1 यहोवे यिर्मयाह ते बोलेया कि से सूका पड़ने रे बारे दे लोका खे ये बोलो, 2 "यहूदा रे लोक बऊत परेशान ए ओर शईरो रे बड़े द्वारो पाँदे लोक शोगो रा पईरावा पईनी की उदास बैठी रे ओर यरूशलेम शईरो रा मतादा रिया तँईं पुकारना सर्गो तक पऊँची गा रा। 3 यरूशलेम शईरो रे शरीफ लोक आपणे नौकरा खे पाणी ल्याऊणे खे कुँएं गे पेजोए, तिना खे कुँएं पाँदे आई की पाणी नि मिलदा, इजी री खातर सेयो खाली पांडे लई की कअरो खे वापस ऊई जाओए, सेयो शर्मिंदा ओर उदास ऊई की सिर टखी लओए। 4 देशो दे बर्खा ना ऊणे ते जमीना दे खीड़ा पड़ी गी रिया, इजी बजा ते जिम्मीदार लोक उदास ऊई की सिर टखी लओए। 5 एथो तक कि ईरणी बी मैदानो दे बच्चा पैदा करी की कले छाडी जाओई, कऊँकि अरा काआ नि मिलदा। 6 बणो रे गह्दे बी बंजर टीलेया पाँदे खड़े ऊई की गीदड़ो जेड़े साआ लओए, तिना रिया आखी तुँदल़िया ऊई जाओईया, कऊँकि कोई अरयाली नि ए।" 7 मेरे लोक माखे बुलाओए, ओ यहोवा, म्हारे बुरे काम म्हारे खलाफ गवाई देणे लगी रे, आसे तेरा साथ छाडी की बऊत दूर पटकी गे रे ओर आसे तेरे खलाफ पाप करी राखेया, तेबे बी तूँ आपणे नाओं रिया तँईं कुछ कर। 8 यहोवा तू इस्राएलो री निऊँ ए, संकटो रे बखते तूँ ई इस्राएलो खे बचाणे वाल़ा ए, तूँ कऊँ एस देशो रे परदेसिये जेड़ा ए? तूँ तेस यात्रिये जेड़ा कऊँ ए जो राथियो खे रणे खे केथी टिकोआ? 9 तूँ कऊँ हैरान करने वाल़े मर्द या एड़े वीरो जेड़ा ए जो बचायी नि सको? तेबे बी ओ यहोवा, तूँ आसा बीचे ए ओर आसा खे तेरा बोलेया जाओआ, इजी री खातर आसा खे नि छाड।

10 यहोवे यहूदा रे लोका रे बारे दे ईंयाँ बोलेया, "इना खे एड़ा पटकणा अच्छा लगोआ, यो बुरे व्याभिचार करने ते नि रूके, इजी बजा ते यहोवा इना ते नराज ए, तेस इना रे पाप याद करने ओर इना रे पापो री सजा देणी।"

11 तेबे यहोवे माखे बोलेया, "यिर्मयाह, यहूदा रे लोका री पलाईया रिया तँईं प्रार्थना नि कर। 12 यहूदा रे लोक बअरत बी करोगे, तेबे बी मां इना री दुहाई नि सुणनी ओर चाए यो नज्जो री बलि या होमबलि चढ़ाओगे, तेबे बी मां इना ते खुश नि ऊणा, मां इना पाँदे मँईगाई ओर मरिया री तलवार चलाणी।"* 13 तेबे मैं यहोवे ते बोलेया, "लाणत ए, यहोवा मेरे परमेशर, देख, तिना रे भविष्यबक्ता लोका खे बोलोए कि ना तो तुसा पाँदे तलवार चलणी ओर ना अकाल़ ऊणा, यहोवे तुसा खे एसा जगा पाँदे सदा री शान्ति देणी।" 14 तेबे यहोवे माखे बोलेया, "यो भविष्यबक्ता मेरा नाओं लई की चूठी भविष्यबाणी करोए, ना तो मैं यो पेजे ओर ना ई इना खे कोई आज्ञा दित्ती ओर ना ई इना गे कोई गल्ल बोली। यो तुसा लोका साथे चूठा दावा करी की आपणे ई मनो ते बेकार ओर तोखे री भविष्यबाणी करोए।* 15 इजी बजा ते जो भविष्यबक्ता मेरे बिना पेजे मेरा नाओं लई की भविष्यबाणी करोए कि तेस देशो रे ना तो तलवार चलणी ओर न अकाल़ ऊणा, तिना रे बारे दे यहोवा ईंयाँ बोलोआ कि सेयो भविष्यबक्ता आपू तलवार ओर अकाल़ो रे जरीये नाश करे जाणे। 16 ओर जिना लोका ते तिने चूठे भविष्यबक्तेया यो गल्ला कित्तिया, सेयो बी ईंयाँ ई काये जाणे, ओर सेयो ईंयाँ यरूशलेम शईरो रिया सड़का रे सेटणे कि ना तो तिना खे, ना तिना री जवाणसा खे ओर ना तिना रे माठे-बेटिया खे कोई माट्टी देणे वाल़ा रणा। कऊँकि मां तिना री बुराई तिना पाँदे ई पाणी।"

17 ओ यिर्मयाह, तूँ तिना खे ये बोल, "मेरिया आखी ते रात-दिन लगातार आसू बह्ईंदे रये, सेयो नि रूके, कऊँकि मेरे लोका री कुआँरी बेटी बऊत ई केसी राखी ओर कायल ऊई री।" 18 जे आऊँ मैदानो रे जाऊँ, तो देखो, तलवारी साथे मरे रे पड़ी रे ओर जे आऊँ शईरो ते पीतरे जाऊँ, तो देखो, पूखा साथे अदमरे पड़ी रे, कऊँकि भविष्यबक्ता ओर पुरोईत देशो रे कमाई करदे फिरोए ओर समज नि राखदे। 19 ओ यहोवा, "तेबे मैं ये प्रार्थना कित्ती, क्या तैं यहूदा रे लोक बिल्कुल छाडी ते? यहोवा क्या तूँ सिय्योनो रे लोका ते नफरत करेया? तैं आसे एड़े कऊँ मारी राखे कि आसे ठीक ऊई नि सकदे? आसे शान्ति न्याल़दे रये, तेबे बी कोई कल्याण नि ऊआ ओर तेबे बी आसे ठीक ऊणे री उम्मीद करदे रये, तेबे बी कबराणा ई पड़ेया। 20 ओ यहोवा, आसे आपणी बुराई ओर आपणे बुजुर्गा रे पाप बी मानी लऊँए, कऊँकि आसे तेरे खलाफ पाप करी राखेया। 21 ओ यहोवा, आपणे नाओं रे मुताबिक आसा खे नि छाड, आपणे तेजोमय सिंहासनो* री बेज्जती नि कर, जो वाचा तैं आसा साथे बानी, से याद कर ओर तिजी खे नि तोड़। 22 क्या जातिया-जातिया री मूर्तिया बीचा ते कोई बर्खा करी सकोआ? क्या सर्ग पाणी बरसाई सकोआ? ओ म्हारे परमेशर यहोवा, तूँ ई इना सबी गल्ला खे करने वाल़ा ए। आसा तेरा ई आसरा देखदे रणा, कऊँकि इना सारी चीजा खे बनाणे वाल़ा तूँई ए।"