यिर्मयाह 4

बरदान या अभिशाप

1 यहोवे री ये वाणी ए, "ओ इस्राएलो रे लोको, जे तुसे वापस आई जाओ, तो मांगे आओ। जे तुसे तिना घृणित मूर्तिया खे जिना ते आऊँ नफरत करूँआ मेरे सामणे ते दूर करो, तो तुसा खे आबारा नि फिरना पड़ना। 2 ओर जे तुसे सच्चाई ओर न्याय ओर तर्मो साथे यहोवे री जिन्दगिया री कसम खाओ, तो जातिया-जातिया तेसरी बजा ते आपणे आपू खे तन्य बोलणा ओर तेस पाँदे ई कमण्ड करना।" 3 कऊँकि यहूदा ओर यरूशलेम शईरो रे लोका खे यहोवे ईंयाँ बोली राखेया, "जो तुसा री आपणी जमीन ए, तिदे बीज बाओ ओर कांडेवाल़े जाड़ो दे बिऊ नि लगाओ। 4 ओ यहूदा रे लोको ओर यरूशलेमो रे लोको यहोवे खे आपणा खतना करो; ओर आपणे आपू खे समर्पण करो, नई तो तुसा रे सारे बुरे कामा रिया बजा ते मेरा रोष आगी जेड़ा पड़कणा ओर एड़ा ऊणा कि तेसा आगी खे बजयाणे वाल़ा कोई नि ऊणा।"*4:4 बिध. 10:16, बिध. 30:6

उत्तर दिशा ते मुसीबत ओर सत्यानाश

5 यहूदा रे लोका बीचे एते सन्देसो रा प्रचार करो ओर यरूशलेम शईरो रे हर एक आदमिए ते बोलो, "पूरे देशो दे चतौणी देणे खे रड़सिंगा बजाओ, गल़ा खोली-खोली की ललकारो ओर बोलो, ‘आओ, आसे कट्ठे ऊई की गढ़वाल़े शईरो खे जाऊँए!’ 6 सिय्योनो री बाटा दे चण्डा लहराओ, कि लोका खे बाटा रा पता लगी जाओ। शईरो दे नि रूको बल्कि सुरक्षित जगा खे नठी जाओ; कऊँकि आऊँ उत्तर दिशा ते बिपदा ओर सत्यानाश करने वाल़ा दुश्मण ल्याऊणा। 7 एक शेर आपणी गुफा बीचा ते निकल़ेया, देशा रा नाश करने वाल़ा दुश्मण चढ़ाई करी की आऊणे लगी रा, से निकल़ी की आपणी जगा ते इजी खे निकल़ी रा ताकि तुसा रे यहूदा प्रदेशो खे उजाड़ी देयो ओर तुसा रे शईरा खे एड़ा सुनसाण करी देयो कि तिना रे कोई नि बसी सको। 8 इजी री खातर आपणे लको दे शोगो री टाट बानो, रोओ ओर हाय-हाय करो; कऊँकि यहोवे रा पड़केया रा रोष आसा पाँदा ते टल़ी नि रया। 9 यहोवे रे सजा वाल़े दिने यहूदा रे राजे रा ओर परदाना रा दिल डरी जाणा, पुरोईत ओर नबी हैरान ऊणे।" यहोवे री येई बाणी ए।

10 तेबे मैं मतलब यिर्मयाहे बोलेया, "हाय, यहोवा मेरे परमेशर, तैं तो ये बोली की, कि ताखे शान्ति मिलणी, पक्का आपणी एसा प्रजा खे ओर यरूशलेम शईरो खे बी बड़ा तोखा देई राखेया, कऊँकि म्हारे दुश्मण आपणी तलवारा ते आसा खे काणे वाल़े ए।" 11 तेस बखते तेरी एसा प्रजा खे ओर यरूशलेम शईरो रे लोका खे बी ये बोलेया जाणा, "जंगल़ो रे बंजर टीलेया पाँदा ते प्रजा रे लोका रिया तरफा खे लू लगी री आऊणे, से एड़ी अवा नि ए जेते साथे पाल़ा पड़ना या बर्खा ऊणी ओ, 12 पर मेरी तरफा ते एड़े कामा खे बऊत प्रचण्ड अवा चलणी। एबे मां यहूदा रे लोका रे खलाफ आपणे न्याय री आज्ञा देणी।"

