यिर्मयाह 36

मन्दरो दे बारूको रे जरीये कताबा रा पढ़ना

1 यहोवे रा वचन यिर्मयाह खे मिलेया। ये योशिय्याह रे पाऊ यहूदा प्रदेशो रे राजा यहोयाकीमो रे राज रे चौथे साले ऊआ। यहोवे रा वचन ये था, 2 "एक कताब लई की जितणे वचन मैं योशिय्याह रे राजो रे दिनो ते लई की, मतलब जेबे आऊँ तां साथे गल्ला करने लगेया तेस बखतो ते आजो तक इस्राएल ओर यहूदा ओर सबी जातिया रे बारे दे बोली राखे, तिना सबी सन्देशा खे तिदे लिख। 3 क्या पता यहूदा रा कराना तेसा सारी मुसीबता रा सन्देश सुणी की जो आऊँ तिना पाँदे ल्याऊणे री योजना करने लगी रा, आपणी बुरी चाला ते फिरो ओर आऊँ तिना रे बुरे काम ओर पाप माफ करी देऊँ।" 4 तेबे यिर्मयाहे नेरिय्याह रा पाऊ बारूक बुलाया ओर बारूके यहोवे रे सारे वचन जो तिने यिर्मयाह गे बोले थे, तेसरे मुंए ते सुणी की कताबा दे लिखी ते। 5 तेबे यिर्मयाहे बारूक खे आज्ञा दित्ती, "आऊँ तो बन्दुआ ए, आऊँ परमेशरो रे मन्दरो दे नि जाई सकदा। 6 इजी री खातर आऊँ चाऊँआ कि तूँ बअरतो रे दिने यहोवे रे मन्दरो दे जाई की तेसरे जो वचन तैं सुणी की लिखी राखे, सेओ वचन कताबा बीचा ते पढ़ी की लोका गे सुनाणे ओर जितणे यहूदी लोक आपणे-आपणे शईरो ते आओगे, तिना गे बी पढ़ी की सुनाणे। 7 क्या पता सेयो यहोवे गे गिड़गिड़ाई की प्रार्थना करो ओर आपणी-आपणी बुरी चाला ते फिरो, कऊँकि जो रोष ओर जल़न यहोवे आपणी एसा प्रजा पाँदे पड़काणे खे बोली राखेया, से बड़ी ए।" 8 यिर्मयाह भविष्यबक्ते री एसा आज्ञा रे मुताबिक नेरिय्याह रे पाऊ बारूके, यहोवे रे मन्दरो दे तेसा कताबा बीचा ते तेसरे वचन पढ़ी की सुणाए। 9 योशिय्याह रे पाऊ यहूदा रे राजा यहोयाकीमो रे राज रे पाँजुए सालो रे नऊए मीन्ने दे यरूशलेम शईरो दे जितणे लोक थे ओर यहूदा रे शईरो ते जितणे लोक यरूशलेम शईरो दे आए थे, तिने परमेशरो सामणे बअरत लणे रा प्रचार कित्तेया। 10 तेबे बारूके यहोवे रे मन्दरो रे सबी लोका खे शापानो रे पाऊ गमर्याह जो परदान था, तेसरे कमरे दे जो पाँदले आँगणो दे यहोवे रे मन्दरो रे नये बड़े द्वारो रे नेड़े था, यिर्मयाह रे सारे वचन कताबा बीचा ते पढ़ी की यहोवे रे मन्दरो दे सबी लोका खे सुणाए।

राजमईलो दे कताबा रा पढ़ना

11 मीकायाह नाओ रे एक आदमिए यहोवे रे सेओ सारे वचन सुणे जो बारूके कताबा बीचा ते पढ़े थे, मीकायाह तेस गमर्याह रा पाऊ था जो शापानो रा पाऊ था। 12 ओर से राजमईलो रे परदानो रे कमरे दे उतरी गा ओर तिने देखेया कि तेती एलीशामा परदान ओर शमायाह रा पाऊ दलायाह ओर अकबोरो रा पाऊ एलनातान ओर शापानो रा पाऊ गमर्याह ओर हनन्याह रा पाऊ सिदकिय्याह ओर सारे परदान बैठी रे। 13 मीकायाहे जितणे वचन तेस बखते सुणे, जेबे बारूके कताबा बीचा ते पढ़ी की लोका खे सुणाए थे, सेयो सारे बताए। 14 तिना खे सुणी की सबी परदाने यहूदिया खे जो नतन्याह रा पाऊ ओर शेलेम्याह रा पोता ओर कूशीए रा पड़पोता था, बारूको गे ये बोलणे खे पेजेया, "जेसा कताबा बीचा ते तैं सबी लोका खे पढ़ी की सुणाया, तेसा खे आपणे आथो दे लई की आओ।" तेबे नेरिय्याह रा पाऊ बारूक तेसा कताबा खे आथो दे लई की यहूदिया साथे अधिकारिया गे आया। 15 तेबे तिने अधिकारिए बारूको खे बोलेया, "एबे बैठी जा ओर आसा खे ये पढ़ी की सुणा।" तेबे बारूके तिना खे पढ़ी की सुणाया। 16 जेबे सेयो तिना सबी वचना खे सुणी चुके, तेबे थरथरांदे ऊए एकी-दूजे खे देखणे लगे ओर तिने बारूको खे बोलेया, "आसा जरूर राजे गे इना सबी वचना रे बारे दे बताणा।" 17 तेबे अधिकारिए बारूको खे बोलेया, "आसा गे बोल, बारूक ए बता कि तैं यो सारे वचन तेसरे मुंए ते सुणी की लिखे?" 18 बारूके तिना खे बोलेया, "से इना वचना खे आपणे मुंए ते मांगे सुणांदा गया ओर आऊँ इना खे कताबा दे स्याईया साथे लिखदा गया।" 19 तेबे परदाने बारूको खे बोलेया, "जा, तूँ ओर यिर्मयाह दोनो लूकी जाओ ओर केसी खे बी पता नि लगो कि तुसे केयी ए।"

