1 यहोवा ईंयाँ बोलोआ, "मां बाबेल ओर लेबकामै रे रणे वाल़ेया रे खलाफ एक एड़ी नाश करने वाल़ी सेना पेजणी जो प्रचण्ड अवा जेड़ी ऊणी। 2 मां बेबीलोनो गे एड़े परदेशी सिपाई पेजणे जिना सेयो फड़ाकी-फड़ाकी की उडाणे ओर ईंयाँ बेबीलोन सुनसाण करी देणा ओर जेबे तेस देशो पाँदे मुसीबत आऊणी तेबे चऊँ कनारा ते आऊणी।" 3 धनुष चलाणे वाल़ेया रे खलाफ ओर जिने आपणा झिलम पईनी राखेया धनुष चलाणे वाल़े धनुष चढ़ाई की उठे, तिना रे तागतबर सिपाईया साथे कोई दया नि करनी, बेबीलोनो री सारी सेना खे सत्यानाश करो। 4 सेयो सिपाई बेबीलोनो दे काये जाणे, तेथो रिया सड़का दे काईल लोक पड़े दे रणे। 5 तेबे बी इस्राएल ओर यहूदा रे देश, इस्राएलो रे पवित्र परमेशरो रे खलाफ कित्ते रे पापो साथे परी गे रे, तेबे बी तिना रे परमेशर, सेना रे परमेशर यहोवा सेयो त्यागी नि राखे। 6 ओ इस्राएल ओर यहूदा रे लोको, बेबीलोनिया ते नठी जाओ, आपणे-आपणे प्राण बचाओ! तिना रे पापो रे इस्सेदार ऊई की तुसे नि मिटो, कऊँकि ये यहोवे रा बदला लणे रा बखत ए, से तिना ते बदला लणे वाल़ा ए।* 7 बाबेल यहोवे रे आथो दे सूईने रे कटोरे जेड़ा था, जेते कि सारी तरतिया रे लोक मतवाल़े ओ थे, जातिया-जातिया रे लोके तेसरे शराबो बीचा ते पिया, इजी बजा ते सेयो बी इस्साल ऊईगे।* 8 पर अचाणक बाबेल लई ला ओर नाश करी ता। तेथो रे लोका खे हाय-हाय करो! तिना रे जख्मा खे बलसान औषधि ल्याओ, क्या पता सेयो ठीक ऊई जाओ।* 9 तेती रणे वाल़े यहूदी गुलामे एकी दूजे खे बोलेया, "आसे बाबेलो रे लोका रा लाज करुँ तो थे, पर सेयो ठीक नि ऊए। इजी री खातर आओ, आसे बाबेलो खे छाडी की आपणे-आपणे देशो खे चली जाऊँए, कऊँकि तेस पाँदे कित्ते रे न्याय रा फैंसला सर्ग, बल्कि स्वर्गो तक बी पऊँची गा रा। 10 यहोवे म्हारे पाप माफ करी राखे, इजी री खातर आओ, आसे यरूशलेम शईरो दे आपणे परमेशर यहोवे रे काम बताऊँए।" 11 तीर पैने करो! ढाला पकड़ी की राखो, कऊँकि परमेशरे मादी राजेया रे मन पड़काई राखे, तिने बाबेलो खे नाश करने री योजना करी राखी, कऊँकि यहोवे रे मन्दरो रा येई बदला ए। 12 बाबेलो री दवाल रे खलाफ चण्डा खड़ा करो, बऊत पईरेदार बठयाल़ो, ताका रे रणे वाल़ेया खे बठयाल़ो, कऊँकि यहोवे बाबेलो रे रणे वाल़ेया रे खलाफ जो कुछ बोलेया था, से एबे करने वाल़ा ए, बल्कि करी बी राखेया। 13 ओ बऊत सारी नदिया बीचे बसणे वाल़े लोको ओर जेती बऊत सारे माणूं अमीर ए, तुसा रा अन्त आई गा रा, तुसा रे अन्तो रा बखत आई गा रा। 14 सेना रे यहोवे आपणी ई कसम काई राखी कि मां तूँ पक्का अणगिणत लोके की टिड्डिया जेड़ा परी देणा ओर तिना तेरे खलाफ ललकारना। 15 यहोवे आपणे सामर्थो साथे तरती बणाई ओर आपणी अक्ला साथे स्थिर कित्ती ओर सर्ग आपणी समजा साथे ताणी राखेया। 16 जेबे से जोरे की बोलोआ, तेबे सर्गो दे बड़े पाणिये री जी छेड़ ओई, से तरतिया रे कूणे बादल़ो साथे परी देओआ, से बर्खा खे बिजल़ी बणाओआ ओर आपणे पण्डारो ते अवा निकयाल़ोआ। 