यिर्मयाह 2

परमेशरो रे जरिये इस्राएलो री देख-पाल़

1 यहोवे रा वचन यिर्मयाह खे फेर मिलेया। यहोवे रा वचन ये था, 2 "यिर्मयाह जा ओर यरूशलेम शईरो रे सारे लोका खे आका पायी की ये सुणा कि यहोवा ईंयाँ बोलोआ कि माखे तेरी जवानिया रा प्यार ओर तेरे ब्याओ रे बखतो रा प्यार याद ए कि तुसे जंगल़ो दे मां पीछे-पीछे किंयाँ चले, जेती जमीना रे कुछ बी बायी नि राखेया था। 3 तेस बखते इस्राएलो रे लोक यहोवे खे पवित्र ओर तेसरी पईली उपज थी, तिजी खे खाणे वाल़े सारे दोषी ठईरने ओर मुसीबता दे पड़ने, यहोवे री येई बाणी ए।" 4 ओ याकूबो रे वंश, ओ इस्राएलो रे कराने रे लोको, यहोवे रा ये वचन सुणो! 5 यहोवा बोलोआ, "तुसा रे बुजुर्गे माँदे एड़ी कुणजी बुराई देखी कि सेयो मांते दूर अटी गे ओर नकम्मी मूर्तिया री आराधना करी की आपू बी नकम्मे ऊईगे? 6 तिने लोके इतणा पनि बोलेया कि जो आसा खे मिस्र देशो ते सम्बाल़ी की निकयाल़ी की ल्याया, जो आसा खे उजाड़ जगा बीचा ते ओर रेत ओर गड्डेया साथे परे दे रेगिस्तान ओर अन्दकूप न्हेरे देशो ते, जिसिये कोई नि चलदा ओर जिदे कोई माणूं नि रंदा, आसा खे निकयाल़ी की ल्याया, एबे आसा खे तेस यहोवे रिया तरफा खे मुड़ना चाईयो। 7 यहोवा बोलोआ, आऊँ तुसा खे एती मेरे उपजाऊ देशो खे ल्याया कि एथो रे फल ओर खरी उपज खाओ, पर तुसे मेरे एस देशो दे आई की ये अशुद्ध करी ता ओर मेरी वाचा रा इस्सा प्रष्ट करी ता।"

8 तुसा रे पुरोईते पनि पूछेया कि यहोवा केयी ए? जो बिधान सिखाओ थे, सेयो बी माखे नि जाणो थे, परदाने बी मां साथे बगावत कित्ती, भविष्यबक्तेया बाल देवतेया रे नाओं ते भविष्यबाणी कित्ती ओर बेकार मूर्तिया री पूजा कित्ती।

आपणे लोका रे खलाफ परमेशरो रा मुकद्दमा

9 इजी बजा ते यहोवा ईंयाँ बोलोआ, "मां फेर तुसा साथे बईस ओर तुसा रे माठेया ओर पोतेया ते बी तुसा रे खलाफ दोष लगवाणा। 10 कित्तिया रे द्वीपो रे पार जाई की देखो केदार प्रदेशो*2:10 केदार प्रदेशो पूर्बा दे रेगिस्तान केदार देश खे दूत पेजी की ठीक टंगो दे सोचो ओर देखो, देखो कि एड़ा काम ओरथी केथी बी ऊआ? क्या केसी जातिये आपणा देवता बदली ता, जो परमेशर पनि ए? 11 पर मेरी प्रजा रे लोके मां आपणे परमेशरो खे, जिने तिना खे इज्जत दित्ती, बेकार मूर्तिया रिया तँईं बदली ता।*2:11 रोम. 1:23 12 ओ सर्ग हैरान ओ, बऊत जादा डर ओर सुनसाण ऊई जा, यहोवे री येई बाणी ए। 13 तुसे मेरी प्रजा रे लोके दो पाप करी राखे, तिने आऊँ बह्ईंदी ऊई सूबल़ त्यागी ती ओर तिने आपणियां तँईं अऊद बणाईते, बल्कि एड़े अऊद जो टूटी गे रे ओर जिना रे पाणी नि रयी सकदा।"*2:13 यिर्म. 17:13

