यिर्मयाह 49

अम्मोन देशो रे बारे दे परमेशरो रा न्याय

1 अम्मोनिया रे बारे दे यहोवा ईंयाँ बोलोआ, "क्या इस्राएलो दे कोई पाऊ नि ए? क्या तेसरा कोई बारिस नि रया? तो तिने मोलेक देवते री मूर्तिया री पूजा करने वाल़े लोका खे गाद जातिया रा इलाका कऊँ लणे दित्तेया? तेसरी प्रजा इस्राएलो रे शईरो दे कऊँ बसी री?" 2 यहोवे री ये बाणी ए कि एड़े दिन आऊणे वाल़े ए कि मां अम्मोनिया रे रब्बा नाओं रे राजधानिया रे शईरो रे खलाफ युद्धो री ललकार सुनाणी ओर से ऊजड़ी की खण्डहर ऊई जाणा ओर तेथो री बस्तिया फूकी देणियां, तेबे जिने लोके इस्राएली लोका रा देश लई ला था, तिना रा देश इस्राएली लोका रे वशो दे फेर करना, यहोवे रा येई वचन ए। 3 ओ हेशबोनो रे लोको लाणत ए, कऊँकि आई शईर नाश ऊईगा रा। ओ रब्बा रे लोको चींगो ओर लको दे टाट बानो, छाती पीटदी ऊईया बाड़ो रे ओरे-पोरे दौड़ो, कऊँकि मल्काम आपणे पुरोईता ओर परदाना समेत गुलामिया रे चली जाणा। 4 ओ पटकणे वाल़े अम्मोनी लोको, तुसे आपणे देशो री तराईया पाँदे कमण्ड कऊँ करोए? तुसे ये पूछी की आपणे पैसे पाँदे परोसा राखोए, "आसा रे खलाफ चढ़ाई कुण करी सकोआ?" 5 परमेशर, सेना रे परमेशर यहोवे री ये बाणी ए, "देख, जो तुसा रे चऊँ कनारले देश ए, मां तिना बजा ते तुसा रे मनो दे डर पैदा करना ओर तुसा रे देशो रे लोक आपणे-आपणे सामणे रिया तरफा खे तकेले जाणे ओर जेबे सेयो मारे-मारे फिरने, तेबे सेयो केसी कट्ठे नि करने। 6 पर तिजी ते बाद मां अम्मोनी गुलामिया ते वापस ल्याऊणे, यहोवे री येई बाणी ए।"