कताबा खे फूकी देणा

20 तेबे अधिकारी कताबा खे एलीशामा परदानो रे कमरे दे राखी की राजे गे आँगणो दे आए ओर राजे गे सेयो सारे वचन सुणाए। 21 तेबे राजे यहूदी कताब ल्याऊणे खे पेजेया, तिने से एलीशामा परदानो रे कमरे ते लई की राजे खे ओर जो परदान राजे रे नेड़े-तेड़े खड़ी रे थे तिना खे बी पढ़ी की सुणाया। 22 राजा नऊए मीन्ने री ठण्डी रे बखतो दे, एकी कमरे दे रओ था जेती से ठण्डी रे बखते रओ था ओर काम करो था। तेस सामणे आगी री गीठी बल़ी री थी। 23 तेबे यहूदी तीन-चार बरके पढ़ी चुकेया, तेबे तिने से चाकुए साथे फाड़ी ओर जो आग गीठिया दे थी तिदे सेटी ती, ईंयाँ गीठिया री आगी की पूरी कताब फूखी की स्वा ऊईगी। 24 पर ना कोई डरेया ओर ना ई किने आपणे दु:खो रिया बजा ते टाल्ले फाड़े, मतलब ना तो राजे ओर ना तेसरे नौकरा बीचा ते किने एड़ा कित्तेया, जिने सेयो सारे वचन सुणे थे। 25 तेबे एलनातान, दलायाह ओर गमर्याहे तो राजे ते प्रार्थना बी कित्ती थी कि कताबा खे नि फूको, पर तिने तिना री एक नि सुणी। 26 तेबे राजे राजकुमार यरहमेलो खे, ओर अज्रीएलो रे पाऊ सरायाह ओर अब्देलो रे पाऊ शेलेम्याह खे, माखे ओर मेरे लिखणे वाल़े बारूको खे कैद करने री आज्ञा दित्ती। पर यहोवे आसे लकोई की राखे।

यिर्मयाह रे जरीये कताबा रा दुबारा लिखेया जाणा

27 जेबे राजा यहोयाकीमे तिना वचना री कताब जो बारूके यिर्मयाह रे मुंए ते सुणी-सुणी की लिखी थी, फूकी ती, तेबे यहोवे रा ये वचन यिर्मयाह गे पऊँचेया, 28 ओ यिर्मयाह, "फेर एक ओर कताब लई की तिदे यहूदा रे राजा यहोयाकीमो री फूकी री पईलकी कताबा रे सारे वचन लिखी दे, 29 ओर यहूदा रे राजा यहोयाकीमो रे बारे बोल, यहोवा ईंयाँ बोलोआ, तैं से कताब ये बोली की फूकी ती री कि तैं तिदे ये कऊँ लिखी राखेया कि बाबेलो रे राजे पक्का आई की ये यहूदा प्रदेश नाश करी देणा ओर तेस तिदे ना तो कोई माणूं छाडणा ओर ना कोई डांगर छाडणा।" 30 इजी री खातर यहोवा यहूदा रे राजा यहोयाकीमो रे बारे दे ईंयाँ बोलोआ कि तेसरे वंशो बीचा ते कोई बी दाऊदो री गद्दिया पाँदे नि बैठणा ओर यहोयाकीमो री लाश एड़ी सेटी देणी कि दिने तूपा दे ओर राती पाल़े दे पड़ी दी रणी। 31 मां यहोवे यहोयाकीम ओर तेसरे वंशो खे ओर तेसरे अधिकारिया खे तिना रे पापो री सजा देणी ओर जितणी मुसीबत मैं तिना पाँदे, यरूशलेम शईरो दे रणे वाल़ेया पाँदे ओर यहूदा रे सबी लोका पाँदे ल्याऊणे खे बोलेया था ओर जो तिने सच्च नि मानी, सेयो सब मां तिना पाँदे ल्याऊणिया। 32 तेबे यिर्मयाहे दूजी कताब लई की नेरिय्याह रे पाऊ बारूक लिखणे वाल़े गे दित्ती ओर जो कताब यहूदा रे राजे यहोयाकीमे आगी दे फूकी ती थी, तेतेरे सारे वचन बारूके यिर्मयाहो रे मुंए ते सुणी-सुणी की तिदे लिखी ते ओर तिना वचना रे तिना जेड़िया ओर बी बऊत सारिया गल्ला बढ़ाई तिया।