1 यहूदा प्रदेशो रे राजा सिदकिय्याह रे राज रे दसुए सालो दे जो बेबीलोनो रे राजा नबूकदनेस्सरो रे राजो रा ठारूआ साल था, यहोवे री तरफा ते ये वचन यिर्मयाह गे पऊँचेया। 2 तेस बखते बाबेलो रे राजे री सेने यरूशलेम शईर केरी ला था ओर यिर्मयाह भविष्यबक्ता यहूदा रे राजे रे मईलो दे पईरेदारा वाल़े आँगणो दे जेला दे कैदी था। 3 कऊँकि यहूदा रे राजे सिदकिय्याहे से ये बोली की कैद करी ता था, "तूँ एड़ी भविष्यबाणी कऊँ करेया, यहोवा ये बोलोआ: देखो, मां यरूशलेम शईर छोड़ ई बाबेलो रे राजे रे वशो दे करी देणा, नबूकदनेस्सरो ये शईर लई लणा; 4 ओर यहूदा रा राजा सिदकिय्याह कसदिया री सेना रे आथो ते नि बचणा, पर से बाबेलो रे राजे रे वशो दे जरूर पड़ना ओर तेस ओर बाबेलो रे राजे आमणे-सामणे आपू बीचे गल्ला करनिया ओर आपणी-आपणी आखी साथे एकी-दूजे खे देखणा। 5 नबूकदनेस्सरो सिदकिय्याह राजा बाबेलो खे लई जाणा ओर जदुओ तक आऊँ तेसरी सम्बाल़ नि लऊँगा, तदुओ तक से तेथी रणा, यहोवे री येई बाणी ए। चाए तुसे लोक बेबीलोनो रे लोका साथे लड़ो बी, तेबे बी तुसा रे लड़ने ते कुछ फायदा नि ऊणा।"

6 जेस बखते यिर्मयाह बन्दी था, तिने बोलेया, "यहोवे रा ये सन्देश माखे मिलेया, से सन्देश ये था: 7 देख, शल्लूमो रा पाऊ हनमेल जो तेरा चचेरा पाई ए, से तांगे ये बोलणे खे आऊणे वाल़ा ए, यिर्मयाह मेरा डोरू तो अनातोतो दे ए, तिजी खे खरीदी लो, कऊँकि तू मेरा सबी ते नेड़े रा रिश्तेदार ए। तेस डोरूए खे खरीदी की छुड़ाणे रा अक्क ताखे ए।" 8 तेबे यहोवे रे वचनो रे मुताबिक मेरा चचेरा पाई हनमेल पईरे वाल़े आँगणो दे मांगे आई की बोलणे लगेया, मेरा जो डोरू बिन्यामीन देशो रे अनातोत शईरो देया, तेतेखे खरीदी लो, कऊँकि तेतेरा मोल करने ओर तेतेखे छुड़ाणे रा अक्क तेरा ईए, इजी री खातर तूँ तेतेखे खरीदी लो। तेबे माखे पता लगी गा कि ये यहोवे रा वचन था। 9 तेबे मैं से अनातोतो रा डोरू आपणे चचेरे पाई हनमेलो ते खरीदी ला ओर तेतेरा दाम चाँदिए रे 200 ग्राम* तोली की देई ते।* 10 मैं कागजो पाँदे दस्तखत ओर मुहर लगणे ते बाद, गवाह् सामणे चाँदी ताकड़िया दे तोली की तेसखे देईता। 11 तेबे मैं खरीदणे रे दोनो कागज जिना दे सारिया सर्ता लिखी राखिया थिया ओर जिना बीचा ते एकी पाँदे मुहर थी ओर दूजी खुली थी, 12 तिना खे लई की आपणे चचेरे पाई हनमेलो रे ओर तिना गवाह् सामणे जिने कागजो पाँदे दस्तखत कित्ते थे ओर तिना सबी यहूदिया सामणे बी जो पईरे वाल़े आँगणो दे बैठी रे थे, नेरिय्याह रे पाऊ बारूको खे जो महसेयाह रा पोता था, सम्बाल़ी ता। 13 सारे लोका सामणे गवा मानी की बारूको खे ये आज्ञा दित्ती, 14 "इस्राएलो रा परमेशर, सेना रा यहोवा ईंयाँ बोलोआ कि यो खरीदणे रे कागज, जिना दे मुहर करी राखी ओर जो खुली री ए, इना खे लई की माट्टिया रे पांडे दे राख, ताकि यो बऊत दिना तक रओ। 15 कऊँकि इस्राएलो रा परमेशर, सेना रा परमेशर यहोवा ईंयाँ बोलोआ कि एते देशो दे कअर, डोरू ओर अंगूरा रे बगीचे फेर बेचे ओर खरीदे जाणे।"

