यिर्मयाह 8

जिंदगिया ते ज्यादा मौत

1 यहोवा ये घोषणा करोआ, "तेस बखते दुश्मण सेना रे सिपाईया यहूदा रे मरे दे राजा, परदान, पुरोईत, भविष्यबक्ता ओर यरूशलेम शईरो रे रणे वाल़े मरे दे लोका रिया कब्रा पटणिया, ओर तिना आड्डिया कब्रा ते बारे निकयाल़निया। 2 तिना रिया आड्डिया कट्ठिया करी की दबाणे रे बजाये, सूरज, चाँद ओर सर्गो रे सारे तारागणा रे सामणे जमीना पाँदे पड़ी री खादा जेड़िया रई जाणिया, कऊँकि इना ते ई सेयो प्यार करो थे। इना री ई सेयो सेवा करो थे, ओर इना रिया ई सेयो गल्ला मानो थे। सेयो तिना गेई जाया करो थे ओर तिना री ई पूजा करेया करो थे। तिना रे इना पापा रिया बजा ते ई इना रिया आड्डिया कट्ठिया नि करनिया ओर ना ई कब्रा दे फेर राखणियां। कूड़े रे टेरो जेड़िया सेयो जमीना पाँदे पड़िया दिया रणियां। 3 तेबे एस बुरे बचे रे कराने रे लोका, तिना सबी जगा दे जेथा ते मैं सेयो निकयाल़ी ते थे, जिन्दगिया ते जादा मौत चाणी, सेना रे यहोवे री येई बाणी ए।"*8:3 प्रका. 9:6

