1 यहोवे रा ये एक ओर वचन यिर्मयाह गे पऊँचेया 2 "यिर्मयाह एसा वाचा रे वचनो खे सुणो ओर यरूशलेम शईरो रे लोक ओर यहूदा शईरो दे रणे वाल़े सबी लोका खे बोलो। 3 तिना खे बोलो कि इस्राएलो रा परमेशर यहोवा ईंयाँ बोलोआ, कि से माणूं स्रापित ए, जो एसा वाचा रे वचनो खे नि मानो 4 जो मैं तुसा रे बुजुर्गा साथे मिस्र देश जो तिना खे पड़की दी भट्टिया जेड़े ए, मतलब मिस्र देशो ते निकल़ने रे बखते, ये बोली की बानी थी, मेरी सुणो ओर जितणी आज्ञा आऊँ तुसा खे देऊँआ, तिना सबी खे मानो। इजी ते तुसे मेरी प्रजा ठईरने ओर आऊँ तुसा रा परमेशर ठईरना। 5 एबे इना लोका खे बता कि जे तुसे इना गल्ला खे मानोगे तो जो कसम मैं तुसा रे पितरा ते खाई थी कि जेते देशो दे दूद ओर सयीतो रिया खाड्डा बह्ओईया,* से मां तुसा खे देणा, से मां पूरी करनी ओर देखो से पूरी ऊई री।" ये सुणी की मैं बोलेया, "ओ यहोवा, आमीन्।" 6 तेबे यहोवे माखे बोलेया, "ये वचन यहूदा रे शईरो रे ओर यरूशलेम शईरो री सड़का रे प्रचार करी की बोलो कि एसा वाचा रे वचन सुणो ओर तिजी रे मुताबिक चलो। 7 कऊँकि जेस बखतो ते आऊँ तुसा रे बुजुर्गा खे मिस्र देशो ते छुड़ाई की ल्याया, तदुओ ते आजके दिनो तक तिना खे आऊँ सख्ताईया साथे सावधान करदा आई रा, मेरी गल्ल सुणो। 8 पर तुसा रे बुजुर्गे मेरी गल्ल नि सुणी ओर ना मेरी गल्ला पाँदे कान लगाया, पर आपणे-आपणे बुरे टीठ मनो पाँदे चलदे रये। इजी री खातर मैं तिना रे बारे दे एसा वाचा री सब गल्ला पुरिया करी राखिया, जिना खे मानणे री मैं तिना खे आज्ञा दित्ती थी पर तिने मानी नि।" 9 तेबे यहोवे माखे बोलेया, "यिर्मयाह, आऊँ जाणूंआ कि यहूदी लोक ओर यरूशलेम शईरो रे रणे वाल़ेया बीचे बिरोद ऊई रा। 10 तिना रे बुजुर्ग तेड़े ई पाप करेया करोए जेड़े तिना रे बुजुर्गे कित्ते थे। तिना रे बुजुर्ग मेरे वचन सुणने ते ना करो थे, तेड़े ई यो बी तिना रे पापो पीछे चली की दूजे देवतेया पीछे चले ओर तिना री आराधना करोए, इस्राएल ओर यहूदा रे कराने से वाचा जो मैं तिना रे बुजुर्गा साथे बानी थी, तोड़ी ती री।" 11 इजी री खातर यहोवा ईंयाँ बोलोआ, "देख, आऊँ इना पाँदे एड़ी मुसीबत पाणे वाल़ा ए, जेते कि यो बची नि सकदे ओर चाए यो मेरी दुहाई देयोगे बी, तेबे बी मां इना री नि सुणनी। 12 तेस बखते यहूदा ओर यरूशलेम शईरो रे शईरो रे रणे वाल़ेया तिना देवतेया री दुहाई देणी, जिना रिया तँईं सेयो तूप बाल़ो थे, पर सेयो तिना री मुसीबता रे बखते तिना खे कदी बी बचायी नि सकदे।" 