1 यहोवे माखे ये बोलेया, "यिर्मयाह, तू यहूदा प्रदेशो रे राजे रे मईलो दे जा ओर तेती जाई की मेरा ये सन्देश सुणा, 2 ओ दाऊदो री गद्दिया पाँदे बैठणे वाल़े यहूदा रे राजा, तूँ आपणे अधिकारी ओर यरूशलेमो दे तुसा रे लोका समेत जो एते मईलो रे बड़े द्वारो ते आया करोए, यहोवे रा वचन सुण।" 3 यहोवा एड़ा बोलोआ, "न्याय ओर तर्मो रे काम करो ओर लूटे रे माणूंए खे अन्देर करने वाल़े रे आथो ते बचा। परदेशी, अनाथ ओर बिदुआ पाँदे अन्देर या उपद्रव नि करो, ना एते जगा दे निर्दोष माणूंए रा खून बाह्ओ। 4 देखो, जे तुसे मेरी इना आज्ञा खे मानोगे, तो एस मईलो रे द्वारो ते ऊई की दाऊदो री गद्दिया पाँदे बैठणे वाल़े राजा रथ ओर कोड़ेया पाँदे चढ़ी की आपणे-आपणे अधिकारी ओर यरूशलेमो दे तुसा रे लोका समेत जाया करने। 5 पर जे तुसे इना मेरिया आज्ञा खे नि मानोगे तो, आऊँ आपणी ई कसम खाई की बोलूँआ, यहोवे री ये वाणी ए, कि ये मईल ऊजड़ी जाणा।* 6 कऊँकि यहोवा यहूदा रे राजे रे एस शईरो रे बारे दे ईंयाँ बोलोआ कि तूँ माखे गिलाद देशो जेड़ा ओर लबानोन पाह्ड़ो री उजाड़ जगा जेड़ा दिशोआ, पर मां तूँ पक्का मरूस्थल या एक रेगिस्तान शईर बणाई देणा। 7 मां लोक नाश करने वाल़े अथियार देई की तेरे खलाफ पेजणे, तिना तेरे बांके देवदार बाडी की आगी दे फूकी देणे।" 8 कईया देशा रे लोक जेबे एस शईरो रिये जाणे तेबे तिना एकी-दूजे ते पूछणा, "यहोवे एस बड़े शईरो री दशा एड़ी कऊँ कित्ती?" 9 तेबे लोका बोलणा, "इजी री बजा ए कि तिने आपणे परमेशर यहोवे री आज्ञा तोड़ी की दूजे देवतेया री आराधना कित्ती ओर तिना गे माथा तेकेया।"

10 ओ यहूदा प्रदेशो रे लोको, राजा योशिय्याह रिया तँईं मत रो। तेसरिया मौता पाँदे शोग नि करो, पर तेसरे पाऊ योआहाजो रिया तँईं जो गुलामिया दे गया था फूटी-फूटी की रोओ। कऊँकि तेस वापस ऊई की आपणे बाओ री जमीन फेर कदी नि देखणी। 11 कऊँकि यहूदा रे राजा योशिय्याह रा पाऊ शल्लूम, जो आपणे बाओ री जगा पाँदे राजा था ओर यरूशलेम शईरो ते दूर चलीगा, तेसरे बारे दे यहोवा ईंयाँ बोलोआ कि से फेर यरूशलेम शईरो खे वापस नि आऊणा। 12 योआहाज दुश्मणा रे देशो दे मरना जेती तेसरे दुश्मणे से कैद करी की राखी राखेया ए।

