1 यहूदा प्रदेशो रे राजा सिदकिय्याह रे राजो रे नऊए सालो रे दसुए मीन्ने दे, बाबेलो रे राजा नबूकदनेस्सरे आपणी सारी सेना समेत यरूशलेम शईरो पाँदे अमला करने खे से केरी ता; 2 ओर सिदकिय्याह रे राज रे ग्यारुए सालो रे चौथे मीन्ने रे नऊए दिने यरूशलेम शईरो रिया दवाला तोड़ी तिया। 3 जेबे यरूशलेम लई ला, तेबे नेर्गलसरेसेर, समगर्नबो, ओर खुसरेया रा परदान सर्सकीम ओर मगो रा परदान नेर्गलसरेसेर, बाबेल राजे रे सारे परदान बीचले बड़े द्वारो दे आई की बैठीगे ताकि ये दखाई सको कि शईरो पाँदे आसा रा कब्जा ए। 4 जेबे यहूदा रे राजा सिदकिय्याह ओर सबी सिपाईए सेयो देखे तेबे रातो-रात राजे रे बगीचे री बाटा रिये दुँईं कांदा रे बीचले बड़े द्वारो रिये ऊई की शईरो ते निकल़ी की नठीगे ओर अराबा* खे चली गे। 5 पर बेबीलोनिया री सेने सेयो खदेड़ी की सिदकिय्याह खे यरीहो रे अराबा दे पकड़ी ता ओर तिना खे बाबेलो रे राजा नबूकदनेस्सरो गे हमात इलाके रे रिबला शइरो दे लईगे ओर तेती तेस पाँदे मकद्दमा चलाया, फेर से दोषी मिलेया। 6 तेबे बाबेलो रे राजे सिदकिय्याह रे पाऊ तेसरी आखी सामणे रिबला दे काईते ओर यहूदा प्रदेशो रे सारे अधिकारी बी काईते। 7 तेबे राजा नबूकदनेस्सरे यहूदा रे राजा सिदकिय्याह रिया आखी फूटायी तिया ओर तिने राजा सिदकिय्याह बाबेल निणे खे बेड़िया साथे बानी ता। 8 बाबेलो री सेने राजमईल ओर यरूशलेम शईरो रे लोका रे कअरो दे आग लगाईती, ओर तिने यरूशलेम शईरो री दवाल टाल़ी ती। 9 तेबे अंगरक्षको रा परदान नबूजरदान प्रजा रे बचे रे लोका खे, जो शईरो दे रयी गे थे ओर जो लोक तेसगे नठी की आईगे थे तिना खे, मतलब प्रजा बीचा ते जितणे रयी गे थे तिना सबी खे बन्दुआ करी की बाबेलो खे लईगा। 10 पर प्रजा बीचा ते जो एड़े कंगाल़ थे कि जिना गे कुछ नि था, तिना खे अंगरक्षको रा परदान नबूजरदान यहूदा प्रदेशो दे छाडी गा ओर जांदे बखते तिना खे अंगूरा रे बगीचे ओर डोरू देई ते।

11 बाबेलो रे राजा नबूकदनेस्सरे अंगरक्षको रे परदान नबूजरदानो खे यिर्मयाह रे बारे दे ये आज्ञा दित्ती, 12 "यिर्मयाह खे टोल़ो ओर तेसरी देख-पाल़ करो। तेसरा कोई नुकशाण नि करना, जेड़ा से ताखे बोलोगा, तेड़ा ई तेस साथे बर्ताओ करना।" 13 तेबे अंगरक्षको रे परदान नबूजरदान ओर खुसरेया रे परदान नबूसजबान ओर मगो रे परदान नेर्गलसरेसेर ज्योतषिया रे सरदार, 14 ओर बाबेलो रे राजे रे सबी परदाने, लोक पेजी की यिर्मयाह मईलो रे पईरेदारा रे आँगणो ते बुलाई ता ओर गदल्याह खे जो अहीकामो रा पाऊ ओर शापानो रा पोता था, सम्बाल़ी ता ताकि से तेसखे कअरे पऊँचाओ। तदुओ ते से आपणे लोका साथे रणे लगेया।

15 जेबे यिर्मयाह पईरे रे आँगणो दे कैद था, तेबे यहोवे रा ये वचन तेसगे पऊँचेया, 16 "यिर्मयाह, जा ओर कूश देशो रे रणे वाल़े एबेदमेलेको खे बोल, इस्राएलो रा परमेशर, सेना रा यहोवा ताखे ईंयाँ बोलोआ: देख, आऊँ आपणे तिना वचना खे जो मैं एस यरूशलेम शईरो रे बारे दे बोली राखे ईंयाँ पूरे करने कि एतेरा कल्याण नि ऊणा, नुकशाण ई नुकशाण ऊणा ओर तां आपणी आखी साथे यरूशलेम शईरो रा नाश ऊँदे ऊए देखणा। 17 पर यहोवे री ये बाणी ए कि मां तेस बखते तूँ बचाणा ओर जिना माणूंआ ते ताखे डर लगोआ, तूँ यहूदा प्रदेशो रे अधिकारिया रे वशो दे नि करना। 18 कऊँकि जेबे यहूदा प्रदेशो पाँदे मुसीबत आऊणी, तेबे मां तूँ जरूर तलवारी ते बचाणा ओर जिऊँदा राखणा, यहोवे री येई बाणी ए। ये इजी बजा ते ऊणा, कऊँकि तैं मां पाँदे परोसा राखी राखेया।"