यिर्मयाह 16

यरूशलेम शईरो रिया तँईं परमेशरो री इच्छा

1 एकी बार फेर यहोवे मांते गल्ल कित्ती ओर बोलेया, 2 यहोवे माखे बोलेया, "यिर्मयाह ताखे ब्या नि करना चाईयो। ताखे एते जगा दे बच्चे नि पैदा करने चाईयो। 3 कऊँकि जो बच्चे एते जगा रे पैदा ऊणे ओर जेसा माया सेयो पैदा करने ओर जेस बाओ सेयो एते देशो रे जमाणे, 4 तिना रे बारे दे यहोवा ईंयाँ बोलोआ कि तुसा बीचा ते कई बुरी-बुरी बमारिया साथे मरने। तिना रिया तँईं केसी बी छाती नि पीटणी, ना तिना खे माट्टी देणी, सेयो जमीना दे गोबरो जेड़े पड़े दे रणे। सेयो तलवारी ओर अकाल़ो साथे मरी मिटणे ओर तिना री लाशा सर्गो रे पंछिया ओर बणो रे जानवरा खाणिया।" 5 यहोवे ये बोलेया, "यिर्मयाह, तेस कअरो दे नि जाओ जेते कअरो दे रोणा-पीटणा ओ, तेती नि जाणा, ना शोग मनाणे केथी जाणा ओर ना इना लोका रिया तँईं दु:ख करना" कऊँकि यहोवा घोषणा करोआ कि मैं आपणी शान्ति, करूणा ओर दया इना लोका पाँदा ते चकी ली री। 6 इजी बजा ते यहूदा प्रदेशो रे अमीर-गरीब सब मरने, ना तो इना रिया लाशा खे माट्टी देई जाणी, ना लोका छाती पीटणी, ना आपणा शरीर चीरना ओर ना दु:ख जताणे खे आपणे सिरो रे बाल़ कटवाणे, इना खे केसी बी शोगो रे रोटी नि बांडणी, ताकि शोगो रे तिना खे शान्ति देयो 7 जो लोक मरे दे लोका खे शोक करोए, तिना खे ईम्मत देणे खे केसी बी खाणा नि देणा। एथो तक कि माया या बाओ रे मरने पाँदे पनि। तिना खे ईम्मत देणे खे कोई बी शराबो रा ग्लास पनि पेजणा। 8 "यिर्मयाह, तैं पाट्टिया वाल़े रे कअरे इना साथे खाणे-पीणे खे नि जाणा। 9 कऊँकि सेना रा यहोवा, इस्राएलो रा परमेशर ईंयाँ बोलोआ कि देख, तुसा सामणे ओर तुसा रे दिना दे मां एड़ा करना कि एस देशो दे ना तो खुशी ओर मजे री आवाज सुणनी, ना लाड़े-लाड़िया रे ब्याओ री तामा दे खुशिया री आवाज।"*16:9 प्रका. 18:23

बिधानो रा ओर परमेशरो रा छाडेया जाणा

10 यिर्मयाह, जेबे तूँ इना लोका खे इना सब गल्ला बोले ओर सेयो तांते पूछो कि यहोवे आसा पाँदे यो सारिया बड़ी पारी मुसीबता पाणे खे कऊँ बोली राखेया? आसा रा पाप क्या ए ओर आसे आपणे परमेशर यहोवे रे खलाफ क्या पाप करी राखेया? 11 तो तिना लोका खे बोलणा, "यहोवा बोलोआ, कऊँकि तुसा रे बुजुर्ग माखे छाडी की दूजे देवतेया पीछे चले ओर तिना री आराधना करी की तिना खे माथा तेकेया ओर आऊँ छाडीता ओर मेरा बिधान नि मानेया 12 ओर जितणी बुराई तुसा रे बुजुर्गे कित्ती थी, तेते ते जादा तुसे करोए, कऊँकि तुसे आपणे बुरे मनो रे हठो पाँदे चलोए ओर मेरी नि सुणदे; 13 इजी बजा ते मां तुसे एस देशो ते पट्टी की एड़े देशो रे सेटणे, जेतेखे ना तो तुसे जाणदे ओर ना तुसा रे बुजुर्ग जाणो थे ओर तेती तुसा दिन-रात दूजे देवतेया री आराधना करदे रणे, कऊँकि मां तेती तुसा पाँदे कोई दया नि करनी।"

गुलामिया ते वापसी

14 तेबे यहोवे री ये बाणी ऊई, "देखो, एड़े दिन आऊणे वाल़े ए जिना रे फेर ये नि बोलेया जाणा, यहोवा जो इस्राएली लोका खे मिस्र देशो ते छुड़ाई की ल्याया, तेसरी जिन्दगिया री कसम।" 15 बल्कि ये बोलेया जाणा, "यहोवा जो इस्राएली लोका खे उत्तरा दे दुश्मण देशो ते ओर तिना सबी देशो ते जेती तिने सेयो बन्दुआ करीते थे, छुड़ाई की ल्याया, तेसरी जिन्दगिया री कसम।" कऊँकि मां इस्राएलो रे लोक तेस देशो रे वापस लई आऊणे जो मैं तिना रे बुजुर्गा खे दित्तेया था।

आऊणे वाल़ी सजा

16 देखो, यहोवे री ये वाणी ए कि मां बऊत सारिया मछलिया पकड़ने वाल़े बुलाणे ताकि सेयो इना लोका खे पकड़ी लो ओर तेबे मां बऊत सारे शिकारी बुलाई की पेजणे ताकि सेयो इना रा शिकार करी की सबी पाह्ड़ ओर पाह्ड़िया पाँदा ते ओर चट्टानी री दरारा बीचा ते काडो। 17 कऊँकि इना रा सारा चाल-चलण मेरिया आखी सामणे ए, से मेरी नजरा ते लूकी नि रया, ना तिना रा पाप मेरी आखी ते गुप्त ए, इजी री खातर मां तिना रे बुरे कामो री ओर पापो री दुगणी सजा देणी। 18 कऊँकि तिने मेरा देश आपणी घृणित चीजा री लाशा साथे अशुद्ध कित्तेया ओर मेरा इस्सा आपणी अशुद्धता साथे परी ता।

यिर्मयाह री प्रार्थना

19 यिर्मयाह प्रार्थना करोआ, ओ यहोवा, ओ मेरी तागत ओर माखे सम्बाल़ने वाल़े, मुसीबता रे बखते मेरी शरण लणे री जगा, जातिया-जातिया रे लोका तरतिया रे चऊँ कनारा ते तांगे आई की बोलणा, "पक्का म्हारे बुजुर्ग चूठी, बेकार ओर निष्फल चीजा खे अपनांदे आई रे।*16:19 रोम. 1:25 20 क्या लोक आपू खे सच्चे देवता बणाई सकोए। ना, सेयो मूर्तिया बनाई सकोए, पर सेओ मूर्तिया सच्चे देवता निए।" 21 तेबे यहोवे ज्वाब दित्तेया, "इजी बजा ते एक बार मां इना लोका खे आपणी सामर्थ दखाणी ओर तिना खे पता लगी जाणा कि आऊँ यहोवा ए।"