1 यिर्मयाह शकाईत करोआ, "ओ यहोवा, जे आऊँ तां साथे मुकद्दमा लड़ूँ, तेबे बी तूँ तर्मी ए, माखे आपू साथे इजी रे बारे दे बईस करने दे। दुष्ट लोका री चाल सफल कऊँ ओई? क्या बजा ए कि विश्वासघात करने वाल़े बऊत सुखी रओए? 2 तूँ तिना बुरे लोका खे बाएआ ओर सेयो जड़ बी पकड़ोए, सेयो बढ़ोए ओर फल़ो बीए, तूँ तिना रे मुंए रे नेड़े ए, पर तिना रे मनो ते दूर ए।" 3 ओ यहोवा, तूँ माखे जाणेआ, तूँ माखे देखेआ ओर तैं मेरे मनो री परीक्षा करी की देखेया कि आऊँ तेरी तरफा खे पवित्र किंयाँ रऊँआ। जेड़िया पेडा-बाकरिया फाटणे खे चूण्डो बीचा ते बारे काडिया जाओईया, तेड़े ई मेरे दुश्मणा खे बी खींजी की निकयाल़ी लो ओर फाटणे रे दिनो खे त्यार कर।* 4 कितणे ज्यादा बखतो तक जमीन सूकी पड़ी गी री ओर सारे मैदानो रा काआ बी सूकीगा रा। देशो रे रणे वाल़ेया री बुराईया रिया बजा ते डांगर-पंछी सारे नाश ऊईगे रे कऊँकि तिने लोके बोलेया, "परमेशरो म्हारा अन्त नि देखणा।"

5 यिर्मयाह, जे तू माणूंआ साथे ई दौड़ी की थकी गा रा, तेबे तुसे कोड़ेया साथे किंयाँ बराबरी करी सकोए? तेबे बी तूँ शान्तिया रे एस देशो दे बिना डरे ए, पर यरदन नदिया रे नेड़े-तेड़े रे जंगल़ो रे तां क्या करना? 6 कऊँकि एथो तक कि तेरे रिश्तेदार, तेरे आपणे कअरो रे लोके बी तां साथे विश्वासघात करी राखेया, सेयो तां पीछे ललकारोए, चाए सेयो तां साथे मीठिया गल्ला बी बोलो, तेबे बी तिना पाँदे परोसा नि करेया। 7 यहोवा बोलोआ, "मैं आपणे इस्राएलो रे लोक छाडी ते दे ए, मैं आपणा चूणेया दा देश छाडीता, जिना खे आऊँ प्यार करुँ था सेयो मैं आपणे दुश्मणा रे वशो रे करीते। 8 कऊँकि मेरा आपणा इस्सा मां सामणे बणो रे शेरो जेड़ा ऊईगा ओर मेरे खलाफ गरजेया, इजी बजा ते मैं तेस साथे बैर कित्तेया।" 9 क्या मेरा आपणा इस्सा मेरी नजरा रे चिटकाबरे शिकारी पंछिये जेड़ा नि ए? क्या शिकारी पंछिये से चऊँ कनारे ते केरी राखेया? ताकि सेयो काओ ओर तिना रा मास खाओ। जाओ सबी बणो रे जानवरा खे कट्ठा करो, तिना खे ल्याओ ताकि खाई जाओ। 10 बऊत सारे परदेशी राजेया मेरा अंगूरा रा बगीचा खराब करी ता, तिने मेरा इस्सा नाश करी ता, बल्कि मेरा सुन्दर इस्से रा डोरू सुनसाण जंगल़ बणाईता। 11 तिने से उजाड़ी ता, से ऊजड़ी की मां सामणे रोणे लगी रा। सारा देश ऊजड़ी गा रा, तेबे बी कोई नि सोचदा। 12 आसा रे दुश्मणा रे सिपाई बंजर टीलेया पाँदे नाश करने वाल़े चढ़ी की आई रे, कऊँकि यहोवे री तलवार देशो रे एक कनारे ते दूजे कनारे तक निगल़ने लगी री, केसी माणूंए खे शान्ति नि मिलदी। 13 मेरे लोके कणक तो बायी, पर कांडेवाल़े डाल़ बाडे, तिने कष्ट तो कित्तेया, पर तिजी ते कोई फायदा नि ऊआ। यहोवे रे रोषो रे पड़कणे रिया बजा ते, तुसे आपणे डोरूआ री फसला रे बारे दे शर्मिंदा ए।

14 मेरे दुष्ट पड़ोसी तेस इस्से पाँदे आथ लगाओए, जेतेरा इस्सेदार मैं आपणी प्रजा इस्राएल बणाई राखेया। तिना रे बारे दे यहोवा ईंयाँ बोलोआ, "मां सेयो तिना री जमीना ते पट्टी देणे ओर यहूदा रा कराना बी तिना बीचा ते खत्म करी देणा। 15 इना सारे लोका रे पट्टणे ते बाद मां तिना पाँदे फेर दया करनी ओर तिना बीचा ते हर एक तेसरे आपणे इस्से दे ओर सब गोत्र मां आपणी जमीना दे फेर लगाणे।* 16 आऊँ चाऊँआ कि सेयो लोक मेरी प्रजा री चाल सीखी की मेरे ई नाओं री कसम, यहोवे रे नाओं री कसम खाणे लगोगे, जिंयाँ तिने मेरी‍ प्रजा खे बाल देवते री कसम खाणा सिखाया था, तेबे मेरी‍ प्रजा बीचे तिना रा कराना बी बढ़ना। 17 पर अगर सेयो मेरी गल्ल नि मानोगे, तो मां से जाति एड़ी पट्टणी कि से फेर कदी नि बढ़नी, यहोवे री येई बाणी ए।"