इस्राएलो रे अविश्वासो रा नतीजा

14 तुसे जो इस्राएलो रे लोक ए, जेबे तुसे जम्मे थे तेबे तुसे गुलाम नि थे। पर तुसे बादो ते आपणे दुश्मणा रे जरीये गुलाम ऊए। 15 दुश्मण तेस पाँदे जवान शेरो जेड़े दहाड़ने लगी रे थे। तिने तेसरा देश उजाड़ी ता, तिने तुसा रा शईर एड़ा उजाड़ी ता कि तिदे रणे वाल़ा कोई नि रया। 16 मिस्रो रे मेम्फिस ओर तहपन्हेस*2:16 मेम्फिस ओर तहपन्हेस मेम्फिस ऊँदले मिस्रो री राजधानी थी, जेबे कि तहपन्हेस नील नदी डेल्टा दे एक शईर था। शईरो दे रणे वाल़ेया बी तुसे अरायी ते। 17 ये सब तुसा री करनिया रा फल ए, जो तुसे आपणा परमेशर यहोवा छाडीता, जो तुसा खे मिस्रो री बाटा रिये लई की चलो था। 18 ओ यहूदा रे लोको, "एबे तुसा खे मिस्रो री बाटा ते क्या फायदा ए कि तूँ सीहोर*2:18 सीहोर नील नदिया रा दूजा नाओं ए नदिया रा पाणी पिये? ओर अश्शूरो री बाटा ते बी तुसा खे क्या फायदा कि तुसे फरात नदिया रा पाणी पियो? 19 तुसा री बुराईया ई तुसा री ताड़ना करनी ओर तुसा रे पटकणे रिया बजा ते तुसे दोषी ठईरने। ओ इस्राएल तू ये गल्ल जाणी लो ओर आपणियां आखी साथे देख कि आपणे परमेशर यहोवे खे त्यागणा, तेरिया तँईं कितणी बुरी ओर कऊड़ी गल्ल ए, ताखे मेरा डर ई नि रया, प्रभु सेना रे यहोवे री येई बाणी ए।"

परमेशरो री आराधना करने ते इस्राएलो रा मुकरना

20 कऊँकि बऊत पईले ई मैं तेरा जूँगड़ा तोड़ी ता ओर तुसा रे बान खोली ते, पर तुसे बोलेया, "आसा सेवा नि करनी।" तेबे तुसे सारे ऊच्चे-ऊच्चे टीलेया पाँदे ओर सब अरे डाल़ा निठे व्याभिचारणिया रा जा काम करदे रये।*2:20 हर ऊच्ची पाह्ड़िया पाँदे ओर अरे डाल़ा निठे दूजे देवतेया री पूजा कित्ती 21 यहूदा मैं तो तुसे खरी जातिया रे अंगूरा री बेल ओर खरे बीज करी की लगाए थे, तेबे तुसे मेरिया तँईं जंगल़ी अंगूरा री बेल कऊँ बणी गे? 22 चाए तूँ आपू खे खरे निरमे साथे तोए ओर बऊत सारा साबण बी लगाए, तेबे बी तेरे पापो रे लेयो मेरे सामणे ते कदी नि मिटणे, प्रभु यहोवे री येई बाणी ए।