17 सारे माणूं डांगरा जेड़े बिना अक्ला रे ए, सारे सन्यारा खे आपणी बणाई री मूर्तिया रिया बजा ते शर्मिंदा ऊणा पड़ना, कऊँकि तिना री कअड़ी रिया मूर्तिया तोखा देणे वाल़िया ए ओर तिना रे कोई साआ नि आऊँदा। 18 सेयो मूर्तिया तो बेकार ओर मजाको जोगिया ए, जेबे तिना रे नाश करने रा बखत आऊणा, तेबे सेयो नाश ई ऊणिया 19 पर जो याकूबो रा आपणा इस्सा ए, से तिना जेड़ा नि ए, से तो सबी खे बनाणे वाल़ा ए ओर इस्राएलो रे सारे गोत्र तेसरा आपणा इस्सा ए, तेसरा नाओं सेना रा परमेशर यहोवा ए।

20 यहोवा बेबीलोनो री सेना रे बारे दे ईंयाँ बोलोआ, "तूँ मैं थौड़ा ओर युद्ध करने रा अथियार ठराई राखेया, मां तेरे जरीये जातिया-जातिया रे लोक तित्तर-बित्तर करने ओर तेरे जरीये ई राज-राज नाश करने। 21 तेरे जरीये ई मां सवार कोड़ेया समेत टुकड़े-टुकड़े करने, 22 तेरे ई जरीये सवारा समेत रथ बी टुकड़े-टुकड़े करने, तेरे जरीये ई मां मर्द, जवाणसा, स्याणे ओर बाल़क सबी रे टुकड़े-टुकड़े करी देणे ओर जवान मर्द ओर जवान जवाणसा बी तेरे ई जरीये टुकड़े-टुकड़े करने, 23 तेरे जरीये मां पेडा-बाकरिया ग्वाल़ेया समेत ओर जिम्मीदार ओर तेसरे जोड़े रे बल़द, अधिकारी ओर परदान बी टुकड़े-टुकड़े करी देणे।" 24 यहोवे बोलेया, "मां बाबेलो खे ओर सारे कसदिया खे बी तिना सबी बुराईया रा बदला देणा, जो तिने तुसा लोका सामणे यरूशलेम शईरो दे करी राखी, यहोवे री येई बाणी ए। 25 बेबीलोन बड़े पाह्ड़ो जेड़ा ए, जेसरे जरीये सारी तरती नाश ऊई री, यहोवा ईंयाँ बोलोआ कि आऊँ तेरे खलाफ ए ओर आथ बढ़ाई की तूँ काअड़ी से सेटी देणा ओर फूखेया रा पाह्ड़ बणाई देणा।* 26 तेबे लोका तांते ना तो कअर बनाणे खे ओर निऊँआ बनाणे खे पात्थर लणे, कऊँकि तूँ सदा उजाड़ रणा, यहोवे री येई बाणी ए।"

27 देशो दे लड़ाईया री नशाणिया रा चण्डा खड़ा करो, जातिया-जातिया बीचे लड़ाईया रा रड़सिंगा बजाओ, बेबीलोनो रे खलाफ जातिया-जातिया खे त्यार करो, अरारात, मिन्नी ओर अश्कनज नाओं रे राजा खे तेसरे खलाफ बुलाओ, तेसरे खलाफ सेनापति बी ठराओ, कोड़ेया खे जंगल़ी टिड्डिया जेड़े अणगिणत चढ़ाई की ल्याओ। 28 तेसरे खलाफ दूजी जातिया री सेना खे त्यार करो, मादी राजेया खे तिना रे परदान, सारे परदान ओर तेस राज रे सारे देशो खे त्यार करो। 29 यहोवे ठाणी राखेया कि तेस बाबेल देश एड़ा उजाड़ना कि तिदे कोई नि रणा, इजी री खातर तरती थरथराओई ओर दु:खी ओई। 30 बाबेलो रे योद्धा गढ़ो रे रयी की लड़ने खे ना करोए, तिना दे लड़ने री सामर्थ नि ए ओर ये देखी की कि तिना रे रणे रिया जगा रे आग लगी गी, सेयो जवाणसा जेड़े कमजोर पड़ी गे, तिना रे शईरो रे बड़े द्वारो रे फल़े तोड़ी ते रे। 31 एक डाकिया दूजे डाकिये खे मिलणे ओर बेबीलोनो रे राजे खे ये सन्देश देणे खे दौड़ना कि तेरा शईर चऊँ कनारो ते लई ला रा। 32 जेथा ते लोक नदी पार करो थे से दुश्मणा रे वशो रे ऊईगा रा, नदिया बन्द करी ती रिया ओर सिपाई डरी गे रे। 