1 एक दिन यहोवे माखे ये बोलेया, "जाई की एक रेशमो री चाद्दर खरीदी लो, तिजी खे लको रे बान ओर से पाणिए दे नि सींजणे दे।" 2 तेबे मैं एक बऊत अच्छी चाद्दर खरीदी की यहोवे रे वचनो रे मुताबिक आपणे लको रे बानी ती। 3 तेबे बादो ते दूजी बार यहोवे रा ये सन्देश माखे मिलेया, 4 "जो चाद्दर तैं खरीदी की लको रे बानी ती री, तिजी खे यरूशलेम शईरो रे नेड़े फरात नदिया रे कनारे लई जा ओर तेती तिजी खे एकी चट्टानी रिया दरारा दे लकोई दे।" 5 यहोवे री एसा आज्ञा रे मुताबिक मैं से फरात नदिया रे कनारे लई जाई की चट्टानी रे लकोई ती। 6 कई दिन बाद यहोवे माखे बोलेया, "यिर्मयाह, उठ फेर फरात नदिया गे जा ओर जेसा चाद्दरी खे मैं ताखे तेती लकोणे री आज्ञा दित्ती थी तिजी खे तेथा ते लई लो।" 7 तेबे आऊँ फरात नदिया गे गया ओर खणी की जेसा जगा रे मैं से चाद्दर लकोई थी, से तेथा ते मैं से चाद्दर निकयाल़ी ती ओर देखो, चाद्दर खराब ऊई गी थी, से किजी कामो जोगी नि रयी गी थी। 8 तेबे यहोवे रा ये सन्देश माखे मिलेया, यहोवा फेर माखे एड़ा बोलोआ, 9 "मां ईंयाँ यहूदिया रा कमण्ड ओर यरूशलेम शईरो रे लोका रा गर्व नाश करी देणा। 10 यहूदा रे यो दुष्ट लोक जो मेरा वचन सुणने खे ना करोए, जो आपणे टीठ मनो पाँदे चलोए, दूजे देवतेया पीछे चली की तिना री आराधना करोए ओर तिना गे माथा टेकोए, सेयो एसा चाद्दरी जेड़े ऊई जाणे, जो किजी कामो जोगी नि रयी।" 11 यहोवे री ये बाणी ए कि जिंयाँ चाद्दर माणूंआ रे लको रे बानी जाओई, तिंयाँ ई मैं इस्राएलो रे सारे लोक ओर यहूदा रे सारे लोक आपणे लको दे बानी ते थे, ताकि सेयो मेरी प्रजा बणो ओर मेरे नाओं ओर महिमा ओर स्तुति करो, पर मेरे लोके मेरी एक नि सुणी।

12 इजी री खातर यिर्मयाह, यहूदा रे लोका खे बोल, "इस्राएलो रा परमेशर यहोवा ईंयाँ बोलोआ कि शराबो रे सारे कुप्पे शराबो साथे परे जाणे।" तेबे तिना ताखे बोलणा, "क्या आसा खे पता नि ए कि शराबो रे सारे कुप्पे शराबो साथे परे जाणे?" 13 तेबे तैं तिना खे बोलणा, "यहोवा ईंयाँ बोलोआ कि देखो, मां एस देशो रे सारे रणे वाल़े, खास करी की दाऊदो रे कराने री गद्दिया रे बैठणे वाल़े राजा, पुरोईत ओर भविष्यबक्ता बगैरा यरूशलेम शईरो रे सारे रणे वाल़े आपणे रोषो रा दारू पल़्याई की बेओश करी देणे। 14 तेबे मां यहूदा रे लोक एकी-दूजे साथे टकराणे, मतलब बाओ माठे साथे ओर माठा बाओ साथे, यहोवे री येई बाणी ए। मां तिना पाँदे कोई दया नि करनी, ओर ना कोई तरस खाणा ओर ना दया करी की सेयो नाश ऊणे ते बचाणे।"

