1 यहोवा यरूशलेम शईरो रे लोका खे बोलोआ, "यरूशलेम शईरो री सड़का दे ओरे-पोरे जाई की देखो! तिना रे चौका दे टोल़ो जे कोई एड़ा मिली जाओ जो न्याय साथे काम करो ओर सच्चाईया खे टोल़ने वाल़ा ओ; तो मां यरूशलेम शईरो रा सारा पाप माफ करी देणा ओर से नाश नि करना। 2 चाए यरूशलेमो रे रणे वाल़े लोक यहोवे री जिन्दगिया री कसम बी खाओ, तेबे बी सेयो पक्का चूठी कसम खाओए।"

3 ओ यहोवा क्या तेरी नजर सच्चाईया पाँदे नि ए? तैं तिना खे सजा दित्ती, पर सेयो दु:खी नि ऊए, तैं सेयो नाश कित्ते, पर तिने परवाह् नि कित्ती। तिने आपणा मन चट्टानी ते बी जादा काठा करी ता, तिने आपणे पापा ते पश्चाताप करने ते ना करी ती। 4 तेबे मैं सोचेया, "यो लोक तो कंगाल़ ओर नासमज ई ए, कऊँकि यो आपणे परमेशर यहोवे री बाट ओर नियम नि जाणदे। 5 इजी री खातर मां यहूदा रे परदाना गे जाई की तिना गे सुनाणा, कऊँकि सेयो आपणे यहोवे री बाट ओर आपणे परमेशरो रे नियम जाणोए।" पर तिने सबी परमेशरो पीछे चलणा छाडीता रा ओर बन्दन खोली ते रे। 6 इजी बजा ते बणो ते एकी शेरो आई की सेयो काई देणे, रेगिस्तान देशो रे एक भेड़िये सेयो मारी देणे ओर एक चीता तिना रे शईरो दे ताक लगाई की रणा ओर जो कोई तेस शईरो ते बारे जाणे वाल़े केसी खे बी फाड़ी सकोआ, कऊँकि तिना रे पाप बऊत बढ़ीगे रे ओर सेयो मांते बऊत ई दूर अटी गे रे। 7 यहोवा यहूदा रे लोका ते पूछणे लगी रा, "मां कऊँ तेरे पाप माफ करने, तुसा रे बच्चेया माखे छाडी की तिना री कसम खाई राखी, जो परमेशर नि ए। जेबे मैं तिना रा पेट परी ता, तेबे तिने व्याभिचार कित्तेया ओर वेश्या साथे आपणा बखत बिताया। 8 सेयो तिना कोड़ेया जेड़े रऐ जिना खे बऊत खाणे खे आये, ओर जो जोड़ा बनाणे खे सेओ तिना कोड़ेया जेड़े रओ जो आपणे-आपणे पड़ोसिये री लाड़िया साथे व्याभिचार करने लगे। 9 क्या मां यहूदा रे लोका खे एड़े बुरे कामो री तिना खे सजा नि देणी? यहोवे री येई बाणी ए, क्या आऊँ एड़ी जातिया ते आपणा बदला नि लऊँ?"

10 दवाला पाँदे चढ़ी की तिजी रा नाश तो करो तेबे बी तिना रा अन्त नि करो; तिना नि जड़ रणे देयो, पर तिना री डाल़िया खे तोड़ी की सेटी देयो, कऊँकि सेयो यहोवे रिया निया। 11 यहोवे री बाणी ए कि इस्राएल ओर यहूदा रे कराने मां साथे बड़ा पारी विश्वासघात करी राखेया। 12 यहूदा ओर इस्राएलो रे लोके यहोवे रे बारे दे चूठ बोली राखेया, "तिने बोलेया यहोवे आसा रा कुछ नि करना। आसा लोका रा कुछ बी बुरा नि ऊणा। आसा केसी सेना रा अमला आपू पाँदे नि देखणा ओर ना आसे कदी पूखे मरने। 13 भविष्यबक्ता अवा ऊई जाणे, तिना दे परमेशरो रा वचन नि ए। तिना साथे एड़ा ई करेया जाणा!"

