यिर्मयाह 47

पलिश्तिया रे बारे दे परमेशरो रा सन्देश

1 फिरौनो रे जरीये पलिश्तिया रा शईर गाजा जितणे ते पईले यिर्मयाह भविष्यबक्ते गे पलिश्तिया रे बारे दे यहोवे रा ये वचन पऊँचेया, 2 यहोवा ईंयाँ बोलोआ, "देखो, एक दुश्मण सेना उत्तर दिशा ते आऊणे वाल़ी बाढ़ा वाल़ी नदिया जेड़े पलिश्तिया रे देशो खे तिजी सबी समेत जो तिदे ए, ओर रणे वाल़ेया साथे शईर डबोई देणा, तेबे माणूं मतादा रिया तँईं चींगणे, बल्कि देशो दे सबी रणे वाल़ेया हाय-हाय करनी। 3 दुश्मणा रे तागतबर कोड़ेया री टाप, रथो रे तेज चलणे ओर तिना रे टईरो रे चलणे रा शाद सुणी कि बाओ रे आथ-पैर एड़े टीले ऊई जाणे कि तेस मूँ मोड़ी की आपणे बच्चे पनि देखणे। 4 कऊँकि सारे पलिश्तिया रे नाश ऊणे रा दिन आऊणे वाल़ा ए ओर सोर ओर सिदोन शईरा रे बचे दे मतदगार खत्म ऊई जाणे, कऊँकि यहोवा पलिश्तिया खे जो कप्तोर नाओं रे समुद्रो *47:4 कप्तोर नाओं रे समुद्रो क्रेते द्वीप रे कनारे बचे दे रणे वाल़े ए, तिना खे बी नाश करने वाल़ा ए। 5 गाजा रे लोके सिरो रे बाल़ कटायी राखे, अश्कलोन जो पलिश्तिया रे नीचानो दे कल्ला रयी गा रा, से बी खत्म करी ता रा, तां कदुओ तक आपणा शरीर चीरदे रणा?*47:5 ये संदर्भ शोगो खे बऊत ई दु:खो री नशाणिया रे रूपो दे बताणे खे ए। " 6 ओ पलिश्तियो, रोओ, ओ यहोवे री तलवार, तूँ कदुओ तक शान्त नि ऊणी? तूँ आपणे म्यानो दे कूसी जा, शान्त ओ ओर रूकी जा! 7 पर यहोवे री तलवार किंयाँ रूकी सकोई? कऊँकि यहोवे ताखे आज्ञा देई की अश्कलोन ओर समुद्रो रे कनारे रणे वाल़े लोका रे खलाफ ठराई राखी।