33 कऊँकि इस्राएलो रा परमेशर, सेना रा यहोवा ईंयाँ बोलोआ, "बाबेल कणक काडणे रे खल्याणो जेड़ा ए, थोड़े ई दिना रे तेसरे बाडणे रा बखत आऊणा।" 34 यरूशलेमो रे लोक बोलोए, "बाबेलो रे राजा नबूकदनेस्सरे यरूशलेम शईरो पाँदे अमला कित्तेया ओर सेयो पीसी ते, तिने यरूशलेम खाली पांडे जेड़ा करी ता ओर तिने मगरमच्छो जेड़े यरूशलेम शईरो रे लोक निगल़ी ते ओर सेयो स्वाद खाणा जाणी की आपणा पेट तिना साथे परी ता, तिने सेयो जबरदस्ती निकयाल़ी ते।" 35 इजी री खातर यरूशलेम शईरो रे रणे वाल़ेया यहोवे खे बोलणा, "जो उपद्रव बेबीलोनो रे लोके आसा पाँदे करी राखेया ओर म्हारे शरीरो पाँदे ऊई रा, तेड़ा ई तिना पाँदे करेया जाओ। तेबे यरूशलेम शईरो रे लोका बोलणा कि जो अत्या बेबीलोनो रे लोके यरूशलेम शईरो रे करी राखिया, तेतेरा दोष कसदिया रे देशो दे रणे वाल़ेया पाँदे लगो।"

36 इजी री खातर यहोवा ईंयाँ बोलोआ, "मां यरूशलेम शईरो रे लोका रा मुकद्दमा लड़ना, मां बेबीलोनो रे तलाब ओर नदिया सुकाई देणे।* 37 बाबेल खण्डहर ओर गीदड़ा रे रणे री जगा ऊई जाणी ओर लोक तेसखे देखी की हैरान ऊणे ओर तिना मजाक करेया करना ओर तिदे कोई नि रणा। 38 बेबीलोनो रे लोक एकी साथे एड़े गरजणे जेड़ा जवान शेरो रे बच्चे शिकारो पाँदे गरजोए। 39 पर जेबे-जेबे बेबीलोनी उतावल़े ऊणे, तेबे मां तिना खे लग प्रकारो री पाट्टी बणाई की एड़े मतवाल़े करने कि सेयो पी की सदा खे सयी जाणे ओर कदी नि जागणे, यहोवे री येई बाणी ए। 40 मां सेयो पेडा रे बच्चे, बाकरे ओर खाडूआ जेड़े फाटी देणे।"

41 शेशक*, जेतेरी तारीफ सारी तरतिया पाँदे ओ थी, केड़ा लई ला? से केड़ा पकड़ी ता? बाबेल जातिया बीचे केड़ा सुनसाण ऊईगा? 42 बाबेलो पाँदे दुश्मण सिपाई अमला करने खे आई गा रा, से समुद्रो री बऊत सारी लईरा रे डूबी गा रा। 43 तेसरे शईर उजड़ी गे, तेसरा देश डराऊणा, सूका ओर रेगिस्तान ऊईगा रा, तिदे कोई माणूं नि रंदा ओर तिसिये कोई माणूं नि जांदा। 44 मां बाबेलो रे देवता बेलो खे सजा देणी ओर तिने जो कुछ निगल़ी ला रा, से तेसरे मुंए ते उगल़वाणा। एबे जातिया रे लोक फेर तेसरी तरफा खे नि चलणे, बाबेलो री दवाल टाल़ी जाणी। 45 यहोवा बोलोआ, "ओ मेरी प्रजा रे लोको, बाबेलो ते निकल़ी की आओ! आपणे-आपणे प्राण यहोवे रे पड़के रे रोषो ते बचाओ!*" 46 जेबे उडदी ऊई गल्ल तेस देशो रे सुणो, तेबे तुसा रा मन नि कबराओ ओर जो उडदी ऊई चर्चा तरतिया दे सुणी जाणी, तुसे तेते ते नि डरना, तेतेरे एक साल बाद एक ओर गल्ल उडदी ऊई आऊणी, तेबे तिजी ते बाद एक ओर गल्ल उडदी ऊई आऊणी ओर तेस देशो दे उपद्रव ऊणा ओर एक परदान दूजे रे खलाफ ऊणा। 47 इजी री खातर देखो, सेयो दिन आऊणे वाल़े ए, जेबे मां बाबेलो री कअड़ी रिया मूर्तिया पाँदे सजा देणे री आज्ञा देणी ओर सारे देशो रा मूँ काल़ा ऊई जाणा तेथो रे काये रे लोक तिदे ई पड़े दे रणे।