16 जेबे मैं सेयो कागज नेरिय्याह रे पाऊ बारूको रे आथो दे दित्ते, तेबे मैं यहोवे ते ये प्रार्थना कित्ती, 17 "ओ प्रभु यहोवा, तैं बड़ी सामर्थ ओर शक्तिया साथे सर्ग ओर तरती बणाई राखी, ताखे कोई काम कठण नि ए। 18 यहोवा, तूँ ह्जारा आदमिया पाँदे दया करदा रएया, पर बुजुर्गा रे पापो रा बदला तिना ते बाद तिना रे कराने रे लोका खे बी देया, ओ महान ओर पराक्रमी परमेशर, जेसरा नाओं सेना रा यहोवा ए, 19 ओ यहोवा, तूँ बड़ी योजना करने वाल़ा ओर सामर्थो रे काम करने वाल़ा ए, तेरी नजर माणूंआ रे सारे चाल-चलणो पाँदे लगी री रओई ओर तूँ हर एकी खे तेसरे चाल-चलण ओर कामो रा फल देया। 20 ओ यहोवा, तैं मिस्र देशो दे नशाण ओर चमत्कार कित्ते ओर आजो तक इस्राएली, बल्कि सबी माणूंआ बीचे तेड़ा ई करदा आई रा, ईंयाँ तैं आपणा एड़ा नाओं करी राखेया, जो आजके दिनो तक बणेया राए। 21 ओ यहोवा, तूँ आपणी इस्राएली प्रजा खे मिस्र देशो ते नशाण, चमत्कार, सामर्थी आथ, शक्ति ओर बड़े डराऊणे कामो साथे निकयाल़ी की ल्याया। 22 ओ यहोवा, तैं ये देश तिना खे दित्तेया जेतेरे देणे री कसम तैं तिना रे बुजुर्गा ते बऊत पईले खाई थी, जिदे दूद ओर सयीतो* रिया खाड्डा बह्ओईया ओर सेयो आई की तेतेरे अधिकारी ऊए। 23 तेबे बी तिने तेरी नि मानी, ओर ना तेरी व्यवस्था पाँदे चले; बल्कि जो कुछ तैं तिना खे करने री आज्ञा दित्ती थी, तेते बीचा ते तिने कुछ पनि कित्तेया। इजी बजा ते तैं तिना पाँदे यो सारिया मुसीबता ल्याईया। 24 एबे एसा बेबीलोनो री सेना खे देख, सेयो लोक यरूशलेम शईरो खे लणे खे आईगे रे ओर ये शईर तलवार, अकाल़ ओर बमारिया रिया बजा ते बेबीलोनिया रे वशो दे करी ता रा। जो तैं बोलेया था से एबे पूरा ऊई रा ओर तूँ इजी खे देखे बीए। 25 तेबे बी ओ परमेशर यहोवा, तैं माखे बोली राखेया कि गवाह् बुलाई की तेस डोरूए खे मोले लो, तेबे बी ये शईर कसदिया रे वशो दे करी ता था।"

26 तेबे यहोवे रा ये वचन यिर्मयाह गे पऊँचेया, 27 "आऊँ तो सबी प्राणिया रा परमेशर यहोवा ए, क्या माखे कोई बी काम कठण ए। 28 इजी री खातर यहोवा ईंयाँ बोलोआ, देख, आऊँ एस शईरो खे कसदिया ओर बाबेल रे राजा नबूकदनेस्सरो रे वशो दे करने वाल़ा ए ओर तेस ये लई लणा। 29 जो कसदी यरूशलेम शईरो साथे युद्ध करने लगी रे, तिना छोड़ ई शईरो दे आऊणा ओर आग लगाई की ये शईर फूकी देणा, ओर जिना कअरो रे छतो पाँदे तिने बाल देवते खे तूप बाल़ी की ओर दूजे देवतेया खे अर्घ देई ई माखे रोष चढ़ाया, सेयो कअर फूकी देणे। 30 कऊँकि इस्राएल ओर यहूदा, जो काम माखे बुरे लगोए, तिना ई बचपनो ते करदे आई रे, इस्राएली आपणी बणाई री मूर्तिया साथे माखे रोष चढ़ांदे आई रे, यहोवे री येई बाणी ए। 