13 तेबे यहोवे माखे बोलेया, "तेस पाँदे लाणत ए, जो आपणे कअरो खे पापो साथे ओर आपणी पाँदली मञ्जला खे अन्याय साथे बणवाओआ, जो आपणे पड़ोसिया ते मुफ्तो रे काम करवाओआ ओर तेसरी मजदूरी नि देंदा।" 14 यहोयाकीम बोलोआ, "मां आपू खे लाम्बा-चौड़ा मईल बनाणा। ओर अव्वादार पाँदली मञ्जल बनाणी, ओर तिदे दवारिया बणाई की तिना दे देवदारो री लकड़िया रे फल़े लगाओआ ओर कूँगूओ साथे रंगी देयोआ।" 15 यहोयाकीम, तूँ आपणे कअरो दे देवदारो री लकड़िया री इच्छा करेया, तेरा राज ईंयाँ स्थिर नि रणा। देख, तेरा बाओ योशिय्याह न्याय ओर तर्मो साथे काम करो था ओर से खाओ-पियो ओर सुखो साथे रओ बी था। 16 योशिय्याह इजी बजा ते सुखो दे रओ था कऊँकि से गरीब ओर कंगाल़ लोका रा न्याय करो था। येई मेरी गल्ला रा ज्ञान राखणा ए। यहोवे री येई बाणी ए। 17 पर तूँ आपणा ई फायदा देखेया ओर निर्दोषो री अत्या करने ओर अन्देर ओर उपद्रव करने दे आपणा मन ओर त्यान लगाएया। 18 इजी री खातर योशिय्याह रे पाऊ यहूदा रे राजा यहोयाकीमो रे बारे दे यहोवा ईंयाँ बोलोआ, "लोका तेसरे अन्तिम संस्कारो पाँदे तेसरिया तँईं शोग नि मनाणा, सेयो एकी दूजे खे रोणे, ‘हाय मेरे पाई, हाय मेरी बईण’, ईंयाँ कोई ‘हाय मेरे स्वामी,’ या ओर तेरा वैभव, बोली की तेसरिया तँईं दु:ख नि करना। 19 बल्कि तेसखे गह्दे जेड़ी माट्टी देणी, से कसिटी की यरूशलेम शईरो रे बड़े द्वारो ते बारे सेटी देणा।"

20 ओ यरूशलेम शईरो रे लोको, लबानोनो रे पाह्ड़ो पाँदे चढ़ी की हाय, हाय बोलो, तेबे बाशान पाह्ड़ो पाँदे जाई की जोरे की चींग, तेबे अबीरमो रे पाह्ड़ो दे जाई की हाय, हाय कर, कऊँकि तेरे सारे दोस्त नाश ऊईगे रे। 21 तेरे सुखो रे बखते मैं तूँ सावधान कित्तेया था, पर तैं बोलेया, "मां तेरी नि सुणनी।" जवानिया ते ई तेरी चाल एड़ी ए कि तुसे मेरी गल्ल नि सुणदे। 22 ओ यहूदा, तेरे सारे गवाल़े* अवा दे ड्वाए जाणे ओर तेरे दोस्त गुलामिया रे चली जाणे, तेस बखते तुसे पक्का आपणी बुराईया री बजा ते शर्मिंदा ऊणे ओर तुसा रा मूँ काल़ा ऊई जाणा। 23 ओ लबानोनो दे रणे वाल़ी, ओ देवदारो रे आपणा कोअला बनाणे वाल़ी, जेबे ताखे बच्चा पैदा करने री जी पीड़ा उठो, तेबे तूँ बेचैन ऊई जाणी।

24 यहोवे री ये वाणी ए, "मेरी जिन्दगिया री कसम, चाए यहोयाकीमो रा पाऊ यहूदा रा राजा कोन्याह, मेरे दाँणे आथो री छाप बी ऊँदा, तेबे बी मां से खोली की सेटी देणा था। 25 मां तूँ तेरे प्राणो खे टोल़ने वाल़ेया रे आथो दे ओर जिना ते तूँ डरेया, मतलब बाबेलो रे राजा नबूकदनेस्सर ओर तेसरे सिपाईया रे आथो दे करी देणा। 26 मां तूँ तेरी जवानिया देई पराए देशो दे जो तेरी जन्म-भूमि नि ए, सेटी देणा ओर तूँ तेथी मरी जाणा। 27 पर जेते देशो दे सेयो वापस ऊणे री बड़ी इच्छा करोए, तेती आपणियां जमीना दे कदी बी वापस नि ऊणे।" 28 ये मर्द कोन्याह तुच्छ ओर टूटेया रा पांडा ए, ये बेकार पांडा ए, तेबे से कुलो समेत अणजाणे देशो दे कऊँ निकयाल़ी की सेटणा? 29 ओ यहूदा री तरती, यहूदा री तरती, ओ यहूदा री तरती, यहोवे रा वचन सुण! 30 यहोवा ईंयाँ बोलोआ, "यहोयाकीन नाओं रे आदमिए खे बिना कुलो रा लिखो, तेसरी जिन्दगी रामो दे नि बितणी ओर ना तेसरे कुलो ते कोई भाग्यशाली ऊई की दाऊदो री गद्दिया पाँदे बैठणा या यहूदा प्रदेशो पाँदे राज करने वाल़ा ऊणा।"