48 तेबे स्वर्गो रे दूता ओर तरतिया रे लोका बाबेलो पाँदे जयजयकार करनी, कऊँकि उत्तर दिशा ते सेना आऊणी ओर तेसा बेबीलोनो रा नाश करी देणा, यहोवे री येई बाणी ए।* 49 जिंयाँ बाबेलो रे लोके इस्राएलो रे लोक काये, तेड़े ई सारे देशो रे लोक तिदे ई काये जाणे। 50 यहोवा बेबीलोनो दे आपणे लोका खे बोलोआ, "ओ इस्राएलो रे तलवारी ते बचे दे लोको, नठो, खड़े नि रओ! यहोवे खे दूरा तेई याद करो ओर यरूशलेम शईरो री बी सम्बाल़ लओ। 51 आसे बेचैन ए, कऊँकि आसे आपणी बेज्जती सुणी राखी, यहोवे रे पवित्र मन्दरो रे परदेशी ओर पापी लोक कूसी गे रे, इजी बजा ते आसे शर्मिंदा ए। 52 इजी री खातर देखो, एड़े दिन आऊणे वाल़े ए कि मां बेबीलोनो री कअड़ी री मूर्तिया नाश करी देणियां ओर तेथो रे सारे देशो रे लोक कायल ऊई की कणदे रणे। 53 चाए बाबेल एड़ा ऊच्चा बणी जाओगा कि सर्गो साथे गल्ला करो ओर तेथो रे ऊच्चे गढ़ ओर बी मजबूत करी देयो, तेबे बी तेथो रा नाश करने खे लोक पेजणे, यहोवे री येई बाणी ए।" 54 बाबेलो ते चींगणे री आवाज सुणने लगी री! कसदिया रे देशो दे सत्यानाशो रा आल्ला सुणने लगी रा। 55 कऊँकि यहोवा बाबेलो खे नाश करने लगी रा ओर तेथो रे बड़े आल्ले खे बन्द करने लगी रा। इजी ते तिना रा आल्ला बड़े समुद्रो जेड़ा सुणोआ। 56 बाबेलो खे बी नाश करने वाल़े दुश्मण आईगे रे ओर तेथो रे शूरवीर पकड़ी ते रे ओर तिना रे धनुष तोड़ी ते रे, कऊँकि यहोवा बदला लणे वाल़ा परमेशर ए, तेस जरूर बदला लणा। 57 मां तेथो रे परदान, पुरोईत, अधिकारी, अमीर ओर शूरवीर एड़े मतवाल़े करने कि सेयो सदा खे सयी जाणे ओर फेर जागणे नि, सेना रा यहोवा, जेसरा नाओं राजेया रा राजा ए, तेसरी येई बाणी ए। 58 सेना रा यहोवा ईंयाँ बी बोलोआ, "बाबेलो री चौड़ी दवाल निऊँआ ते टाल़ी देणी ओर तेथो रे ऊच्चे दरवाजे आग लगाई की फूकी देणे। तिदे राज-राज रे लोका री मईणत बेकार ठईरनी ओर जातिया-जातिया री मईणत आगी रा ग्रा ऊई जाणी ओर सेयो थकी जाणे।" 59 यहूदा रे राजा सिदकिय्याह रे राज्य रे चौथे सालो दे जेबे तेस साथे सरायाह बी गया था, जो नेरिय्याह रा पाऊ ओर महसेयाह रा पोता ओर राजमईलो रा अधिकारी था, 60 तेबे यिर्मयाह भविष्यबक्ते तेसखे यो गल्ला सुणाईयां, मतलब सेयो सब गल्ला जो बाबेलो पाँदे पड़ने वाल़ी मुसीबता रे बारे दे लिखी राखिया, सेयो यिर्मयाहे कताबा दे लिखी तिया। 61 यिर्मयाहे सरायाह खे बोलेया, "जेबे तूँ बाबेलो दे पऊँछेगा, तेबे जरूर ये वचन पढ़ना 62 फेर प्रार्थना करो, ओ यहोवा, तैं तो एसा जगा खे नाश करने ओर इजी खे रेगिस्तानो दे बदलणे रा वादा करी राखेया था, जेती कोई बी माणूं या जानवर कदी नि रणा।" 63 ओ सरायाह, "जेबे तूँ एसा कताबा खे पढ़ी चुकेगा, तेबे ये एक पात्थरो साथे बानी की फरात नदिया बीचे सेटी देणी 64 ओर ये बोलणा कि ईंयाँ ई बाबेल डूबी जाणा ओर यहोवे एते पाँदे एड़ा संकट ल्याऊणा कि से फेर कदी नि उठणा। ईंयाँ तेथो री सारी मईणत बेकार ठईरनी ओर सेयो थके रे रणे।" एथो तक यिर्मयाह रे वचन ए।