यहूदा रा दुश्‍मणा ते किरेया जाणा

13 देखो, देशो खे नाश करने वाल़ा म्हारा दुश्मण बादल़ो जेड़े चढ़ाई करी की आऊणे लगी रा, तिना रे रथ पऊण-चूखाने जेड़े ओर तिना रे कोड़े उकाबो ते बी जादा तेज दौड़ोए। आसा पाँदे हाय, आसे नाश ऊईगे! 14 ओ यरूशलेम शईरो रे लोको, आपणा मन बुराईया ते तोई दो, आपणे मनो खे पवित्र करो, जेते कि तुसा रा उद्धार ऊई जाओ। तुसा कदुओ तक बुराईया करदे रणा? 15 कऊँकि दान शईरो ते दूतो री आवाज सुणने लगी री ओर एप्रैमो रे पाह्ड़ी प्रदेशो ते बुराईया रा सन्देश आऊणे लगी रा। 16 जातिया-जातिया दे सुणाई देयो, यरूशलेम शईरो रे खलाफ बी एतेरा सन्देश देओ अमला करने वाल़े दूर देशो ते आई की यहूदा रे शईरो रे खलाफ ललकारने लगी रे। 17 दुश्मणे यरूशलेम एड़ा केरेया जिया डोरूए री रखवाल़ी करने वाल़े लोक ओ। यहूदा तू मेरे खलाफ गया ओर तेरे खलाफ दुश्मण आऊणे लगी रे! यहोवे री येई बाणी ए। 18 ये तेरी चाल ओर तेरे कामो रा ई फल ए। ये तेरी दुष्टता ए ओर बऊत दु:ख देणे वाल़ी ए, इजी साथे तेरा दिल छिदी जाऊणा।

यिर्मयाह रा रोणा

19 हाय! हाय! मेरा दिल पीतरे ई पीतरे तड़फोआ! ओर मेरा मन कबराओआ, आऊँ चुप नि रयी सकदा, कऊँकि ओ मेरे प्राण, रड़सिंगे री आवाज ओर युद्धो री ललकार तां तक पऊँची री। 20 नाशो पाँदे नाश ऊणे रा सन्देश आऊणे लगी रा, सारा देश नाश ऊईगा रा। अचाणक मेरे डेरे ओर मेरे तम्बू लूटी ते रे। 21 ओ यहोवा, माखे कितणे दिना तक दुश्मणा ते लड़ाईया दे चण्डे ओर लड़ाईया दे रड़सिंगे री आवाज सुणनी पड़नी? 22 यहोवे बोलेया, "मेरे लोक मूर्ख ए, सेयो माखे नि जाणदे, सेयो एड़े मूर्ख बच्चे ए, जिना रे कोई समज नि ए। सेओ बुराई करने रे तो सेयो उशयार ए, पर सेयो पलाई करना नि जाणदे।"

विनाशो रा दर्शण मिलणा

23 यहोवे माखे दर्शण दित्तेया ओर तिदे मैं देखेया, "मैं तरतिया पाँदे देखेया, तरती सून्नी ओर सुनसाण पड़ी री थी ओर सर्गो रे ओर तिदे कोई प्रयासा नि था। 24 मैं पाह्ड़ देखे, सेयो ईलणे लगी रे थे ओर सारी पाह्ड़िया बी ईलणे लगी रिया थिया। 25 तेबे मैं त्यानो साथे तरतिया खे देखेया, पर कोई माणूं पनि था ओर सारे पंछी बी उडी गे थे।" 26 फेर आऊँ क्या देखूँआ कि यहोवे रे पड़के रे रोषो रिया बजा ते उपजाऊ देश जंगल़ ओर तेथो रे सारे शईर खण्डहर ऊईगे थे। 27 यहोवे ये बताया, "यहूदा रा सारा देश उजाड़ ऊई जाणा; तेबे बी मां तेसरा अन्त नि करना। 28 इजी बजा ते तरती रोणी ओर सर्गो शोगो रे काल़े टाल्ले पईनणे, कऊँकि मैं ठाणी ता रा कि मां एड़ा ई करना ओर बोली बी राखेया, मां एड़ा करने ते नि पछताणा ओर ना आपणे प्राण छाडणे।" 29 शईरो रे सारे लोक सवारा ओर धनुष चलाणे वाल़ेया रा आल्ला सुणी की नठणे लगी रे, सेयो जाड़ो दे कूसोए ओर चट्टानी पाँदे चढ़ी जाओए, सारे शईर बिना माणूंआ ते ऊईगे ओर इना रे कोई बाकी नि रया। 30 ओर जेबे ओ यरूशलेम, तूँ बर्बाद ऊईगी तेबे क्या करना? चाए तूँ लाल रंगो रे टाल्ले पईने ओर सूईने रे गईणे पईने ओर आपणी आखी रे काजल़ लगाए, पर तां बेकार ई सजणा। कऊँकि तेरे दोस्त ताखे नकम्मी जाणोए, सेयो तेरे प्राणो री टोल़ा रे ए। 31 कऊँकि मैं पईले ई यरूशलेम शईरो रे लोका री जोरे की चींगणे री आवाज सुणी राखी, सेयो तेड़े चींगणे लगी रे, जेड़ा कोई जवाणस पईला बच्चा पैदा करदे ऊए चींगोई, ये यरूशलेमो रे लोका री आवाज ए, जो थकी री ओर आथ फैलायी की चींगदे ऊए बोलोई, "लाणत ए माखे! सेयो अत्यारे माखे काणे खे आऊणे लगी रे।"