23 यहूदा तुसे किंयाँ बोली सकोए कि आसे अशुद्ध नि ए, आसे बाल देवतेया पीछे नि चले? तराईया बीचली आपणी चाल देख ओर जाणी लो कि तुसे क्या कित्तेया? देखो, तुसे क्या करने लगी रे? तुसे एक बणो रे ऊँटा जेड़े आपणे साथिया खे टोल़ने खे चऊँ कनारे दौड़ने लगी रे। 24 तुसे तिना बणो रे गह्देया जेड़े ए, जो सम्बन्द बनाणे रे बखते अवा सिंगो ए। तेसरी इच्छा खे कुण रोकी सकोआ? जो तेसखे चाओई से तेसगे आपू ई दौड़ी की आई जाओई। 25 आपणे पैर नांगे ओर गल़ा सकोया रा नि राख। पर तुसे बोलेया कि ना, एड़ा नि ऊई सकदा, कऊँकि आसा खे परदेशी देवतेया ते प्यार ऊईगा रा ओर आसा तिना री ई पूजा ओर सेवा करनी। 26 यहोवा ईंयाँ बोलोआ, "जिंयाँ चोर पकड़े जाणे ते बाद शर्मिंदा ओआ, तिंयाँ ई इस्राएलो रे लोक, राजा, परदान, पुरोईत ओर भविष्यबक्तेया समेत शर्मिंदा ऊणे।" 27 सेयो लोक लक्कड़ो खे बोलोए कि तूँ मेरा बाओ ए ओर सेओ लोक पात्थरो खे बोलोए कि तूँ मेरी माये ए। ईंयाँ तिने मेरी तरफा खे मूँ नि पर पीठ फेरी ली, पर जेबे यहूदा रे लोका पाँदे मुसीबत आओई तेबे सेओ माखे बुलाओए, "आओ ओर आसा खे बचा! 28 पर जो देवते तुसे आपणियां तँईं बणाई राखे, सेयो केयी गये? जे सेयो तेरी मुसीबता रे बखते ताखे बचायी सकोए तो यबु उठो, कऊँकि ओ यहूदा, जितणे तेरे शईर ए तितणे ई तेरे देवता बी ए।"

सजा रे अक्कदार

29 यहोवे इस्राएलिया ते बोलेया, "तुसे कऊँ मां साथे बईस करोए? तुसे सबी मां साथे बगावत करी राखी, यहोवे री येई बाणी ए। 30 मैं बेकार ई तुसा रे लोका री ताड़ना कित्ती, तिने कुछ पनि मानेया, तुसे आपणे भविष्यबक्ते आपणी तलवारी साथे एड़े बाडी राखे, जेड़ा शेर फाड़ोआ।" 31 ओ इस्राएलो रे लोको, यहोवे रे वचनो पाँदे त्यान देयो! क्या आऊँ इस्राएलो खे जंगल़ या अन्दकूप न्हेरे रा देश बणेया? तेबे मेरी प्रजा कऊँ बोलोई कि आसे तो आजाद ऊईगे रे, इजी री खातर तांगे फेर नि आऊँगे? 32 क्या कुआँरी आपणा सजणा या लाड़ी आपणी सजावट पूली सकोई? तेबे बी मेरी‍ प्रजे आऊँ बऊत पईले ते पुलाई ता रा। 33 प्यार पाणे रिया तँईं तुसे केड़ी सुन्दर चाल चलोईया! बुरी जवाणसा खे बी तुसे आपणी जी चाल सिखाई राखी। 34 तुसा रे टाल्लेया दे निर्दोष ओर गरीब लोका रे खूनो रे नशाण मिलोए, तुसे से सरेआम नि पकड़े, पर इना सबी रे ऊँदे ऊए बी तुसे बोलोए, 35 पर तुसे फेर बोलदे रओए, "आऊँ निर्दोष ए, यहोवा मां पाँदे रोषे नि आ।" देख, तुसे जो बोलोए कि आसे पाप नि करी राखेया, इजी री खातर मां तुसा रा न्याय करना। 36 तुसे नवींया बाटा रे चलणे खे इतणे उतावल़े कऊँ ऊणे लगी रे? जेड़े तुसे अश्शूरिया ते शर्मिंदा ऊए, तेड़े ई मिस्रिया ते बी ऊणे। 37 तुसे तेथा ते बी शर्मा रे मारे सिरो पाँदे आथ राखी की ईंयाँ ई आऊणे, कऊँकि तुसे जिना पाँदे परोसा राखी राखेया, यहोवे सेयो नकम्मे ठराई राखे ओर तुसे तिना री बजा ते सफल नि ऊणे।