1 मोआब देशो रे बारे दे इस्राएलो रा परमेशर, सेना रा यहोवा ईंयाँ बोलोआ, "नबो शईरो पाँदे लाणत ए, कऊँकि नबो शईर नाश ऊईगा! किर्यातैम शईरो री उम्मीद टूटी गी, से लई ला रा, ऊच्चा गढ़ शर्मिंदा ओर उदास ऊईगा रा। 2 मोआब देशो री तारीफ करना बन्द ऊईगा। हेशबोन शईरो दे तेसरा नुकशाण करने री स्कीम करी राखी, ‘आओ, आसे तेसखे एड़ा नाश करूँए कि से राज्य नि रओ।’ हे मदमेन शईर, तूँ बी सुनसाण ऊई जाणा, तां पीछे लड़ाईया री तलवार पड़नी। 3 होरोनैम शईरो ते मतादा रिया तँईं चींगणे री आवाज सुणो! नाश ओर बड़े दु:खो री आवाज सुणने लगी री! 4 मोआबो रा सत्यानाश ऊणे लगी रा, तेथो रे नीके जे बच्चेया रा चींगणा सुणेया। 5 कऊँकि लूहीत शईरो री चढ़ाईया दे लोक लगातार रोंदे ऊए चढ़ने ओर होरोनैमो री उतराईया रे लोक उदास ऊई की बैठणे, कऊँकि तिना रे शईर पूरी तरअ ते नाश ऊई जाणे।"

6 नठो! आपणा-आपणा प्राण बचाओ! तेस अदमूए डाल़ो जेड़े ऊई जाओ जो जंगल़ो रे ओआ! 7 कऊँकि तुसे जो आपणे काम ओर सम्पत्तिया पाँदे परोसा राखोए, इजी बजा ते तुसे बी पखड़ने ओर तुसा रा कमोश देवता बी आपणे पुरोईत ओर परदाना समेत गुलामिया दे जाणा। 8 यहोवे रे वचनो रे मुताबिक दुश्मणो जो नाश करने वाल़ा ए तुसा रे हर शईरो पाँदे चढ़ाई करनी ओर कोई शईर नि बचणा, काट्टिया रे ओर पाह्ड़ो रे चौरस जमीन वाल़े दोनो नाश ऊई जाणे। 9 "मोआबो खे पंख लगाई दो ताकि से उडी की दूर ऊई जाओ; कऊँकि तेथो रे शईर एड़े उजाड़ ऊई जाणे कि तिदे कोई बी बसी की नि रणा। 10 से माणूं स्रापित ए जो यहोवे रा काम करने दे आल़स करोआ ओर से बी जो आपणी तलवार मोआबो रे लोका खे काणे ते रोकोआ।"

11 मोआबो रे लोक बचपनो ते ई सुखी ए, सेयो कदी बी जंगल़ो रे नि गये। तिने एकी पांडे ते दूजे पांडे रे कदी नि उल्टाया ओर ना गुलामिया रे गया, इजी बजा ते तिना रा स्वाद तिना दे स्थिर ए ओर तिना री खुशबू जेड़ी की तेड़ी रओई। 12 इजी री खातर यहोवा ये सब बोलोआ, पर मां दुश्मण छोड़ ई तुसा रे कड़े ते ऊलटाणे खे पेजणे। तिना लोका मोआबो रे कड़े खाली करी देणे ओर तेबे तिना से कड़े तोड़ी की चकनाचूर करी देणे। 13 तेबे जिंयाँ इस्राएलो रे कराने खे बेतेल देवता जेस पाँदे सेयो परोसा करो थे, तेसरिया बजा ते शर्मिंदा ऊणा पड़ेया, जेस पाँदे सेयो परोसा राखो थे, तेड़े ई मोआबी लोक कमोश देवते रिया बजा ते शर्मिंदा ऊणे। 14 ओ मोआब देशो रे वीरो, तुसे किंयाँ बोली सकोए कि आसे सिपाई ओर पराक्रमी योद्धा ए? 15 मोआब तो नाश ऊईगा, तेथो रे शईर स्वा ऊईगे ओर तेथो रे सबी ते तागतबर योद्धा मरने खे उतरी गे, राजेया रा राजा जेसरा नाओं सेना रा यहोवा ए, तेसरी ये बाणी ए। 16 मोआबो रा नाश चट ई ऊणे वाल़ा ए ओर तेसरे नाश ऊणे रा दिन बऊत ई छोड़ आऊणे वाल़ा ए। 17 तेथो रे नेड़े-तेड़े रे सब रणे वाल़ेयो ओर तेसरी कीर्तिया खे जाणने वाल़ेयो, तेसरिया तँईं रोओ, लाणत बोलो! ये मजबूत सोठा ओर सुन्दर छाटी किंयाँ टूटी गी? 18 ओ दीबोन शईरो रे रणे वाल़े लोको तुसे आपणी इज्जतदार जगा छाडी की त्याये बैठे दे रओ, कऊँकि मोआबो खे नाश करने वाल़ेया तुसा पाँदे चढ़ाई करी की तुसा रे गढ़ नाश करी राखे।

