यिर्मयाह 50

बाबेलो रे बारे दे भविष्यबाणी

1 बाबेलो रे शईर ओर बेबीलोनिया री जमीना रे बारे दे परमेशरे यिर्मयाह भविष्यबक्ते रे जरीये ये वचन बोलेया, 2 "जातिया बीचे प्रचार करो, सुणाओ ओर चण्डा खड़ा करो, सुणाओ, छुपाओ नि कि बाबेल लई ला, बेल देवते रा मूँ काल़ा ऊईगा, मरोदक देवता हैरान ऊईगा, बाबेलो रिया मूर्तिया शर्मिंदा ऊईगिया ओर सेयो बेजान मूर्तिया नाश ऊईगिया। 3 कऊँकि उत्तर दिशा ते एकी जातिया बाबेलो पाँदे अमला करी की से देश एड़ा उजाड़ी देणा कि तिदे डांगर, माणूं कोई नि रणे, सारे नठी जाणे।" 4 यहोवा ईंयाँ बोलोआ, "आऊणे वाल़े दिना दे जेबे यो गल्ला बितणिया, इस्राएली ओर यहूदा रे लोक कट्ठे ऊई की आपणे देशो खे वापस आऊणे, सेयो रोंदे ऊए आपणे परमेशर यहोवे खे टोल़दे ऊए आऊणे। 5 तिना यरूशलेम शईरो रिया तरफा खे मूँ करी की तेसरी बाट पूछदे ऊए ओर आपू बीचे ये बोलदे ऊए आऊणे, ‘आओ आसे यहोवे साथे मेल करी लऊँए, तेस साथे एड़ी वाचा बानूँए जो कदी पूलो नि, पर सदा बणी री रओ।’ 6 मेरी प्रजा राची रिया पेडा ए, तिना रे चराणे वाल़ेया सेयो रचायी तिया ओर पाह्ड़ो पाँदे रचायी राखिया, सेयो पाह्ड़ ओर पाह्ड़िया दे कूमदे-कूमदे आपणे बैठणे री जगा पूली गी रिया।*50:6 मत्ती 10:6 7 जितणेया खे सेयो मिलिया सेयो तिना पाँदे अमला कित्तेया ओर तिना खे सताणे वाल़ेया बोलेया, ‘इदे म्हारा कोई दोष नि ए, कऊँकि तिने यहोवे रे खलाफ पाप करी राखेया, जो तर्मो रा आधार ए ओर तिना रे बुजुर्गा रा आसरा था।’ 8 बाबेलो ते नठो, कसदिया रे देशो ते निकल़ी जाओ। जिंयाँ बाकरे आपणे चूण्डो दे आगे चलोए, तेड़े ई बणो। 9 कऊँकि देखो, मां उत्तर देशो ते तागतबर सेना बाबेलो पाँदे चढ़ाई की ल्याऊणी ओर तिना बाबेलो रे खलाफ चढ़ाई करनी ओर से तेसा दिशा ते ई लया जाणा। तिना रे तीर चलाक सिपाईया जेड़े ऊणे, तिना बीचा ते कोई बिना बजा ते नि जाणा। 10 कसदिया रा देश एड़ा लूटणा कि सबी लुटणे वाल़ेया रा पेट परी जाऊणा, यहोवे री येई बाणी ए।"

बेबीलोनो रा नाश

11 यहोवा बोलोआ, "ओ मेरे चूणे रे लोका खे लुटणे वाल़ेयो, तुसे जो मेरी‍ प्रजा पाँदे खुशी मनाओए ओर काआ चरने वाल़ी बाच्छिया जेड़े उटकोए ओर जवान कोड़े जेड़े हिनहिनाओ ए। 12 पर तुसा रे लोक चट ई शर्मिंदा ऊणे ओर तिना रा मूँ काल़ा ऊणा। कऊँकि से सबी जातिया बीचे नीच ऊणी, तुसा रा देश जंगल़, रेगिस्तान ओर ऊजड़ देश ऊई जाणा।" 13 यहोवे रे रोषो रिया बजा ते, तुसा रा देश बिल्कुल उजाड़ रणा, जो कोई बाबेलो रिये चलोगा से हैरान ऊणा ओर तेथो रा सारा दु:ख देखी की चाड़िया बजाणियां। 14 ओ सब धनुष चलाणे वाल़ेयो, बाबेलो रे चऊँ कनारे अमला करो, तेते पाँदे तीर चलाओ, तिना खे नि छाडो, कऊँकि बाबेलो रे लोके यहोवे रे खलाफ पाप करी राखेया। 15 चऊँ कनारा ते बेबीलोनो खे ललकारो, तिने आर मानी, तेथो रे सिपाईए आपणी आर मानी ली, तिना री दवाल टाल़ी ती, कऊँकि यहोवा तिना ते बदला लणे वाल़ा ए, इजी री खातर तुसे बी तेसते आपणा-आपणा बदला लओ, जेड़ा तिने करी राखेया, तेड़ा ई तुसे तेथो रे लोका साथे करो।*50:15 प्रका. 18:6 16 बाबेलो दे बिऊ बाणे वाल़े ओर बाडणे वाल़ेया दुँईं खे नाश करो, तेती रणे वाल़े सब परदेशी दु:ख देणे वाल़ी तलवारी रे डरो रे मारे आपणे-आपणे लोका रिया तरफा खे फिरो ओर आपणे-आपणे देशो खे नठी जाओ। 17 इस्राएल नठाई री पेड ए, शेरे से नठाईती री। पईले तो से अश्शूरो रे राजे खाई ओर तेबे बाबेलो रे राजा नबूकदनेस्सरे तेसा री आड्डिया तोड़ी तिया। 18 इजी बजा ते इस्राएलो रा परमेशर, सेना रा परमेशर यहोवा ईंयाँ बोलोआ, "देखो, जेड़ा मैं अश्शूरो रे राजे खे सजा दित्ती थी, तेड़ी ई एबे बाबेल देशो खे तेसरे राजे समेत सजा देणी। 19 मां इस्राएल तेसरी आपणी जमीना रे वापस ल्याऊणा ओर तेस कर्मेल पाह्ड़ ओर बाशान इलाके दे फेर रोटिया खाणिया ओर एप्रैमो रे पाह्ड़ो पाँदे ओर गिलादो री जगा दे फेर पेट परी की खाणा।"

