1 यहोवे री ये वाणी ए, "तिना ग्वाल़ेया पाँदे लाणत ए, जो मेरी चराईया री पेडा-बाकरिया खे तित्तर-बित्तर करोआ ओर नाश करोआ।" 2 इजी री खातर इस्राएलो रा परमेशर यहोवा आपणी प्रजा रे ग्वाल़ेया खे एड़ा बोलोआ, "तुसे मेरी पेडा-बाकरिया री खबर-सम्बाल़ नि लई, बल्कि सेयो तित्तर-बित्तर करी तिया ओर जबरदस्ती निकयाल़ी तिया, इजी बजा ते यहोवा ईंयाँ बोलोआ कि मां तुसा खे तुसा रे बुरे कामा री सजा देणी।* 3 तेबे मेरी पेडा-बाकरिया जो बची रिया, सेयो मां तिना सारे देशा ते जेती मैं सेयो जबरदस्ती पेजी ती रिया, आपू ई वापस करी की तिना री गवाईणी रेई कट्ठिया करी देणियां ओर सेयो फेर फलणियां-फूलणियां। 4 मां आपणियां तिना पेडा रिया तँईं एड़े गवाल़े राखणे जिना सेयो चराणिया, तेबे सेयो फेर ना तो डरनिया, ना नाश ऊणिया ओर ना तिना बीचा ते कोई राचणी, यहोवे री येई बाणी ए।"

5 यहोवा ईंयाँ बी बोलोआ, "देख, एड़े दिन आऊणे जेबे मां दाऊदो रे कुलो ते एक तर्मी लूँग जमाणी*, ओर तेस राजा बणी की दमाको ते राज करना ओर आपणे देशो दे तर्म ओर न्याय साथे राज करना। 6 तेसरे राजो रे दिना दे यहूदी लोक तिना रे दुश्मणा ते बचाए जाणे, ओर इस्राएली लोक बिना डरे बसे रे रणे ओर यहोवे तेसरा नाओं, ‘यहोवा म्हारी धार्मिकता’ राखणा।*" 7 इजी री खातर देख, यहोवा ईंयाँ बोलोआ, "एड़े दिन आऊणे जेबे लोका फेर नि बोलणा कि परमेशर जो आसा इस्राएली लोका खे मिस्र देशो ते छुड़ाई की ल्याया, तेसरी जिन्दगिया री कसम।" 8 पर तिना ये बोलणा, "यहोवा जो इस्राएलो रे लोका खे उत्तर देशो ते ओर तिना सबी देशा ते बी जेती तिने आसे जबरदस्ती निकयाल़े थे, छुड़ाई की लई आया, तेसरी जिन्दगिया री कसम। तेबे सेयो आपणे ई देशो दे बसे दे रणे।"

9 चूठे नबिया रे बारे दे मेरा मन पीतरे ई पीतरे फटदा रओआ, मेरी सारी आड्डिया दे थुरनी छूटोई, यहोवे जो पवित्र वचन बोली राखे, तिना खे सुणी की आऊँ एड़े माणूंए जेड़ा ऊईगा रा, जो शराबो रे नशे दे चूर ऊईगा रा ओ, 10 कऊँकि ये इस्राएल देश यहोवे रे प्रति विश्वासघाती लोका ते परी रा ए। एते पाँदे एड़ा स्राप पड़ी रा कि ये रोणे लगी रा, बणो री चराईया बी सूकी गी रिया। लोक बड़ी दौड़ तो दौड़ोए, पर बुराईया री तरफा खे ई ओर वीरता तो करोए, पर अन्याय साथे ई। 11 यहोवा बोलोआ, "कऊँकि नबी ओर पुरोईत दोनो बिना यहोवे रे ऊईगे रे, आपणे मन्दरो दे बी मैं तिना री बुराई देखी राखी। 12 इजी बजा ते तिना री बाट अन्देर ओर खड़ीसणे वाल़ी ऊणी जिदे सेयो तकेली की रूड़ाणे, कऊँकि यहोवे री येई बाणी ए कि मां तिना रे सजा देणे वाल़े सालो दे तिना पाँदे मुसीबत पाणी।" 