31 ये शईर जदुओ ते बसी रा, तदुओ ते आजो तक मेरे रोष ओर जल़नी रे पड़कणे री बजा ऊई रा, इजी री खातर एबे मां ये आपणे सामणे ते इजी बजा ते दूर करना, 32 कऊँकि इस्राएल ओर यहूदा यरूशलेम शईरो समेत आपणे राजा, परदान, पुरोईत ओर भविष्यबक्तेया समेत, सारे के सारे बुराई करी-करी की माखे रोष दलांदे आई रे। 33 तिने मेरी तरफा खे मूँ नि, बल्कि पीठ फेरी ती री, तेबे बी आऊँ तिना खे बड़ी मईणता साथे सिखांदा आई रा, पर तिने मेरी शिक्षा नि मानी। 34 बल्कि जेतेखे मेरा मन्दर बोलोए, तिदे बी तिने आपणी घृणित चीजा स्थापित करी की से अशुद्ध करी राखेया। 35 तिने हिन्नोमिया री तराईया दे बाल देवते रिया ऊच्चे-ऊच्चे मन्दर बणाई की आपणे माठे-बेटिया मोलेक* देवते खे बलि करी की चढ़ाए, जेतेरी आज्ञा मैं कदी नि दित्ती ओर ना ये गल्ल कदी मेरे मनो दे आई कि एड़ा घृणित काम करेया जाओ ओर जेते कि यहूदी लोक पापो दे फसो।" 36 पर एबे इस्राएलो रा परमेशर यहोवा एस शईरो रे बारे दे, जेसरिया तँईं तुसे लोक बोलोए, से तलवार, अकाल़ ओर बमारिया रे जरीये बाबेलो रे राजे रे वशो दे पड़ी रा, ये बोलोआ, 37 "देखो, आऊँ तिना खे तिना सबी देशा ते जिदे मैं सेयो रोष ओर जल़ना दे आई की पेजी ते थे, वापस ल्याई की मां सेयो एस शईरो दे कट्ठे करने ओर बिना डरे बसायी देणे। 38 इस्राएल ओर यहूदा रे लोक मेरे आपणे लोक ऊणे ओर आऊँ तिना रा परमेशर ठईरना।* 39 मां तिना रा एक मन ओर तिना री एक चाल करी देणी, ताकि सेयो सदा मेरा डर मानदे रओ, जेते कि तिना रा ओर तिना ते बाद तिना रे कराने रा बी पला ओ। 40 मां इस्राएल ओर यहूदा रे लोका साथे ये वाचा बानणी कि मां ना कदी तिना रा साथ छाडणा ओर ना कदी तिना रा पला करना छाडणा ओर मां आपणा डर तिना रे मनो रे एड़ा पैदा करना कि तिना मांते कदी लग नि ऊणा चाणा।* 41 मां बड़ी खुशिया साथे तिना रा पला करदे रणा ओर सच्ची खेई सेयो एस देशो रे आपणे सारे मन ओर प्राणो साथे बसाणे। 42 देख, यहोवा ईंयाँ बोलोआ कि जिंयाँ मैं आपणी एसा प्रजा पाँदे इतणी बड़ी मुसीबत पायी, तिंयाँ ई पक्का इना साथे पलाई बी करनी, जेतेखे करने रा वादा मैं कित्तेया था। इजी री खातर ये देश जेतेरे बारे दे तुसे लोक बोलोए 43 कि ये उजाड़ ऊईगा रा, इदे ना तो माणूं रयी गे रे ओर ना डांगर, ये तो कसदिया रे वशो रे पड़ीगा रा, इदे ई फेर डोरू खरीदे जाणे 44 ओर बिन्यामीन देशो रे, यरूशलेम शईरो रे नेड़े-तेड़े ओर यहूदा प्रदेशो रे शईरा दे, पाह्ड़ी प्रदेशो रे शईरा दे, पच्छमी यहूदा रे थालले शईर ओर यहूदा रे दक्खणा रे रेगिस्तानो रे लोका गवाह् बुलाई की डोरू मोले लणे ओर कागजा पाँदे दस्तखत ओर मुहर लगवाणी, कऊँकि मां ये जमीन आपणे लोका खे वापस करी देणी, यहोवे री येई बाणी ए।"