एदोमो रे बारे दे परमेशरो रा न्याय

7 एदोमो रे बारे दे सेना रा यहोवा ईंयाँ बोलोआ, "क्या तेमान शईरो दे कोई अक्लमंद माणूं नि रया? क्या तेथो रे ज्ञानिया री योजना निष्फल ऊई गी? क्या तिना रे सारे अक्लमंद चली गे? 8 ओ ददानो रे रणे वाल़ेयो नठो, वापस ऊई जाओ, तेती लूकी की बसी जाओ, कऊँकि जेबे मां एदोमो रे लोका खे सजा देणे लगणा, तेबे तिना पाँदे पारी मुसीबत पड़नी। 9 जे अंगूरा खे तोड़ने वाल़े तांगे आऊँदे, तो तिना केथी-केथी अंगूर छाडी जाणे थे ओर जे चोर राती आऊँदे तो तिना जितणा जियू बोलणा था तिथणा तअन लूटी की लई जाणा था। 10 कऊँकि मैं एदोम पूरी तरअ ते नाश करी राखेया, तिना खे लूकणे खे केथी बी जगा नि ए। तेसरे कुल, रिश्तेदार ओर पड़ोसी सब नाश ऊईगे रे ओर तेसरा अन्त ऊईगा। 11 आपणे अनाथ बाल़का खे छाडी जाओ, मां सेयो पाल़ने ओर तुसा री बिदुआ जवाणसा मां पाँदे परोसा राखो।*49:11 1 तीमु. 5:5 " 12 कऊँकि यहोवा ईंयाँ बोलोआ, "देखो, जो एते जोगे नि थे कि कटोरे ते पियो, तिना खे तो पक्का पीणा पड़ना, तेबे तूँ किंयाँ बी निर्दोष ऊई की नि बचणा। तूँ निर्दोष ऊई की नि बचणा, ताखे जरूर पीणा पड़ना। 13 कऊँकि यहोवे री ये बाणी ए कि मैं आपणी कसम खाई राखी कि बोस्रा शईर एड़ा ऊजड़ी जाणा कि लोक हैरान ऊणे ओर तेसरा उदारण देई की निन्दा करेया करनी ओर स्राप देया करना ओर तेथो रे सारे गाँवो सदा खे उजाड़ ऊई जाणे।" 14 मैं यहोवे री तरफा ते सन्देश सुणी राखेया, बल्कि जातिया-जातिया बीचे एक दूत ये बोलणे खे बी पेजी राखेया कि कट्ठे ऊई की एदोमो पाँदे अमला करो ओर तेस साथे लड़ने खे उठो। 15 यहोवा एदोमो खे बोलोआ, "कऊँकि मैं तूँ जातिया बीचे छोटा ओर माणूंआ बीचे बेकार करिता रा। 16 ओ डरो रे मारे दूजे देशो रे लूकणे वाल़े लोको, ओ पाह्ड़िया री चूँडिया पाँदे कअर बनाणे वाल़ेयो! तेरे डराऊणे रूपे ओर मनो रे कमण्डे ताखे तोखा देई राखेया। चाए तूँ उकाबो जेड़ा आपणा बसेरा ऊच्ची जगा रे बणाए, तेबे बी मां तूँ तेथा ते थाले उतारी की ल्याऊणा, यहोवे री येई बाणी ए। 17 एदोम इतणा ऊजड़ी जाणा कि जो कोई तिसिये चलोगा, से हैरान ऊणा ओर तेसरे सारे दु:खो पाँदे चाड़िया बजाणियां।"

18 यहोवे रा ये वचन ए कि जेड़ी सदोम ओर गमोरा ओर तेथो रे नेड़े-तेड़े रे रणे वाल़े शईरा रे उल्टणे री दशा ऊई थी, तेड़ी ई दशा सदोमो रे लोका री बी ऊणी, तेती दुबारा कोई माणूं नि रणा ओर ना ई कोई माणूं टिकणा।*49:18 उत्प. 19:24-25 19 देखो, मां एदोम शेरो जेड़े यरदन नदिया रे नेड़े-तेड़े कणे जंगल़ो रे सदा री चराईया दे चराणा ओर मां सेयो तेस सामणे से चट नठाई देणे, तेबे जेसखे आऊँ चूणूँगा, से तिना पाँदे अधिकारी ठराणा। मां जेड़ा कोई नि ए। मां साथे कोई मुकद्दमा नि लड़ी सकदा। से ग्वाल़ा केयी ए जो मेरा सामणा करी सकोआ? 20 देखो, परमेशरे एदोम ओर तेमानो रे खलाफ क्या योजना करी राखी? एथो तक कि पेडा-बाकरिया रे छोटे बच्चे बी तिना खिंजी की लई जाणे ओर मां से पक्का माणूंआ ते खाली करी देणा। 21 जेबे एदोम नाश ऊणा, तेबे तेसरी अवाजा ते तरती थरथराणी ओर एड़ा चींग-पड़ताल़ ऊणी कि लाल समुद्रो तक सुणनी। 22 देखो, से उकाबो जेड़ा उडी जाणा ओर बोस्रा पाँदे आपणे पंख फैलाणे ओर तेस बखते एदोमी सेना रा मन बच्चा पैदा करने वाल़ी जवाणसा जेड़ा ऊणा।