19 ओ अरोएर शईरो रे रणे वाल़े लोको, तुसे बाटा दे खड़े ऊई की ताकदे रओ। जो नठोआ तेसखे ओर जो मोआबो ते नठीगे, तेसते पूछो कि क्या ऊई रा? 20 अरोएरो ते नठदे ऊए लोका ज्वाब देणा कि मोआबो रे लोका री उम्मीद टूटी गी। तुसे हाय-हाय करो ओर चींगो, अर्नोन नदिया रे कनारे दे बी ये बताओ कि मोआब नाश ऊईगा। 21 चौरस जमीना रे देशो दे होलोन, यहसा, मेपात शईर, 22 दीबोन, नबो, बेतदिबलातैम, 23 किर्यातैम, बेतगामूल, बेतमोन, 24 करिय्योत, बोस्रा ओर क्या दूर, क्या नेड़े वाल़े शईर, मोआब देशो दे यहोवे रे न्याय री सजा री आज्ञा पूरी ऊई री। 25 यहोवे री ये बाणी ए कि, मोआबो री सेना री तागत खत्म ऊई गी ओर तेसरी तागत टूटी गी री। 26 यहोवे बोलेया, "मोआबो रे लोका खे नशेड़ी बणाओ, कऊँकि तिने यहोवे रे खलाफ पाप करी राखेया, इजी री खातर मोआबो रे लोका आपणी उल्टी खाणी ओर तिना रा मजाक ऊणा। 27 कऊँकि तुसे बी इस्राएलो रे लोका रा मजाक करी राखेया। क्या सेयो चोरा बीचे पकड़े थे कि जेबे तुसे तेसरी चर्चा करो थे, तो सिर ईलाओ थे? 28 ओ मोआबो दे रणे वाल़ेयो आपणे-आपणे शईरो खे छाडी की चट्टानी री दरारा दे बसी जाओ! तेसा कूगिया जेड़े ऊई जाओ जो गुफा रे मुरे रिया एक तरफा खे कोअला बणाओई। 29 आसे मोआबो रे कमण्डो रे बारे दे सुणी राखेया कि सेयो कितणे कमण्डी ए, तिना रा कमण्ड, अबिमान ओर गर्व ओर तिना रा मन फूलणा मशूर ए।"

30 यहोवे री ये बाणी ए कि आऊँ तेसरे गुस्से खे जाणूंआ कि से बेकार ईए, तिना रे बड़े बोलणे ते कुछ नि बणेया। 31 इजी बजा ते मां मोआबिया रिया तँईं हाय-हाय करनी, आ मां सारे मोआबिया रिया तँईं चींगणा, कीरहेरेस जगा रे लोका रिया तँईं जोरे-जोरे की रोणा। 32 ओ सिबमा शईरो रे लोको, मां तुसा रिया तँईं याजेरो ते बी जादा रोणा! तेरी डाल़िया तो समुद्रो रे कनारे तक बढ़ी गिया, बल्कि अमोनिया रे शईर याजेरो दे समुद्रो तक बी पऊँची गी थिया, पर नाश करने वाल़ा तेरे तूपा रे फला पाँदे ओर तोड़े रे अंगूरा पाँदे बी टूटी गा रा। 33 फल वाल़े बगीचेया ते ओर मोआबो रे देशो ते खुशी ओर मजे दूर ऊईगे रे, मैं एड़ा कित्तेया कि शराबो रे कुण्डो दे थोड़ा बी शराब नि रया, लोका फेर ललकारदे ऊए अंगूर नि मांडणे, जो ललकार ऊणे वाल़ी ए, से एबे नि ऊणी। 34 हेशबोन शईरो रा चींगणा सुणी की लोक एलाले शईर ओर यहस शईरो तक ओर सोअर शईरो ते होरोनैम ओर एग्लतशलीशिया जगा तक बी चींगदे ऊए नठीगे दे, कऊँकि निम्रीम नदिया रा पाणी बी सूकीगा रा।