13 शोमरोनो रे नबिया दे मैं ये मूर्खता देखी राखी थी कि सेयो बाल देवते रे नाओं ते भविष्यबाणी करोए ओर मेरी इस्राएली प्रजा खे पटकाई देयो थे। 14 पर यरूशलेम शईरो रे नबिया बीचे मैं एड़े काम देखी राखे, जिना साथे बाल़ खड़े ऊई जाओए, मतलब व्याभिचार ओर पाखण्ड, सेयो बुरे काम करने वाल़ेया खे एड़ा याओ देओए कि सेयो आपणी-आपणी बुराईया ते पछतांदे पनि, सारे रणे वाल़े मेरी नजरा रे सदोम ओर गमोरिया जेड़े ऊईगे रे।* 15 इजी बजा ते सेना रा यहोवा यरूशलेम शईरो रे भविष्यबक्तेया रे बारे दे ईंयाँ बोलोआ, "देख, मां तिना खे कऊड़िया चीजा खुलाणियां ओर विष पल़्याणा, कऊँकि तिना री बजा ते सारे यहूदा प्रदेशो रे लोक यहोवे खे नि मानदे।" 16 सेना रे यहोवे तुसा खे एड़ा बोली राखेया, "इना भविष्यबक्तेया री गल्ला री तरफा खे जो तुसे त्यान नि देयो, कऊँकि यो चूठे नबी तुसा खे बेकार गल्ला सिखाओए, यो दर्शणो रा दावा करी की यहोवे रे मुंए री नि, आपणे ई मनो रिया गल्ला बोलोए।" 17 यो भविष्यबक्ता तिना लोका ते बोलदे रओए जो मेरी गल्ला खे सुणने ते ना करोए कि यहोवा बोलोआ, "तुसा रा कल्याण ऊणा ओर जितणे लोक आपणे अटो पाँदे चलोए, तिना खे यो बोलोए कि तुसा पाँदे कोई मुसीबत नि आऊणी।" 18 कोई बी यहोवे री गुप्त सभा दे खड़ा ऊई की तेसरे वचन सुणी ओर समजी नि सकेया। यहोवे रा वचन किने बी त्यान देई की नि सुणेया।*

19 देखो, यहोवे रे रोषो री प्रचण्ड अवा ओर तूफान चलणे लगी रा ओर तिजी रा पऊण-चूखाना दुष्टा रे सिरो पाँदे जोरे की लगणा। 20 जदुओ तक यहोवा आपणा काम ओर आपणी योजना पुरिया नि करी चुकोगा, तदुओ तक तेसरा रोष शान्त नि ऊणा। आऊणे वाल़े दिना दे तुसे एसा गल्ला खे ठीक-टंगो रे समजी सकणे। 21 यहोवे बोलेया, "यो भविष्यबक्ता बिना मेरे पेजे आपणे सन्देशो साथे ताखे टोल़णे खे दौड़दे रओए ओर बिना मेरे कुछ बोले भविष्यबाणी करने लगोए। 22 जे यो मेरी शिक्षा दे बणे रे रंदे, तो मेरी प्रजा रे लोका खे मेरे वचन सुणांदे ओर सेयो आपणी बुरी चाल ओर कामो ते फिरी जांदे।" 23 यहोवे री ये वाणी ए, "आऊँ एड़ा परमेशर नि ए जो दूर नि नेड़े ई रओआ।*" 24 फेर यहोवे पूछेया, क्या कोई बी एड़ी जगा रे नि लूकी सकदा जेती आऊँ देखी नि सकदा। क्या स्वर्ग ओर तरती दोनो जगा रे आऊँ ए। 25 मैं इना भविष्यबक्तेया री गल्ला बी सुणी राखिया जो मेरा नाओं लई की चूठी भविष्यबाणी करोए, मैं सुफना देखी राखेया, सुफना! 26 जो भविष्यबक्ता चूठी भविष्यबाणी करोए ओर आपणे मनो रे छलो तेई भविष्यबक्ता ए, ये गल्ला तिना रे मनो दे जादा दिन तक नि रणियां। 