1 योशिय्याह रे पाऊ यहूदा प्रदेशो रे राजा यहोयाकीमो रे राज रे चौथे सालो दे, जो बाबेलो रे राजा नबूकदनेस्सरो रे राज रा पईला साल था, तिदे यहोवे रा वचन यिर्मयाह नबीए गे पऊँचेया, 2 तेसखे यिर्मयाह नबीए सारे यहूदी लोका खे ओर यरूशलेम शईरो रे सारे रणे वाल़ेया गे बोलेया, से ये था, 3 आमोनो रे पाऊ यहूदा रे राजा योशिय्याह रे राज रे तेरूए सालो ते लई की आजके दिनो तक, मतलब तेई साला ते यहोवे रा वचन मांगे पऊँछदा आई रा ओर आऊँ बड़ी कोशिश करी की तिजी खे तुसा गे बतांदा आई रा, पर तुसे से नि सुणेया। 4 यहोवे आपणे दास नबी तुसा रे नेड़े बार-बार पेजे। पर तुसे तिना री नि सुणी। तुसे तिना रे सन्देशो रिया तरफा खे बिलकुल बी त्यान नि दितेया। 5 तिने नबीए बोलेया, "कि आपणी-आपणी बुरी चाल ओर आपणे-आपणे बुरे कामो ते फिरो, तेबे जो देश यहोवे पुराणे बखतो ते तुसा रे पितरा खे ओर तुसा खे बी सदा खे देई राखेया, तिदे बसे दे रयी सकोए, पर तुसे ना तो सुणेया ओर ना कान लगाया। 6 तुसे दूजे देवतेया पीछे चली की तिना गे माथा नि टेको या तिना री आराधना नि करो ओर ना आपणी बणाई रिया चीजा रे जरीये माखे रोष चढ़ाओ, तेबे मां तुसा रा कोई नुकशाण नि करना।" 7 ये सुणी की बी तुसे मेरी नि मानी, बल्कि आपणे आथो साथे बनाई रिया मूर्तिया री पूजा करने रे जरीये माखे रोष चढ़ांदे आई रे, जेते कि तुसा रा नुकशाण ई ऊई सकोआ, यहोवे री येई बाणी ए। 8 इजी री खातर सेना रा यहोवा एड़ा बोलोआ, "तुसे जो मेरे वचन नि माने, 9 इजी री खातर सुणो, मां उत्तरा रिया तरफा दे रणे वाल़े सारे कुल बुलाणे ओर आपणा दास बाबेलो रा राजा नबूकदनेस्सर बुलाई की पेजणा ओर सेयो सारे यहूदा ओर तेथो रे रणे वाल़ेया ओर सारे पड़ोसी देशा रे खलाफ लड़ाई करने खे लई आऊणा ओर मां एस सारे देशो रा सत्यानाश करी की यो एड़े उजाड़ी देणे कि लोका इना खे देखी की चाड़िया बजाया करनिया, बल्कि यो सदा उजड़े दे रणे, यहोवे री येई बाणी ए। 10 तेबे मां एड़ा करना कि इना खुशी ओर आनंदो री कोई आवाज नि सुणनी, ब्याओ री पाट्टिया दे लाड़े-लाड़िया री खुशिया री आवाज, प्यागा रे बखतो दे आथो री चाक्किया री आवाज सुणनी बन्द ऊई जाणी ओर सांजा रे बखते कअरा दे दिऊआ नि बल़ना।* 11 यहूदा रा ये सारा प्रदेश उजाड़ ई उजाड़ ऊणा ओर सारा यहूदा ओर पड़ोसी देश सत्तर साला तक बाबेलो रे राजे रे वशो दे रणियां। 12 कऊँकि जेबे सत्तर साला री कैद बीती जाणी, तेबे मां बाबेलो रे राजा ओर तेसा जातिया रे लोका खे ओर कसदिया रे देशो दे सब रणे वाल़ेया खे तिना रे पापो री सजा देणी, यहोवे री येई बाणी ए ओर मां बाबेलो रे लोका रा देश सदा खे उजाड़ बणाई देणा। 13 मां बेबीलोनो रे देशो दे आपणे सेयो सारे वचन पूरे करने, जो मैं तेथो रे बारे दे बोली राखे ओर जितणे वचन यिर्मयाहे सारी जातिया रे खलाफ भविष्यबाणी करी की कताबा दे लिखी राखे। 14 कऊँकि बऊत सारी जातिया रे लोका ओर बड़े-बड़े राजेया बी बेबीलोनो ते आपणी सेवा करवाणी ओर मां तिना खे मेरे लोका खे ऊए दे दु:खो रे मुताबिक सजा देणी।*"

