1 यिर्मयाह खे यहोवे रा एक सन्देश मिलेया। ये सन्देश मिस्रो दे रणे वाल़े सारे लोका रिया तँईं था ये सन्देश यहूदा रे तिना लोका रिया तँईं था जो मिग्दोल, तहपन्हेस ओर नोप शईरा ओर पत्रोस देशो रे दखणा रे इस्से दे रओ थे, सन्देश ये था, 2 "इस्राएलो रा परमेशर, सेना रा परमेशर यहोवा ईंयाँ बोलोआ: जो मुसीबत आऊँ यरूशलेम ओर यहूदा प्रदेशो रे ओरी सबी शईरा दे ल्याई चुकेया रा, से तुसे सबी लोके देखी राखी। देखो, सेयो आजो तक केड़े ऊजड़ ओर रेगिस्तान ए। 3 कऊँकि यहूदा रे लोक जो तेती रओ थे तिने से बुराई कित्ती जेते कि तिने माखे रोष चढ़ाया था, सेयो जाई की दूजे देवतेया खे तूप बाल़ो थे ओर तिना री आराधना करो थे, जिना खे ना तो तुसे ओर ना तुसा रे बुजुर्ग जाणो थे। 4 तेबे बी आऊँ आपणे दास भविष्यबक्तेया खे तुसा गे ये बोलणे खे पेजदा रया कि बुरे काम नि करो, जिना ते माखे नफरत ए। 5 पर मेरे लोके नबिया री एक नि सुणी ओर ना मेरी तरफा खे कान लगाया कि आपणी बुराईया ते फिरो ओर दूजे देवतेया खे बलि चढ़ाणा बन्द करो। 6 इजी बजा ते मेरी जल़न ओर रोषो री आग यहूदा रे शईर ओर यरूशलेम शईरो री सड़का पाँदे पड़की गी ओर सेयो आजके दिनो तक ऊजड़ ओर सुनसाण ए।"

7 एबे यहोवा, सेना रा परमेशर, जो इस्राएलो रा परमेशर ए, ईंयाँ बोलोआ: तुसे लोक आपणा इतणा बड़ा नुकशाण कऊँ करने लगी रे कि क्या मर्द, क्या जवाणस, क्या बाल़क, क्या दूद पींदा बच्चा, तुसा सबी खे यहूदा बीचा ते नाश करी देयो ओर कोई नि रओ? 8 कऊँकि एस मिस्र देशो दे जेती तुसे परदेशी ऊई की रणे आई रे, तुसे आपणे कामो रे जरीये, मतलब दूजे देवतेया खे तूप बाल़ी की माखे रोष चढ़ाओए जेते कि तुसे नाश ऊई जाणे ओर पूरी तरतिया री जातिया रे लोका तुसा री जातिया री बेज्जती करनी ओर तुसा रा उदारण देई की स्राप देया करना। 9 क्या तुसे तिना बुरे कामा खे पूली गे रे जो तुसा रे बुजुर्गे करी राखे, यहूदा रे राजेया ओर तिना री लाड़िए कित्ते? क्या तुसे तिना बुरे कामा खे पूली गे रे जो तुसे ओर तुसा री लाड़िए यहूदा देश ओर यरूशलेम शईरो री सड़का दे करी राखे? 10 आजके दिनो तक तिना रा मन चूर नि ऊआ ओर ना सेयो डरदे ओर मेरे तेस बिधान ओर तिना बिधिया पाँदे चलदे जो मैं तुसा रे बुजुर्ग ओर तुसा खे बी सुणाई राखिया। 11 इजी बजा ते इस्राएलो रा परमेशर, सेना रा यहोवा ईंयाँ बोलोआ, "देखो, मां तुसा रे खलाफ ऊई की तुसा रा नुकशाण करना, मां यहूदिया रे पूरे परिवारो रा अन्त विपत्तिया साथे करी देणा। 12 बचे रे यहूदी जो हठ करी की मिस्र देशो दे आई की रणे लगी रे, सेयो सारे नाश ऊई जाणे, एते मिस्र देशो रे छोटे ते लई की बड़े लोका तक सेओ तलवार ओर अकाल़ पड़ने रिया बजा ते मरी की नाश ऊई जाणे ओर लोका सेयो कोसणे ओर हैरान ऊणे ओर तिना रा उदारण देई की स्राप देया करना ओर बेजती बी करेया करनी। 13 जिंयाँ मैं यरूशलेम शईरो खे लड़ाईया री तलवार, अकाल़ ओर बमारिया रे जरीये सजा दित्ती, तिंयाँ ई मिस्र देशो रे रणे वाल़ेया खे बी सजा देणी। 14 ताकि जो बचे रे यहूदी मिस्र देशो दे परदेशी ऊई की रणे खे आई रे, तेबे बी सेयो यहूदा प्रदेशो दे रणे खे बड़ी इच्छा राखोए, तेबे बी तिना बीचा ते एक बी बची की तेती वापस नि ऊई सकणा, बस थोड़े ई नठे रेया खे छाडी की कोई बी वापस नि ऊई सकणा।"