पाप ओर सजा

4 यहोवे माखे बोलेया, "यिर्मयाह, यहूदा रे लोका खे ये बोलो कि मैं यहोवे ये सब बोलोआ, कि जेबे माणूं रूड़ोए, तो क्या सेयो फेर नि उठदे। 5 जेबे कोई पटकी जाओआ, तेबे क्या से फेर वापस नि आऊँदा। तो क्या बजा ए कि यो यरूशलेम शईरो रे लोक सदा दूर ई दूर पटकदे जाओए? मेरे चतौणी देणे ते बाद बी यो लोक छल करना नि छाडदे ओर फेर मेरिया तरफा खे वापस आऊणे खे ना करोए। 6 मैं सेओ त्यान लगाई की सुणे, पर यो ठीक नि बोलदे, इना बीचा ते किने बी आपणी बुराईया ते पछतायी की नि बोलेया, ‘हाय! मैं ये क्या करी राखेया?’ जेड़ा कोड़ा लड़ाईया दे तेज दौड़ोआ, तेड़ा ई इना बीचा ते हर एक जणा आपणी दौड़ा रेई दौड़ोआ। 7 सर्गो रे पंछी बी आपणे ठीक बखतो खे जाणोए ओर सारस, कबूतर, ककराखा ओर बगुले बी मेरिया तरफा खे आऊणे रा बखत राखोए, पर मेरी‍ प्रजा यहोवे रा बिधान नि जाणदी। 8 तुसे किंयाँ बोली सकोए कि आसे समजदार ए ओर यहोवे रा दित्तेया रा बिधान आसा साथे ए? पर तिना रे शास्त्रिए तिजी रे बारे चूठ लिखी की से चूठा बणाईता रा। 9 समजदार शर्मिंदा ऊईगे, सेयो दु:खी ऊए ओर पखड़ी गे, देखो, तिने यहोवे रा वचन बेकार जाणी राखेया, तिना रे समज नि रयी। 10 इजी बजा ते मां तिना रिया जवाणसा दूजे मर्दा रे ओर तिना रे डोरू दूजे रे वशो दे करी देणे, कऊँकि छोटे ते लई की बड़े तक सेयो सारे के सारे लाल़ची ए; क्या भविष्यबक्ता, क्या पुरोईत, सेयो सारे कपटो साथे काम करोए। 11 तिने, शान्ति-शान्ति बोली की मेरी प्रजा रे जख़्म पाँदिए-पाँदिए ई ठीक कित्ते, पर कोई शान्ति नि ऊई।*8:11 यहे. 13:10 12 मेरेया लोका खे आपणे कित्ते दे बुरे कामो रिया तँईं शर्मिंदा ऊणा चाईए। सेयो बिल्कुल बी शर्मिंदा नि ऊए। इजी बजा ते जेबे ओर लोक थाले रूड़ने, तेबे सेयो बी रूड़ने, जेबे तिना री सजा रा बखत आऊणा, तेबे सेयो बी ठोकर खाई की रूड़ने, यहोवे रा ये ई वचन ए। 13 यहोवा ईंयाँ बी बोलोआ कि मां आपणे लोका रा अन्त करी देणा। ना तो तिना री अंगूरा री बेला रे अंगूर ऊणे ओर ना दाऊगल़े रे डाल़ा रे दाऊगल़े, बल्कि तिना रे पत्ते बी सूकी जाणे ओर जो कुछ मैं तिना खे देई राखेया, से जमीन बी बारलेया लोका तिना गे ते लई लणी।" 14 तेबे यहूदा रे लोका एकी दूजे ते बोलणा, आसे चुपचाप कऊँ बैठी रे? आओ, आसे गढ़वाल़े शईरो दे जाई की कट्ठे नाश ऊई जाऊँए, कऊँकि म्हारा परमेशर यहोवा आसा खे नाश करना चाओआ ओर आसा खे विष पीणे खे देई राखेया, कऊँकि आसे यहोवे रे खलाफ पाप करी राखेया। 15 आसे शान्तिया री बाट न्याल़ूँ थे, पर कोई कल्याण नि ऊआ ओर ठीक ऊणे री उम्मीद करुँ थे, पर डरना पड़ी रा। 16 तिना रे दुश्मणा रे कोड़ेया रा फुर्राणा दान शईरो ते सुणोआ ओर तागतबर कोड़ेया रे हिनहिनाणे री आवाज सुणी की सारा देश डरीगा रा, तिने आई की म्हारा देश ओर जो कुछ तिदे ए ओर म्हारा यरूशलेम शईर माणूंआ समेत नाश करी ता रा। 17 यहोवा बोलोआ, "देखो, मां तुसा बीचे एड़े साप ओर नाग पेजणे, जिना पाँदे मंत्र नि चलणा ओर तिना तुसे डसणे" यहोवे री ये ई बाणी ए।

यहूदा पाँदे रोणा

18 हाय! हाय! एस शोगो री दशा रे माखे केथा ते शान्ति मिलणी? मेरा मन पीतरे ई पीतरे तड़फोआ! 19 माखे आपणे लोका रा चींगणा दूर देशो ते ई सुणोआ, क्या यहोवा सिय्योनो रे नि ए? क्या तेथो रा राजा तेती नि ए? तिना रे राजा यहोवे ज्वाब दित्तेया, "तिने माखे आपणी मूर्तिया कअड़ी की ओर तुसा रिया परदेसो री मूर्तिया री पूजा करने रे जरीये रोष कऊँ चढ़ाया?" 20 मैं बोलेया, "लोका ये बोलणा बडाईया रा बखत बीती गा, फल तोड़ने रा बखत बी खत्म ऊईगा पर म्हारा उद्धार नि ऊआ।" 21 यिर्मयाहे फेर बोलेया, "आपणे लोका रे दु:खो ते आऊँ बी दु:खी ऊआ, आऊँ शोगो रा पईरावा पईनी की बऊत हैरानिया रे डूबी गा रा। 22 क्या गिलाद इलाके दे कोई बलसानो री औषधि नि ए? क्या तिदे कोई बैद नि ए? जे आए, तो मेरे लोका रे जख़्म ठीक कऊँ नि ऊए?"