15 तेबे इस्राएलो रे परमेशर यहोवा मांगे ये बोलेया, "मेरे आथो ते ये रोषो रे शराबो रा कटोरा लई की तिना सबी जातिया खे पल़्याई दे, जिना गे आऊँ ताखे पेजुँआ।* 16 सेयो तिजी खे पी की तेसा तलवारी रिया बजा ते जो मां तिना पाँदे चलवाणी, लड़खड़ाणे ओर पागल ऊई जाणे" 17 तेबे मैं यहोवे रे आथो ते से कटोरा लई की तिना सबी जातिया खे, जिना गे यहोवे आऊँ पेजेया, पल़्याई ता। 18 मैं ये शराब यरूशलेम ओर यहूदा रे शईरो दे रणे वाल़े ओर तेथो रे राजेया ओर अधिकारिया खे पल़्याई ता, ताकि तिना रा देश उजाड़ ऊई जाओ ओर लोक चाड़िया बजाओ ओर तेथो रा उदारण देई की स्राप देया करो, जेड़ा आजकाल ओआ। 19 मैं मिस्रो रे राजे खे बी कटोरे दे पल़याया। तेसरे सारे अधिकारिया ओर कर्मचारिया ओर सारी प्रजा खे यहोवे रे गुस्से रे कटोरे ते पल़याया। 20 ओर सारे परदेशी माणूंआ री जातिया खे ओर ऊज देशो रे सबी राजेया खे, ओर पलिश्तिया रे देशो रे सबी राजेया खे, अश्कलोन, गाजा, एक्रोनो रे पलिश्ती शईरो रे राजा ओर अशदोदो दे रणे वाल़े लोका खे; 21 ओर एदोमी, मोआबी ओर अम्मोनिया रे सबी लोका खे तेस कटोरे ते पल़याया। 22 ओर सोर ओर सिदोनो रे सारे राजेया खे ओर समुद्रो ते पारले देशो रे राजेया खे बी तेस कटोरे ते पल़याया। 23 तेबे ददान, तेमा ओर बूज शईरो रे रणे वाल़े लोक ओर जितणे दाढ़ी बणवाओए, तिना सबी खे जो अरब देशो री उजाड़ जगा दे दूर-दूर इलाकेया दे रणे वाल़े लोका खे, 24 ओर अरब देशो रे सबी राजेया खे, बणो रे रणे वाल़े दोगले माणूंआ रे सबी राजेया खे; 25 जिम्री, एलाम, मादै रे सबी राजेया खे, 26 क्या नेड़े, क्या दूरो रे उत्तर दिशा रे सबी राजेया खे एकी साथे पल़्याया, ईंयाँ पूरी तरतिया रे रणे वाल़े दुनिया रे राज रे सारे लोका खे मैं पल़्याया। इना सबी ते बाद शेशको रे राजे खे बी पीणा पड़ना।

27 तेबे तैं तिना खे बोलणा कि सेना रा यहोवा जो इस्राएलो रा परमेशर ए, ईंयाँ बोलोआ, "पियो ओर नशेड़ी ऊई जाओ ओर उल्टी करो, रूड़ी जाओ ओर फेर कदी नि उठो, कऊँकि ये तेसा तलवारी साथे ऊणा, जो मां तुसा बीचे चलाणी।"* 28 जे सेयो तेरे आथो ते ये कटोरा लई की पीणे ते ना करोगे तो तिना खे बोलणा, "सेना रा यहोवा ईंयाँ बोलोआ कि तुसा खे जरूर पीणा पड़ना। 29 देखो, जेस शईरो खे मेरा बोलोए, मां तेस पाँदे ई पईले मुसीबत ल्याऊणी, तेबे तुसे लोक निर्दोष ऊई की नि बचणे, कऊँकि आऊँ तरतिया रे सबी रणे वाल़ेया पाँदे तलवार चलाणे वाल़ा ए, सेना रे यहोवे री येई बाणी ए।"*

30 ओ यिर्मयाह, इतणिया गल्ला भविष्यबाणी करी की तिना साथे करी की ये बी बोलणा, "यहोवा ऊबे स्वर्गो ते गरजणा ओर आपणी पवित्र जगा स्वर्गो ते आपणा शब्द सुनाणा, से आपणी चराईया री जगा रे खलाफ जोरे की गरजणा; तेस तरतिया पाँदे रणे वाल़े सबी रे खलाफ बी दाख मांडणे वाल़े जेड़ा ललकारना।* 31 तरतिया रे कूणेया तक बी तेसरे न्याय री आवाज ऊणी, कऊँकि सबी जातिया साथे यहोवे रा मुकद्दमा ए; तेस सबी माणूंआ साथे बईस करनी ओर दुष्ट तलवारी रे वशो रे करी देणे।" 32 सेना रा यहोवा ईंयाँ बोलोआ, "देखो, मुसीबत एकी जातिया ते दूजी जातिया बीचे फैलणी ओर बड़ा तूफान तरतिया रे कनारे ते उठणा। 33 तेस बखते यहोवे रे काये रेया रिया लाशा तरतिया रे एक कनारे ते दूजे कनारे तक पड़ी रिया रणियां। तिना रिया तँईं कोई बी रोणे-पीटणे वाल़ा नि रणा ओर तिना रिया लाशा ना तो कट्ठिया करिया जाणिया ओर ना ई कब्रा रे राखिया जाणिया, सेयो जमीना दे गोबरो जेड़िया पड़िया री रणियां। 34 ओ गवाल़ेओ, लाणत ए तुसा पाँदे ओर चींगो, ओ तगड़े खाडूओ ओर बाकरेयो, स्वाई दे मरेलो, कऊँकि पेडा जेड़े तुसा रे फाटणे रे दिन आईगे दे ओर मां अच्‍छे लगणे वाल़े पांडेया जेड़ा तुसा रा सत्यानाश करना।* 35 तेस बखते ना तो गवाल़ेया खे नठणे खे कोई जगा रणी ओर ना ई तगड़े खाडू ओर बाकरे नठी सकणे। 36 गवाल़ेया रा चींगणा ओर तगड़े खाडू ओर बाकरेया रे बासणे री आवाज सुणने लगी री, कऊँकि यहोवे तिना री चराई नाश करनी, 37 ओर यहोवे रा रोष पड़कणे रिया बजा ते शान्तिया री जगा नाश ऊई जाणी, जिना रे रणे रिया जगा रे एबे शान्ति ए, सेयो नाश ऊई जाणिया। 38 जवान शेरो जेड़े यहोवा आपणे डवारा खे छाडी की निकल़ोआ, कऊँकि अन्देर करने वाल़ी तलवार ओर पड़के रे रोषो रिया बजा ते तिना रा देश उजाड़ ऊई जाणा।"