20 यहोवा ईंयाँ बोलोआ, "आऊणे वाल़े दिना दे जेबे यो गल्ला बितणिया, यहूदा ओर इस्राएलो रा पाप टोल़ी की पनि मिलणा, कऊँकि जो मां बचाणे, मां तिना रे पाप बी माफ करी देणे।"

परमेशरो रे जरीये बाबेलो रा न्याय

21 इजी री खातर आऊँ यहोवा, बेबीलोनो रे दुश्मणा खे बोलूँआ कि तुसे मरातैम*50:21 मरातैम कऊड़ी नदिया री जमीन देश ओर पकोद शईरो दे रणे वाल़ेया पाँदे अमला करो। माणूंआ खे तो काईदे ओर तअनो रा नाश कर ओर जो-जो आज्ञा आऊँ ताखे देऊँआ, तिना सबी रे मुताबिक कर। 22 सुणो, तेस देशो रे युद्ध ओर सत्यानाशो री जी आवाज ऊणे लगी री। 23 बेबीलोनो री सेना जो पूरी तरतिया पाँदे मजबूत थौड़े जेड़ी ए, से केड़ी नाश करी राखी! बाबेल सबी जातिया बीचे केड़ा उजाड़ ऊईगा रा! 24 ओ बाबेलो रे लोको, मैं तुसा खे फन्दा लगाई राखेया ओर तुसे अणजाणे रे तिदे फसी बी गये, तुसे टोल़ी की पकड़ी राखे, कऊँकि तुसे यहोवे रा बिरोद करो थे। 25 परमेशरे, सेना रे यहोवे आपणे शस्त्रो रा कअर खोली की, आपणे रोष पड़काणे रा समान निकयाल़ी राखेया, कऊँकि सेना रे परमेशर यहोवे खे कसदिया रे देशो दे एक काम करना ए। 26 इजी री खातर बेबीलोनो रे दुश्मणो तुसे तरतिया रे कूणे ते आओ ओर अमला करो, तेतेरे नज्जो रे पण्डार तोड़ी की टाल़ी देयो, तेतेखे एड़ा नाश करो कि तिदे कुछ पनि बचो। 27 तेथो रे सारे बल़दा*50:27 बल़दा सिपाईया रा नाश करो, सेयो मरने री जगा रे उतरी जाओ। तिना पाँदे लाणत ए! कऊँकि तिना खे सजा देणे रा दिन आई गा रा। 28 सुणो, बाबेलो रे देशो ते नठणे री जी आवाज सुणोई, जो सिय्योनो रे ये सन्देश देणे खे दौड़ी की आऊणे लगी रे कि म्हारा परमेशर यहोवा आपणे मन्दरो रा बदला लणे लगी रा। 29 सबी धनुष चलाणे वाल़ेया खे बाबेलो रे खलाफ कट्ठा करो, तेती चऊँ कनारे डेरे लगाओ, कोई माणूं नठी की नि निकल़ी सको, तिना रे कामो रा बदला तिना खे देयो, जेड़ा तिने करी राखेया, ठीक तेड़ा ई बाबेलो रे लोका साथे करो, कऊँकि सेयो इस्राएलो रे पवित्र यहोवे रे खलाफ खड़े ऊए।*50:29 प्रका. 18:6 30 इजी बजा ते बेबीलोनो रे कमण्डी सिपाई सड़का दे सेटी राखे ओर सबी सिपाईया रा बोल बन्द ऊई जाणा, यहोवे री येई बाणी ए। 31 परमेशर यहोवा सेना रे यहोवे री ये बाणी ए कि ओ कमण्डी, आऊँ तेरे खलाफ ए, ताखे सजा देणे रा दिन आई गा रा। 32 कमण्डी ठोकर खाई की रूड़ी जाणा ओर मां तेसरे शईरो रे आग लगाणी, जेते कि तेतेरे चऊँ कनारे सब कुछ स्वा ऊई जाणा। 