यिर्मयाह 43

यिर्मयाह रा मिस्रो खे लई की जाणा

1 जेबे यिर्मयाह भविष्यबक्ते परमेशर यहोवे रा ये सन्देश सबी लोका खे सुनाणा खत्म कित्तेया, जिना खे बोलणे खे यहोवे से तिना सबी लोका गे पेजेया था, 2 तेबे होशायाह रा पाऊ अजर्याह ओर कारेह रे पाऊ योहानान ओर सारे कमण्डी लोके यिर्मयाह खे बोलेया, "तूँ चूठ बोलेया। म्हारे परमेशर यहोवे तूँ ये बोलणे खे नि पेजेया कि तुसे लोक मिस्रो दे रणे खे नि जाओ, 3 पर नेरिय्याह रा पाऊ बारूक ताखे म्हारे खलाफ बोलणे खे सकेल़ोआ, ताकि आसे कसदी लोका रे आथो दे पड़ूँ ओर सेयो आसा खे काई देयो या बन्दी बणाई की बाबेलो खे लई जाओ।"

4 इजी री खातर कारेह रा पाऊ योहानान ओर सिपाईया रे सारे परदान ओर सबी लोके यहूदा दे रणे री यहोवे री आज्ञा मानणे खे ना करी ती। 5 पर कारेह रा पाऊ योहानान ओर सिपाईया रे परदान तिना सबी यहूदिया खे जो सेयो नेड़े-तेड़े रे देशा ते यहूदा खे वापस आए थे, जेती सेयो नठीगे थे, सेयो तिना खे लईगे। 6 एबे योहानान ओर सारे सैनिक अधिकारी, सारे मर्द, जवाणस, बाल-बच्चे, राजकुमारिया ओर जितणे लोका खे अंगरक्षको रा परदान नबूजरदान गदल्याह खे जो अहीकामो रा पाऊ ओर शापानो रा पोता था, सम्बाल़ी गा था, तिना खे ओर यिर्मयाह नबी ओर नेरिय्याह रे पाऊ बारूको खे सेयो लईगे; 7 तिने लोके यहोवे री आज्ञा नि मानी ओर सेयो सारे लोक मिस्र देशो रे तहपन्हेस शईरो तक आईगे।

8 तेबे यहोवे रा ये वचन तहपन्हेसो दे यिर्मयाह गे पऊँचेया, 9 यिर्मयाह, आपणे आथो साथे बड़े पात्थर लओ ओर यहूदा प्रदेशो रे लोका रे देखदे ऊए तिना पात्थरा खे तेसा ईटा रे चबूतरे गे जो तहपन्हेसो रे सामणे फिरौनो रे मईलो रे द्वारो गे ए, चूना फेरी की लकोई दे, 10 ओर तिना यहूदा रे लोका खे बोल, "इस्राएलो रा परमेशर, सेना रा परमेशर यहोवा ईंयाँ बोलोआ: देखो, मां बाबेलो रा राजा आपणा दास नबूकदनेस्सर बुलाणा ओर तेस आपणा सिंहासन इना पात्थरा पाँदे जो मैं लकोई राखे, राखणा ओर आपणा छत्र इना पाँदे तनवाणा। 11 नबूकदनेस्सरो आई की मिस्र देशो खे नाश करने खे तेस पाँदे अमला करना, तेबे जो मरने वाल़े ऊणे सेयो मौता रे वशो दे, जो बन्दी ऊणे वाल़े ओ सेयो गुलामिया रे ओर तलवारी साथे मरने वाल़े ओ, सेयो तलवारी रे वशो रे करे जाणे।*43:11 प्रका. 13:10 12 नबूकदनेस्सरो मिस्रो रे चूठे देवतेया रे मन्दरा दे आग लगवाणी तेस सेयो फूकाई देणे ओर गुलामिया दे लई जाणे ओर जेड़े कोई ग्वाल़े आपणे टाल्लेया की जूंआँ साफ करोए, तेड़ा ई बेबीलोनो रे राजे मिस्र देशो री जमीन साफ करनी ओर फेर जीती की जाणा। 13 नबूकदनेस्सरो मिस्र देशो दे सूरज देवते रे कअरो रे पवित्र पात्थरा रे खम्बे तुड़वाई देणे ओर मिस्रो रे चूठे देवतेया रे मन्दर आग लगाई की फूकाई देणे।"