14 इजी बजा ते सेना रा परमेशर यहोवा ईंयाँ बोलोआ, "यो लोक जो एड़ा बोलोए, इजी री खातर देख, मां आपणा वचन तेरे मुंए रे आग ओर ये प्रजा लक्कड़ बनाणी ओर तेसा आगी से फूकी देणी।* 15 यहोवे री ये बाणी ए, ओ इस्राएलो रे लोको, देख, मां तुसा रे खलाफ दूरा ते एड़ी जाति चढ़ाई की ल्याऊणी, जो सामर्थी ओर पुराणी ए, तुसा खे तिना री पाषा समज नि आऊणी ओर ना तुसा खे पता लगणा कि सेयो लोक क्या बोलणे लगी रे। 16 तिना रा तरकश खुली री कब्र ए ओर सेयो सारे के सारे शूरवीर ए। 17 तिना सैनिका तुसा रे पाक्के रे डोरू ओर खाणे-पीणे रिया चीजा जो तुसा रे बच्चेया रिया तँईं ए, तिना सेयो खाई जाणिया। तिना तुसा रिया पेडा-बाकरिया ओर गायी बल़द खाई देणे, तिना तुसा रे अंगूर ओर दाऊगल़े खाई देणे ओर जिना गढ़वाल़े शईरा पाँदे तुसे परोसा राखोए, तिना से तलवारी साथे नाश करी देणे।" 18 ये सन्देश यहोवे रा ए, तेबे बी यहोवा ईंयाँ बोलोआ, "एथो तक कि नाशो रे तिना दिना दे बी मां तुसा रा अन्त नि करना। 19 यहूदा रे लोका जेबे तुसा ते पूछणा कि म्हारे परमेशर यहोवा आसा साथे यो सारे काम कऊँ कित्ते, तेबे तुसे तिना खे बोलणा कि जिंयाँ तुसे माखे छाडी की आपणे देशो रे दूजे देवतेया री सेवा कित्ती, तिंयाँ ई तुसा खे दूजे देशो दे परदेशिया री सेवा करनी पड़नी।"

20 यहोवे मांते बोलेया, याकूबो रे वंशो रे लोका दे ये प्रचार करो ओर यहूदा दे ये सुणाओ, 21 "ओ मूर्ख ओर बेअकल लोको, तुसे जो आखी ऊँदे ऊए पनि देखदे, जो कान ऊँदे ऊए पनि सुणदे, ये सुणो।* 22 यहोवे री ये बाणी ए कि क्या तुसे लोक मेरा डर नि मानदे? क्या तुसे मां सामणे नि थरथरांदे? मैं बालू समुद्रो रा बन्ना बणाई की युगो-युगो खे एड़ा बांद ठराया कि से तिजी खे पार नि करी सको ओर चाए समुद्रो रिया लईरा बी उठो, तेबे बी सेयो प्रबल नि ऊणिया ओर चाए से गरजो तेबे बी बन्ने खे पार नि करी सको। 23 पर यहूदा रे लोक टीठ ए ओर बगावत करने वाल़ा मन ए, इने बगावत कित्ती ओर दूर ऊईगे। 24 यहूदा रे लोक मनो रे इतणा पनि सोचदे कि म्हारा परमेशर यहोवा बरसाती रे शुरूए रा ओर अन्तो रा पाणी बखतो पाँदे बरसाओआ ओर बडाईया रे ठराए रे अफ़्ते आसा खे राखोआ, इजी री खातर आसा खे तेसरा डर मानणा चाईयो।* 25 यहूदा रे लोक तुसा रे पापो रे कामो रिया बजा ते सेयो रूकी गे ओर तुसा रे बुरे कामो रिया बजा ते तुसा री पलाई नि ऊँदी। 26 मेरी प्रजा रे लोका बीचे पापी लोक रओए, सेयो जाल़ लगाई की माणूंआ खे आपणे वशो दे करी लओए। 27 इना लोका रे कअर चूठो साथे एड़े परे रे रओए जेड़े शकारिये रे पिंजरे पक्षिया ते परे दे ओए, तेड़े ई तिना रे कअर कपटो साथे परे रे रओए, ईंयाँ ई सेयो बढ़ीगे ओर अमीर ऊईगे। 28 जो पाप तिने कित्ते बुरे काम करी की बन्ना पार करी ता रा, सेयो न्याय, खास करी की अनाथा रा न्याय नि चुकांदे, इजी ते तिना रे काम नि बणदे, सेयो गरीबा रा अक्क पनि दलांदे। 29 इजी री खातर यहोवे री ये बाणी ए, पक्का मां इना गल्ला री सजा तिना खे देणी। क्या आऊँ एड़ी जातिया ते बदला नि लऊँ?" 30 एते प्रदेशो दे एड़ा काम ओआ जेते साथे हैरान ओर रोंमाच ऊणा चाईयो। 31 भविष्यबक्ता चूठी-मूठी भविष्यबाणी करोए ओर पुरोईत तिना रे बलबूते पाँदे राज करोए, मेरी प्रजा खे ये अच्छा लगोआ, पर एस बखतो री मुसीबता रे दिने मतादा खे केते कनारो खे जाणे?