15 यहूदा रे लोको देखो ओर कान लगाओ, कमण्ड नि करो, कऊँकि यहोवे एड़ा बोली राखेया। 16 आपणे परमेशर यहोवे री स्तुति करो, इजी ते पईले कि से अन्देर ल्याओ ओर तुसा रे पैर न्हेरे पाह्ड़ा रे ठोकर खाओ ओर जेबे तुसे प्रयासे रा आसरा देखो, तेबे से तिजी खे मौता रिया छांयी दे बदली देयो ओर तिजी खे अन्दकूप न्हेरा बणाई देयो। 17 यहूदा रे लोको जे तुसे यहोवे खे नि सुणो, तो मां कल्ले जे तुसा रे कमण्डो रिया बजा ते रोणा ओर मेरी आखी ते आसूआ री खाड्डा बह्यींदिया रणियां, कऊँकि दुश्मणे यहोवे रिया पेडा कैद करी तिया दिया ए। 18 यहोवे माखे बोलेया, "यहूदा रे लोको ये गल्ला राजा ओर राजमाता ते बोलो, एबे सिंहासनो पाँदे नि पर थाले जमीना पाँदे बैठी जाओ, कऊँकि तुसा रे सिरो रे सुन्दर मुकुट उतारी ते रे। 19 दक्खणी यहूदा देशो रे शईर केरी ते रे, कोई तिना खे बचायी नि सकदा, सारी यहूदी जाति गुलाम ऊई गी री, दुश्मणा सारे यहूदी लोक गुलाम बणाई की लई जाणे।" 20 इस्राएलो रे परदानो आपणियां आखी चकी की तिना खे देखो, तुसा रे दुश्मण जो उत्तर दिशा ते आऊणे लगी रे। से सुन्दर चूण्ड जो तांगे सम्बाल़ी राखेया था, से केयी ए? 21 जेबे से तुसा रे दोस्ता खे तुसा पाँदे परदान ठईराओगा, जिना खे तुसे आपणा नुकशाण करने री शिक्षा दित्ती थी, तेबे तुसे तिना खे कुछ नि बोली सकणे, पर तेस बखते तुसा खे बच्चे पैदा करने री जिया जेड़िया पीड़ा उठणियां। 22 जे तुसे आपणे मनो रे सोचो कि यो गल्ला किजी बजा ते मां पाँदे पड़ी रिया, तो तेरे बड़े पापो रिया बजा ते तूँ नांगा करी राखेया ओर अमला करने वाल़ी सेने तेरा बलात्कार कित्तेया। 23 क्या इथोपिया रा एक काल़ा आदमी आपणा चामड़ा या चीता आपणे तब्बे बदली सकोआ? जे सेयो एड़ा करी सकोए, तो तुसे बी, जो बुराई करना सीखी गे रे, पलायी करी सकोए। 24 यहोवा ये बोलोआ, "इजी बजा ते सेयो मां एड़े तित्तर-बित्तर करी देणे कि, जेड़ा पूऊ जंगल़ो ते अवा साथे तित्तर-बित्तर करेया जाओआ।"

25 यहोवे री ये बाणी ए कि तेरा इस्सा ओर मांते ठराया रा तेरा पाग येई ए, कऊँकि तैं माखे पूली की चूठो पाँदे परोसा राखी राखेया।* 26 इजी बजा ते मां तेरा चोगा तेरे मुंए तक चकणा, तेबे तुसा री शर्मा रा पता लगणा। 27 यहोवे तुसे सेई काम करदे देखी राखे जिना ते से नफरत करोआ। तिने तुसे पाह्ड़िया ओर मैदाना दे घिनौनी मूर्तिया रे देवतेया री पूजा करदे देखी राखे, जेड़े कोई आपणे पड़ोसिये री लाड़िया पीछे दौड़ोआ या कोई कोड़ा कोड़िया पीछे दौड़ोआ। ओ यरूशलेम शईरो रे लोको, तुसा पाँदे हाय! तुसा आपणे आपू खे कदुओ तक शुद्ध नि करना?* ओर तुसे कितणे दिना तक बचे दे रणे?