27 जेड़े मेरी प्रजा रे लोका रे बुजुर्ग मेरा नाओं पूली की बाल देवते रा नाओं लणे लगी गे थे, तिंयाँ ई एबे यो भविष्यबक्ता तिना खे आपणे-आपणे सुफने बताई-बताई की मेरा नाओं पुलाणा चाओए। 28 अगर जे किनी भविष्यबक्ते सुफना देखी राखेया ओ, तो से तिजी खे बताओ, पर जिने बी मेरा वचन सुणी राखेया ओ, तो से मेरा वचन सच्चाईया साथे सुणाओ। यहोवे पूछेया, केयी पूऊ ओर केयी कणक? 29 यहोवे री ये बी बाणी ए कि मेरा वचन आगी जेड़ा नि ए। फेर क्या से एड़ा थौड़ा नि ए जो पात्थरो खे तोड़ी देयो। 30 यहोवा ईंयाँ बी बोलोआ कि देखो, जो भविष्यबक्ता मेरे वचन दूजे ते चोरी-चोरी की बोलोए, आऊँ तिना रे खलाफ ए। 31 तेबे यहोवा ईंयाँ बी बोलोआ कि जो भविष्यबक्ता, "तेसरी ये बाणी ए" एड़ी चूठी बाणी बोली की आपणी-आपणी जीब ईलाओए, आऊँ तिना रे बी खलाफ ए। 32 यहोवे री ये बी बाणी ए कि जो बिना मेरे पेजे या बिना मेरी आज्ञा ते सुफने देखणे रा चूठा दावा करी की भविष्यबाणी करोए ओर तिजी रे बारे दे बोली की मेरी प्रजा खे चूठे कमण्डो दे आई की बेवकूफ बणाओए, आऊँ तिना रे बी खलाफ ए ओर तिना ते मेरी प्रजा रा कोई फायदा नि ऊणा।

33 यहोवे माखे बोलेया, "यहूदा रे लोका बीचा ते कोई जणा या कोई भविष्यबक्ता या पुरोईत तुसा ते पूछो, यिर्मयाह, यहोवे क्या असरदार वचन बोली राखेया?" तो तेसखे बोलणा, "क्या असरदार वचन? यहोवे री ये बाणी ए कि मां तूँ छाडी देणा।" 34 ओर जो भविष्यबक्ता, आम माणूं या पुरोईत, यहोवे रा पारी वचन, ईंयाँ बोलदा रओ, तेसखे मां तेसरे कराने समेत सजा देणी। 35 तुसा बीचा ते हर एक आपणे दोस्ता ओर दूजे इस्राएली पाईया ते पूछदा रओ, "यहोवे क्या ज्वाब दित्तेया? या यहोवे क्या बोली राखेया?" 36 यहोवे रा बोलेया रा पारी वचन, एड़ा तुसे कदी नि बोलणा, नई तो तुसा रा एड़ा बोलणा ई सजा री बजा ऊई जाणी, कऊँकि म्हारा परमेशर सेना रा यहोवा जो जिऊँदा परमेशर ए, तुसे लोके तेसरे वचन बिगाड़ी ते रे। 37 भविष्यबक्ता पूछोए, "ओ यिर्मयाह, यहोवे ताखे क्या ज्वाब दित्तेया? 38 या यहोवे ताखे क्या बोलेया? जे तुसे, यहोवे रा बोलेया रा असरदार वचन, ईंयाँ बोलोगे" तो यहोवे रा ये वचन सुणो, "मैं तो तुसा गे सन्देसा पेजी राखेया, कदी बी एड़ा नि बोलणा कि, ‘यहोवे रा बोलेया रा असरदार वचन।’ पर तुसे ये बोलदे ई रओए, यहोवे रा बोलेया रा असरदार वचन।" 39 इजी बजा ते देखो, मां तुसे बिल्कुल पुलाई देणे ओर तुसे ओर ये यरूशलेम शईर जो मैं तुसा रे बुजुर्गा खे ओर तुसा खे बी देई राखेया, छाडी की आपणे सामणे ते दूर करी देणे। 40 मां एड़ा करना कि तुसा री बेज्जती ओर बेज्जती सदा ऊँदा रणा ओर कदी बी पूलाया नि जाणा।