1 तेबे तेस ई सालो दे, मतलब यहूदा रे राजा सिदकिय्याह रे राजो रे चौथे सालो रे पाँजुए मीन्ने, अज्जूरो रा पाऊ हनन्याह जो गिबोन शईरो रा एक भविष्यबक्ता था, तिने मांते यहोवे रे मन्दरो दे, पुरोईत ओर सबी लोका सामणे बोलेया, 2 "इस्राएलो रे लोका रा परमेशर सेना रा यहोवा ईंयाँ बोलोआ मां से तागती रा जूँगड़ा तोड़ी देणा जो बाबेलो रे राजे यहूदा रे लोका पाँदे राखी राखेया। 3 यहोवे रे मन्दरो दे जितणे पांडे बाबेलो रे राजा नबूकदनेस्सरे एथा ते चकी की बाबेलो खे लईगा था, सेयो मां दूई साला ते पीतरे फेर यरूशलेम शईरो दे वापस ली आऊणे। 4 मां यहूदा रे राजा यकोन्याह बी वापस एथी लई आऊणा। यकोन्याह, यहोयाकीमो रा पाऊ ए मां से सारे यहूदा रे लोक वापस लई आऊणे जिना खे नबूकदनेस्सरे आपणा कअर छाडणे ओर बाबेल जाणे खे मजबूर करिता। यहोवे री येई बाणी ए मां से तागती रा जूँगड़ा तोड़ी देणा जो बाबेलो रे राजे यहूदा रे लोका पाँदे राखेया रा ए!"

5 तेबे यिर्मयाह नबीए हनन्याह नबीए ते बोलेया, सेओ यहोवे रे मन्दरो दे खड़ी रे थे। पुरोईत ओर तेथो रे सारे लोक यिर्मयाह रा बोलेया रा सुणी सको थे। 6 यिर्मयाहे हनन्याह ते बोलेया, "आमीन्! माखे आश ए कि यहोवा एड़ा ई करो, जो गल्ला तैं भविष्यबाणी करी की बोली राखिया कि यहोवे रे मन्दरो रे पांडे ओर सारे बन्दी बाबेलो ते एते जगा दे फेर आऊणे, तिना खे यहोवा पूरा करो। 7 तेबे बी मेरा ये वचन सुण, जो आऊँ ताखे ओर सबी लोका खे सुणाऊँआ। 8 जो भविष्यबक्ता पुराणे बखतो ते मांते ओर तांते पईले ऊँदे आये थे, तिने तो बऊत सारे देश ओर बड़े-बड़े राज रे खलाफ युद्ध ओर बमारिया रे बारे दे भविष्यबाणी कित्ती थी। 9 पर जो भविष्यबक्ता ठीक भविष्यबाणी करो, तो जेबे तेसरे वचन पूरे ओ, तेबेई तेस भविष्यबक्ते रे बारे दे पक्का ऊई जाणा कि ये सच्चो खेई यहोवे रा पेजेया राए।"

10 तेबे हनन्याह भविष्यबक्ते से तागती रा जूँगड़ा जो यिर्मयाह भविष्यबक्ते री कांदा पाँदे था, त्वारी की तोड़ी ता। 11 तेबे हनन्याहे सबी लोका सामणे बोलेया, तिने बोलेया, "यहोवा ईंयाँ बोलोआ कि ईंयाँ ई मां दूई साला ते पीतरे बाबेलो रे राजा नबूकदनेस्सरो रा जूँगड़ा सबी जातिया री क्याड़िया पाँदा ते त्वारी की तोड़ी देणा।" तेबे यिर्मयाह भविष्यबक्ता मन्दरो रिया जगा ते चली गा।

12 तेबे यहोवे रा वचन यिर्मयाह खे मिलेया। ये तेबे ऊआ जेबे हनन्याह भविष्यबक्ते यिर्मयाह भविष्यबक्ते री क्याड़िया पाँदला जूँगड़ा त्वारी की तोड़ी ता। 13 "जाई की हनन्याह गे ये बोल, कि यहोवा ईंयाँ बोलोआ कि तैं लकड़िया रा जूँगड़ा तो तोड़ी ता, पर इजी रे बदले तैं लोए रा जूँगड़ा बणाईता रा। 14 कऊँकि इस्राएलो रा परमेशर, सेना रा यहोवा ईंयाँ बोलोआ कि आऊँ इना सबी जातिया री क्याड़िया पाँदे लोए रा जूँगड़ा राखूँआ ओर सेयो बाबेलो रे राजा नबूकदनेस्सरो रे वशो दे रणे ओर इना खे तेसरे वशो दे रणा पड़ना, कऊँकि मैदानो रे जीव-जन्तु बी मां तेसरे वशो रे करी देणे।"

15 तेबे यिर्मयाह नबीए हनन्याह नबीए खे ये बी बोलेया, "ओ हनन्याह, देख, यहोवे तूँ नि पेजी राखेया, तैं इना लोका खे चूठी उम्मीद देई राखी।" 16 इजी री खातर यहोवा ताखे ईंयाँ बोलोआ, "देख, मां तूँ तरतिया पाँदा ते चकी देणा, तूँ एस सालो रेई मरी जाणा, कऊँकि तैं यहोवे रिया तरफा ते फिरने रिया गल्ला बोली राखिया।" 17 तेबे एस वचनो रे मुताबिक नबी हनन्याह तेस सालो रे सातुए मीन्ने दे मरी गा।