दमिश्को रे बारे दे परमेशरो रा न्याय

23 दमिश्क शईरो रे बारे दे यहोवा ईंयाँ बोलोआ, "हमात ओर अर्पाद शईरो रे लोका री उम्मीद टूटी जाणी, कऊँकि तिने बुरा सन्देश सुणी राखेया, समुद्रो पाँदे फिकर ए, से शान्त नि ऊई सकदा। 24 दमिश्को रे लोक बऊत कमजोर ऊईगे रे ओर सेयो डरो रे मारे ओर थरथरांदे ऊए नठणे लगी रे, तिना खे बच्चा पैदा करने री जिया पीड़ा उठी रिया। 25 तेस शईरो पाँदे हाय, दमिश्क से जाणेया मानेया दा शईर ए, जेते दे आऊँ कदी खुश रऊँ था। से छाडी देणा!" 26 सेना रे परमेशर यहोवे री ये बाणी ए, "कि एक दिन मां तेथो रे सिपाई काई देणे ओर तिना रा बोलणा बन्द ऊई जाणा। 27 मां दमिश्क शईरो री दवाला दे आग लगाई देणी जेते कि राजा बेन्हददो रे मईल फूकी जाऊणे।*49:27 बेन्हदद दमिश्को रे कईया राजेया रे नाओं या उपाधि थी। 1 राज. 15:18,20; 2 राज. 13:24 " 28 केदार जनजाति ओर हासोर राज्य रे बारे दे जो बाबेलो रे राजे नबूकदनेस्सरे छीनी ले थे, यहोवा ईंयाँ बोलोआ, "उठी की केदारो पाँदे चढ़ाई करो, पूर्बो रे रेगिस्तानो री ओरी जातिया रा नाश करो। 29 तिना रिया पेडा-बाकरिया तिना लई जाणिया ओर तिना रे तम्बू ओर पांडे चकी की ऊँट बी नठाई की लई जाणे ओर तिना लोका खे आका पायी की बोलणा, ‘चऊँ कनारे डर ई डर ए’।" 30 यहोवे री ये बाणी ए कि, ओ हासोरो रे रणे वाल़ेयो नठो! दूर-दूर नठी जाओ, केथी जाई की लूकी की बसी जाओ, कऊँकि बाबेलो रे राजा नबूकदनेस्सरे तुसा रे खलाफ योजना करी राखी। 31 यहोवे री ये बाणी ए कि, उठी की तेसा चैना साथे रणे वाल़ी जातिया पाँदे चढ़ाई करो, जो बिना डरे रओए ओर बिना दरवाजे ओर बड़े द्वारो रे ईंयाँ ई बसी रे। 32 तिना रे ऊँट ओर अणगिणत गायी-बल़द ओर पेडा-बाकरिया चोरी की लई जाणिया, कऊँकि मां तिना रा नाश करने वाल़े सबी दिशा रे तित्तर-बित्तर करी देणे ओर चऊँ कनारो ते तिना पाँदे मुसीबत ल्याऊणी, यहोवे री येई बाणी ए। 33 हासोर गीदड़ा री रणे री जगा ऊणी ओर सदा खे उजाड़ ऊई जाणा, तेती ना कोई माणूं रणा ओर ना कोई माणूं तिदे टिकणा। 34 यहूदा रे राजा सिदकिय्याह रे राजो रे शुरूए दे यहोवे रा ये वचन एलाम देशो रे बारे दे यिर्मयाह भविष्यबक्ते गे पऊँचेया, 35 सेना रा परमेशर यहोवा ईंयाँ बोलोआ, "मां एलामो रा धनुष जो तिना रे पराक्रमो री खास बजा ए, तोड़ी देणा 36 ओर मां सेयो सर्गो ते अवा चलायी की चारो दिशा रे एथो तक तित्तर-बित्तर करी देणे कि एड़ी कोई जाति नि रणी, जिदे एलाम नठदे ऊए नि आओगा।" 37 कऊँकि आऊँ एलामो रे लोका ते बऊत रोषे ए, मां एलामो रे लोक तिना रे दुश्मणा सामणे कमजोर बणाई देणे ओर तिना पाँदे आपणा कोप पड़काई की सेयो मुसीबता रे पाणे। यहोवे री ये बाणी ए कि मां तिना पाँदे लड़ाईया री तलवार चलाई-चलाई की तिना रा नाश करी देणा। 38 मां एलामो रे आपणा सिंहासन राखी की तिना रे राजा ओर परदान नाश करने, यहोवे री येई बाणी ए। 39 "पर यहोवा ईंयाँ बी बोलोआ कि मां अन्तो रे दिना रे एलाम गुलामिया ते वापस ल्याऊणा।"