35 यहोवे री ये बाणी ए कि मां मूर्तिया रे मन्दरो दे चढ़त चढ़ाणा ओर देवतेया खे तूप बाल़ना, दोनो मोआब देशो दे बन्द करी देणे। 36 इजी बजा ते मेरा मन मोआब ओर कीरहेरेसो रे लोका खे बँसरिया जेड़ा रोयी-रोयी की शोग मनाओआ, कऊँकि जो कुछ तिने कमायी की बचायी राखेया, से नाश ऊईगा रा। 37 कऊँकि मोआबो रे सब लोक सिर ओर दाढ़िया रे बाल़ कटाई की गँजे ऊईगे, सबी रे आथा दे चीरे ओर सबी रे लको दे टाट बानी रीए। 38 मोआबो रे सबी कअरा रे छता पाँदे ओर सबी चौका रे रोण-पीटण ऊणे लगी रा, कऊँकि मैं मोआब बेकार पांडे जेड़ा तोड़ी राखेया, यहोवे री येई बाणी ए। 39 मोआब केड़ा डरीगा! हाय, हाय, करो! कऊँकि तिने शर्मिंदा ऊई की केड़ी पीठ फेरी राखी! इजी बजा ते मोआबो रे चऊँ कनारले सबी रणे वाल़ेया तेसरा मजाक करना ओर हैरान ऊई जाणे। 40 कऊँकि यहोवे वादा करी राखेया, "देखो एकी जातिया उकाबो जेड़े आपणे पंख फैलाई की मोआबो पाँदे चाफ बाणी। 41 दुश्मणा मोआबो रे शईर करिय्योतो पाँदे अक्क करी लेणा। तेस तिना रे गढ़ केरी लणे। तेस दिने मोआबो रे सिपाई एड़े डरी जाणे जिंयाँ बच्चा जमणे रे बखते जवाणस डरोई। 42 ओर मोआब एड़ा तित्तर-बित्तर ऊई जाणा कि तेसरा दल टूटी जाणा, कऊँकि तिने यहोवे रे खलाफ बडयाईया करी राखिया।"

43 यहोवा ईंयाँ बोलोआ, "ओ मोआबो रे रणे वाल़ेयो, तुसा खे डर, गड्डे ओर फन्दे ठराई राखे। 44 जो कोई डरो रे मारे नठोगा, से गड्डे रे रुड़ना ओर जो कोई गड्डे ते निकल़ोगा, से फन्दे रे फसणा, कऊँकि मां मोआबो री सजा रा दिन तेस पाँदे ल्याऊणा, यहोवे री येई बाणी ए।" 45 जो नठी रे, सेयो हेशबोनो रे शरण लई की खड़े ऊईगे रे, पर हेशबोनो ते आग ओर सिहोन शईर जेते पाँदे राजा सिहोने एकी बार राज कित्तेया था, बीचा ते आगी री लूपी निकल़ी, जेते कि मोआब देशो रे कूणे ओर तेथो रे राजेया री सामर्थ स्वा ऊई गी। 46 ओ मोआबो रे लोको तुसा पाँदे हाय! कमोशो रे लोक नाश ऊईगे, कऊँकि एथो रे माठे-बेटिया कैदी बणाई की केसी दूजे देशो दे लईगे दे ए। 47 तेबे बी यहोवे री ये बाणी ए कि मां कुछ दिना दे मोआबो रे लोक गुलामिया ते वापस ल्याऊणे। यिर्मयाह भविष्यबक्ते री मोआबो री सजा रे बारे दे ये ई भविष्यबाणी ए।