33 सेना रा परमेशर यहोवा ईंयाँ बोलोआ, "इस्राएल ओर यहूदा दोनो बराबर पीसी रे ओर जितणेया सेयो गुलाम करी राखे, सेयो तिना खे पकड़ी राखोए ओर जाणे नि देंदे, 34 इस्राएली ओर यहूदी लोका खे बचाणे वाल़ा सामर्थी ए, सेना रा परमेशर यहोवा, येई तेसरा नाओं ए। तेस तिना रा मुकद्दमा ठीक-टंगो रे लड़ना, ताकि तरतिया खे चैन देयो, पर बाबेलो रे रणे वाल़ेया खे बेचैन करो।*50:34 प्रका. 18:8 35 यहोवा ईंयाँ बोलोआ कि कसदी, बाबेलो रे परदान ओर पुरोईता सबी रणे वाल़ेया पाँदे तलवार चलणी। 36 चूठी भविष्यबाणी करने वाल़ेया पाँदे तलवार चलणी ओर सेयो मूर्ख बणने, तिना रे सिपाईया पाँदे बी तलवार चलणी ओर सेयो डरी जाणे। 37 तिना रे कोड़ेया रे सवार, रथ चलाणे वाल़े ओर सबी मिले रे लोका पाँदे बी तलवार चलणी ओर सेयो कमजोर जवाणसा जेड़े बणी जाणे। तिना रे पण्डारा पाँदे तलवार चलणी ओर सेयो लूटी जाणे। 38 तिना रे तलाब सूकी जाणे, कऊँकि सेयो कअड़ी री मूर्तिया साथे फरेया रा देश ए ओर सेयो आपणी डराऊणी मूर्तिया पाँदे इस्साल ऊईगे रे।*50:38 प्रका. 16:12 39 इजी री खातर रेगिस्तान देशो रे जानवर बणो रे कुत्तेया साथे मिली की तेती बसणे ओर शुतुरमुर्ग तेती रणे ओर से फेर सदा तक बसणा नि, ना युगो-युगो तक तेती केसी रणा।*50:39 प्रका. 18:2 40 यहोवे री ये बाणी ए कि सदोम, गमोरा ओर तिना रे नेड़े-तेड़े रे शईरो री जेड़ी दशा तेस बखते ऊई थी, जेबे यहोवे सेयो नाश कित्ते थे, तेड़ी ई दशा बाबेलो री बी ऊणी, एथो तक की कोई माणूं तिदे नि रयी सकणा ओर ना फेर कोई माणूं तिदे टिकणा। 41 सुणो, उत्तर दिशा ते एक देशो रे लोक आओए ओर तरतिया रे कूणे ते एक बड़ी जाति ओर बऊत सारे राजेया उठी की अमला करना। 42 तिने धनुष ओर बड़छे पकड़ी राखे, सेयो दुष्ट ओर निर्दयी ए, सेयो समुद्रो जेड़े गरजणे ओर कोड़ेया पाँदे चढ़ी की बाबेलो रे खलाफ पाँति बानी की युद्ध करने वाल़ेया जेड़े आऊणे। 43 तिना दुश्मणा रा सन्देश सुणदे ई बाबेलो रे राजे रे आथ-पैर टीले पड़ी गे ओर तेसखे बच्चा पैदा करने वाल़ी जवाणसा जेड़िया पीड़ा उठिया। 44 सुणो, से शेरो जेड़ा आऊणा, जो यरदन नदिया रे नेड़े-तेड़े रे जंगल़ो ते निकल़ी की मजबूत पेडा री गवाईणी रे चढ़ना, पर मां सेयो तेस सामणे ते फटाफट नठाई देणियां, तेबे जेसखे आऊँ चूणी लऊँगा, से ई तिना पाँदे अधिकारी ठराणा। देखो, मां जेड़ा कुण ए? मां पाँदे केस मुकद्दमा चलाणा? से ग्वाल़ा केयी ए जो मेरा सामणा करी सकोआ? 45 इजी री खातर सुणो कि यहोवे बाबेलो रे खलाफ क्या योजना करी राखी ओर कसदिया रे देशो रे खलाफ क्या योजना करी राखी, तेस पक्का पेडा-बाकरिया रे बच्चे खींजी की लई जाणे, तेस से देश तेथो रे माणूंआ ते खाली करी देणा। 46 बाबेलो रे लुटणे री आवाजा ते तरती थरथराई गी ओर तेथो रा चींगणा जातिया बीचे सुणने लगी रा।"