13 ओ यहूदा रे लोको, जितणे तेरे शईर ए तिथणे ई तेरे देवता बीए ओर यरूशलेम शईरो रे रणे वाल़ेया हर एक सड़का रे तेस बेशर्म बाल देवते रिया बेदिया बणाई-बणाई की तेसरिया तँईं तूप बाल़ेया। 14 इजी री खातर ओ यिर्मयाह, तूँ मेरी एसा प्रजा रिया तँईं प्रार्थना नि करेया, ना ई कोई इना लोका रिया तँईं जोरे की बिनती करो, कऊँकि जेस बखते यो आपणी मुसीबता रे मारे मेरी दुहाई देयोगे, तेबे मां इना री नि सुणनी।

15 तेबे यहोवे बोलेया, "यहूदा रे लोका खे जिना खे आऊँ प्यार करूँआ, तिना खे मेरे मन्दरो रे आऊणे रा कोई अक्क नि ए। तिने तो बऊता साथे बुरे काम कित्ते ओर तेरी पवित्रता पूरी तरअ ते चली गी। जेबे तुसे बुराई करोए, तेबे तुसे खुश ऊई जाओए।* 16 यहोवे तुसा खे अरा, सुन्दर ओर अच्छे फल वाल़ा जैतून तो बोलेया था, पर मां एबे तेती तुसा रे खलाफ तुसा रे दुश्मण पेजणे ओर तिना तुसा रिया डाल़िया तोड़ी देणियां ओर तुसा रे शईर तिना आगी साथे फूकी की नाश करी देणे। 17 सेना रा यहोवा जिने तुसे डाल़ा जेड़े लगाए, तिने तुसा पाँदे मुसीबत पाणे खे बोली राखेया, इजी री बजा इस्राएल ओर यहूदा रे कराने री ये बजा ए कि तिने माखे रोष चढ़ाणे रिया तँईं बाल देवते री मूर्तिया गे तूप बाल़ेया।"

18 यहोवे मांगे बताया ओर माखे ये गल्ल पता लगी गी, कऊँकि यहोवे ई तिना रिया योजना मांगे बताई राखिया। 19 जेबे यहोवे माखे दखाया कि लोक मेरे खलाफ ए इजी ते पईले आऊँ तो बलि ऊणे वाल़े पेडा रे बच्चे जेड़ा अणजाण था। माखे पता नि था कि सेयो लोक मेरे नुकशाणो री योजना ये बोली की करोए, "आओ, आसे फल़ो समेत एस डाल़ो खे पट्टी देऊँए ओर जिऊँदेया बीचा ते बाडी देऊँए, तेबे एसरा नाओं तक फेर याद नि रओ।" 20 तेबे मैं प्रार्थना कित्ती, एबे ओ सेना रे यहोवा, ओ तर्मी न्यायी, ओ मनो री गल्ला खे जागणे वाल़े, तूँ तिना रा बदला लओ ओर माखे दखा, कऊँकि मैं आपणा मुकद्दमा तेरे आथो रे छाडीता रा।* 21 यहोवे माखे अनातोत शईरो रे लोका रे बारे दे बताओआ जो माखे काणा चाओ थे। तिने माखे बोलेया था, "जे तूँ यहोवे रे नाओं ते भविष्यबाणी करना बन्द नि करेगा, तो आसा तूँ कायी देणा।" 22 इजी री खातर सेना रा यहोवा तिना रे बारे ईंयाँ बोलोआ कि मां अनातोतो रे लोका खे सजा देणी, तिना रे जवान लड़ाईया दे तलवारे की मरने ओर तिना रे माठे-बेटिया पूखे मरने, 23 ओर अनातोतो रे लोका बीचा ते कोई नि बचणा। मां अनातोतो रे लोका पाँदे एड़ी मुसीबत पाणी, तिना री सजा रा दिन आऊणे वाल़ा ए।