 27 तेबे सबी परदाने यिर्मयाह गे आई की पूछेया ओर जेड़ी राजे तेसखे आज्ञा दित्ती थी तिने ठीक तेड़ा ई ज्वाब दित्तेया। इजी री खातर तिने तेसखे ना तो कुछ बोलेया ओर ना से पेत खुलेया। 28 ईंयाँ जेस दिने यरूशलेम शईर बेबीलोनिये लई ला था तेस दिनो तक यिर्मयाह मईलो रे पईरेदारा रे आँगणो देई रया।