1 जेबे यिर्मयाह ये भविष्यबाणी करेया करो था, तेबे इम्मेरो रे पाऊ पशहूरे जो पुरोईत ओर यहोवे रे मन्दरो रा परदान रखवाल़ा था, से सब सुणेया। 2 तेबे पशहूरे यिर्मयाह भविष्यवक्ते खे कैद करने खे ओर तेसखे कुटणे ओर यहोवे रे मन्दरो पाँदे बिन्यामीनो रे बड़े द्वारो पाँदे काठो दे ठोकणे री आज्ञा दित्ती।* 3 आगले दिन पशहूरे* यिर्मयाहो खे काठो बीचा ते निकल़वाया, तेबे यिर्मयाहे पशहूरो खे बोलया, "यहोवे तेरा नाओ पशहूर नि मागोर्मिस्साबीब* राखेया रा ए। 4 येई तुसा रा नाओ ए, कऊँकि यहोवे ये बोली राखेया, देख, आँऊ ताखे तेरिया तँईं ओर तेरे सब दोस्ता रिया तँईं बी डरो री बजा ठईरणा। सेयो आपणे दुश्‍मणा रिया तलवारी साथे तेरे देखदे ई काये जाणे ओर मां सारे यहूदी लोक बाबेलो रे राजे रे वशो रे करी देणे; तेस यहूदा रे लोक सेयो गुलाम बणाई की बाबेल देशो रे लई जाणे, ओर तलवारी साथे कायी देणे। 5 तेबे एस यरूशलेम शईरो रा सारा तअन ओर एसरी कमाई ओर सारिया कीमती चीजा खे ओर यहूदा रे राजे रा जितणा तअन ए, से सारा तिना रे दुश्‍मण बाबेलो रे वशो रे करी दणा; 6 ओर, ओ पशहूर, तू तिना सबी लोका साथे जो तेरे कअरो दे रओए गुलामिया रे चली जाणा आपणे तिना दोस्ता साथे जिना साथे तैं चूठी भविष्यबाणी कित्ती तू बाबेलो दे जाणा ओर तेथी मरना, ओर तेथी ताखे ओर तिना खे बी माट्टी देई जाणी।"

7 एक दिन मैं यहोवे ते ये बोलेया, ओ यहोवा, जेबे तैं आऊँ भविष्यवक्ता चुणेया तो तैं माखे तोखा दित्तेया, ओर मैं तोखा खाया; तू मांते तागतबर ए, इजी बजा ते तू मां पाँदे प्रबल ऊईगा। पूरा दिन मेरी आस्सी ओई; सारे मांते मजाक करोए। 8 कऊँकि जेबे आऊँ तेरे संदेशो रे बारे दे लोका खे बताऊँआ, तेबे आऊँ जोरे की आका पाई की ललकारूँआ, "उपद्रव ओर उत्पात ऊआ, आ उत्पात! कऊँकि यहोवे रा वचन दिन पर मेरिया तँईं निन्दा ओर मजाको री बजा ऊँदा रओआ।" 9 जे आऊँ आपणे आपू ते बोलूँ, "मां तेसरी चर्चा नि करनी ना यहोवे रे नाओ ते बोलणा, तेबे मेरे काल़जे री एड़ी दशा ऊणी मानो मेरी आडिया दे धधकती ऊई आग ओ, ओर आऊँ आपणे पीतरे यहोवे रे सन्देसो खे रोकदे-रोकदे थकी गा पर मांते रई नि ऊँदा"* 10 मैं बऊती रे मुंए ते आपणी निंदा सुणी राखी। चऊँ कनारे डर ई डर आ! मेरी जाण-पछयाणो रे सब जो मेरी ठोकर खाने री बाट देखोए, से आपू बीचे बोलोए, "तेसरे दोष बताओ, तेबे आसा तेसरी चर्चा फैलाई देणी। जेबे से तोखा खाओ, तेबे आसा तेस पाँदे प्रबल ऊई की तेसते बदला लणा।" 11 पर यहोवा मां साथे ए, यहोवा एक तागतबर वीरो जेड़ा ए; इजी वजह ते मेरे सताणे वाल़े प्रबल नि ऊणे, सेयो ठोकर खाई कि रूड़ने। सेयो दमाको ते काम नि करदे, इजी री खातर तिना खे बऊत शर्मिंदा ऊणा पड़ना। तिना री बेईजती सदा बणी री रणी ओर कदी नि पूलणी, 12 ओ सेना रे यहोवा, ओ तर्मिया खे परखणे वाल़े ओर काल़जे ओर मनो खे जाणने वाल़े, जो बदला ता तिना ते लणा, तेसखे आऊँ देखूँ, कऊँकि मैं आपणा मकदमा ता पाँदे छाडीता रा। 13 यहोवे रिया तँईं गाओ; यहोवे री स्तुति करो! कऊँकि से गरीब माणूंआ रे प्राणो खे दुष्ट लोका रे आथो ते बचाओआ।

14 स्रापित ओ से दिन जेस दिने आऊँ पैदा ऊआ! जेस दिने मेरी माये माखे जन्म दित्तेया से तन्य नि ओ! 15 स्रापित ओ से माणूं जिने मेरे बाओ खे ए सन्देश देई की तेसखे बऊत खुश कित्तेया कि तेरे पाऊ पैदा ऊआ। 16 तेस माणूंए री दशा तेस शईरो जेड़ी ओ जो यहोवे बिना दया ते नाश करिता; तेसखे प्यागा तो चींगणा ओर दिनो खे युद्धो री ललकार सुणदी रओ, 17 कऊँकि तिने माणूंए आऊँ मेरी माया रे पेटो देई नि काया कि मेरी माया रा पेट ई मेरी कब्र ऊँदी, ओर आऊँ तिदे ई पड़ेया रा रंदा। 18 आऊँ कऊँ उत्पात ओर शोग पोगणे खे पैदा ऊआ ओर आपणी जिन्दगिया दे मईणत ओर दु:ख देखूँ, ओर आपणे दिन बेज्जतिया दे बिताऊँ?