15 तेबे मिस्र देशो रे पत्रोस शईरो दे रणे वाल़े जितणे लोक जाणो थे कि तिना री जवाणसा दूजे देवतेया खे तूप बाल़ोईया ओर जितणिया जवाणसा बड़ी मण्डल़िया गे खड़ी रिया थिया, तिने सबी यिर्मयाह खे ज्वाब दित्तेया, 16 ओ यिर्मयाह, "जो वचन तैं आसा खे यहोवे रे नाओं ते सुणाई राखेया, आसे तेते पाँदे कोई त्यान नि दित्तेया। 17 जो-जो मान्नता आसे मानी चूकी रे, सेयो आसा पक्का पुरिया करनिया, आसा री देवी स्वर्गो री राणियां खे तूप बाल़ना ओर अर्घ देणा, जेड़े कि म्हारे बुजुर्ग ओर आसे बी आपणे राजेया ओर बाकी परदाना समेत यहूदा रे शईरो दे ओर यरूशलेम शईरो रिया सड़का दे करुँ थे; कऊँकि तेस बखते आसे पेट परी की खाऊँ थे ओर ठीक रऊँ थे ओर केसी मुसीबता दे नि पड़ूँ थे।* 18 पर जदुओ ते आसे स्वर्गो री राणियां खे तूप बाल़ना ओर अर्घ देणा छाडीता, तदुओ ते आसा खे सारिया चीजा री कमी ए ओर आसे तलवार ओर अकाल़ो दे पड़ी की नाश ऊणे लगी रे।" 19 तेबे तिने जवाणसे ईंयाँ बी बोलेया, "जेबे आसे स्वर्गो री राणियां खे तूप बाल़ूँ थिया ओर गोल़ रोटिया बणाई की ओर अर्घ देऊँ थिया, तेबे आपणे-आपणे लाड़े रे बिना जाणे एड़ा नि करुँ थिया।" 20 यिर्मयाहे तिना सारी जवाणसा ओर मर्दा साथे गल्ला कित्तिया, जिने तेसखे से ज्वाब दित्तेया था। 21 तुसा रे बुजुर्ग ओर तुसे जो आपणे राजेया, परदान ओर लोका समेत यहूदा प्रदेशो रे शईर ओर यरूशलेम शईरो रिया सड़का दे तूप बाल़ो थे, से सब यहोवे देखी राखेया। 22 यहोवे खे से याद ए। इजी री खातर जेबे यहोवा तुसा रे बुरे ओर घृणित कामो खे ओर जादा सईन नि करी सकेया, तेबे तुसा रा देश ऊजड़ी की रेगिस्तान ओर सुनसाण ऊईगा, एथो तक कि लोक तेतेरा उदारण देई की स्राप देया करोए, जेड़ा कि आज ओआ। 23 कऊँकि तुसे तूप बाल़ी की यहोवे रे खलाफ पाप करो थे ओर तेसरी नि सुणो थे ओर तेसरा बिधान, बिधिया ओर चतौणिया रे मुताबिक नि चले, इजी बजा ते ये मुसीबत तुसा पाँदे पड़ी री, जेड़ा कि आज ए।

24 तेबे यिर्मयाहे तिना सबी लोका खे ओर तिना सबी जवाणसा खे फेर बोलेया, "ओ सारे मिस्र देशो रे रणे वाल़े यहूदियो, यहोवे रा वचन सुणो!" 25 इस्राएलो रा परमेशर, सेना रा यहोवा ईंयाँ बोलोआ, "तुसे ओर तुसा री लाड़िए बोली राखेया, आसा स्वर्गो री राणिया खे तूप बाल़ने ओर अर्घ देणे रिया जो-जो मान्नता मानी राखिया, सेयो आसा जरूर पुरिया करनिया ओर तुसे आपणे कामा रे जरीये बताई बी दित्तेया ए कि तुसे सच्चो खे एड़ा ई करोए। तो तुसे आगे बढ़ो ओर तेसते कित्ते रे आपणे वादे ओर मान्नता खे पूरा करो।" 26 पर ओ मिस्र देशो रे रणे वाल़े सारे यहूदियो, यहोवे रा वचन सुणो! सुणो, मैं आपणे बड़े नाओं री कसम खाई राखी कि एबे पूरे मिस्र देशो रे केसी यहूदिये मेरा नाओं लई की ये नि बोली सकणा, परमेशर यहोवे री जिन्दगिया री कसम। 27 सुणो, एबे मां तिना री पलाईया री नि, बल्कि तिना रे नुकशाणो री फिकर करनी, यहूदा रा हर एक माणूं जो एबे मिस्र देशो दे रणे लगी रा लड़ाईया री तलवार ओर अकाल़ो दे पड़ी की नाश ऊई जाणे, जदुओ तक कि सेयो पूरी तरअ ते नाश नि ऊई जाओ। 28 जो मौता ते बची की ओर मिस्र देशो ते वापस ऊई की यहूदा प्रदेशो दे पऊँचणे, सेयो थोड़े ई ऊणे ओर मिस्र देशो दे रणे खे आए दे सारे यहूदिया बीचा ते जो तलवारी ते बची जाणे, तिना खे पता लगी जाणा कि केसरा वचन पूरा ऊआ, मेरा या तिना रा। 29 एते गल्ला रा मां ये नशाण देणा कि यहोवे री ये बाणी ए कि मां तुसा खे मिस्रो देई सजा देणी, जेते कि तुसा खे पता लगी जाणा कि तुसा रा नुकशाण करने खे जो मैं बोली राखेया से जरूर पूरा करना। 30 यहोवा ईंयाँ बोलोआ, "देखो, जेड़ा मैं यहूदा प्रदेशो रे राजा सिदकिय्याह खे तेसरे दुश्मण, मतलब तेसखे काणे री टोल़ा रे लगे दे बाबेलो रे राजा नबूकदनेस्सरो रे आथो दे करी ता तिंयाँ ई मां मिस्रो रा राजा फिरौन होप्रा बी तेसरे दुश्मणा रे आथो दे, मतलब तेसखे काणे री टोल़ा रे लगे दे दुश्मणो रे आथो दे करी देणा।"