यिर्मयाह 1

परमेशरो रा यिर्मयाह खे बुलाया जाणा

1 हिल्किय्याह रा पाऊ यिर्मयाह जो बिन्यामीन इलाके रे अनातोत शईरो दे रणे वाल़े, पुरोईता बीचा ते एक पुरोईत था, तेसरे ई यो वचन ए। 2 यहोवे रा वचन तेसगे आमोनो रे पाऊ यहूदा रे राजा योशिय्याह रे राजो रे दिना दे तेसरे राज रे तेरूए साले पऊँचेया। 3 इजी ते बाद योशिय्याह रे पाऊ यहूदा रे राजा यहोयाकीमो रे राजो रे दिना दे, योशिय्याह रे पाऊ यहूदा रे राजा सिदकिय्याह रे राज रे ग्यारुए सालो रे अन्तो तक बी प्रकट ऊँदा रया, जदुओ तक तेस सालो रे पाँजुए मीन्ने रे यरूशलेम शईरो दे रणे वाल़े लोक बेबीलोनो री सेना गुलाम बणाई की लईगी।

यिर्मयाह रा बुलाणा

4 एक दिन यहोवे रा ये वचन यिर्मयाह खे मिलेया। यहोवे रा वचन ये था, 5 "आपणी माया रे गर्भो दे बणने ते पईले ई आऊँ ताखे जाणूंआ ओर पैदा ऊणे ते पईले ई मैं तेरा अभिषेक कित्तेया, मैं तूँ जातिया रा भविष्यबक्ता ठराया।"*1:5 गला. 1:15 6 तेबे मैं बोलेया, "हाय, परमेशर यहोवा! देख, आऊँ तो अच्छे ते बोलणा पनि जाणदा, कऊँकि आऊँ बऊत ई जवान माणूं ए।" 7 पर यहोवे माखे बोलेया, "ईंयाँ नि बोल कि आऊँ बऊत ई जवान माणूं ए, कऊँकि जेस केसी गे बी आऊँ ताखे पेजूँगा, तैं तेती जाणा ओर जो मां ताखे बोलणे खे बोलणा से ई तैं बोलणा। 8 तैं आपणे लोका खे देखी की नि डरना, कऊँकि ताखे छुड़ाणे खे आऊँ तां साथे ए, यहोवे री येई बाणी ए।"*1:8 प्रेरि. 26:17, प्रेरि. 18:9,10 9 तेबे यहोवे आपणा आथ बढ़ाई की मेरा मूँ छूँआ ओर यहोवे माखे बोलेया, "देख, मैं आपणे वचन तेरे मुंए दे पायी ते रे।"

दो दर्शण

10 देख, "मैं आजके दिने तूँ जातिया ओर राजा पाँदे अधिकारी ठराईता रा, तिना खे रूड़ाणे ओर टाल़ने रिया खातर, नाश करने ओर बाडणे रिया तँईं, तिना खे बनाणे ओर रूमणे रिया तँईं।"*1:10 प्रका. 10:11

बदामो री डाल़ी ओर उबल़दा टोकणा

11 तेबे यहोवे रा ये सन्देश माखे मिलेया, "तिने मांते पूछेया ओ यिर्मयाह, ताखे क्या दिशणे लगी रा?" मैं बोलेया, "माखे बदामो री एक पाँगटी दिशणे लगी री।" 12 यहोवे माखे बोलेया, "ताखे ठीक दिशणे लगी रा, कऊँकि आऊँ आपणे वचन पूरे करने वाल़ा ए।" 13 तेबे यहोवे रा वचन एक बार फेर मांगे पऊँचेया ओर यहोवे पूछेया, "ताखे क्या दिशणे लगी रा" मैं ज्वाब दित्तेया, "माखे एक उबल़दा ऊआ टोकणा दिशणे लगी रा, जेतेरा मूरा उत्तर दिशा रिया तरफा खे ए।" 14 तेबे यहोवे माखे बोलेया, "एस देशो रे सबी रणे वाल़ेया लोका पाँदे उत्तर दिशा ते मुसीबत आई की पड़नी। 15 परमेशरो री ये बाणी ए कि मां उत्तर दिशा रे राज ओर कुल बुलाणे ओर तिना आई की यरूशलेम शईरो रे बड़े द्वारो दे पीतरे जाणे रे द्वार ओर तेतेरे चऊँ कनारो री दवाला दे ओर यहूदा रे ओर सब शईरो रे सामणे आपणा-आपणा सिंहासन लगाणा। 16 मेरे आपणे लोका री सारी बुराईया रिया बजा ते मां तिना पाँदे सजा देणे री आज्ञा देणी, कऊँकि तिने माखे छाडी की दूजे देवतेया रिया तँईं तूप बाल़ेया ओर आपणे आथे की बणाई री मूर्तिया गे माथा तेकेया। 17 ओ यिर्मयाह उठ ओर आपणे टाल्ले चकी की त्यार ऊई जा ओर जो कुछ आऊँ ताखे बोलणे री आज्ञा देऊँगा, तिना खे सेई बोल। तैं तिना ते नि डरना, कऊँकि जे तूँ तिना देखी की डरेया, तो मां ताखे सजा देणी।*1:17 लूका 12:35 18 तुसा री रक्षा खे, सुण, मैं आज तूँ एस सारे याकूबो रे वंशो रा, यहूदा रे राजा, परदान, पुरोईत ओर आम लोका रे खलाफ गढ़ वाल़ा शईर, ओर लोए रा खम्बा ओर पीतल़ी री दवाल बणाई राखी। 19 सेयो तां साथे लड़ने तो जरूर, पर तां पाँदे प्रबल नि ऊणे, कऊँकि ताखे बचाणे खे आऊँ तां साथे ए, यहोवे री ये ई बाणी ए।"