1 तेबे कारेह रा पाऊ योहानान, होशायाह रा पाऊ अजर्याह, यरूशलेम शईरो रे सिपाईया रे सारे परदान ओर छोटे ते लई की बड़े तक सारे परदान, सेना रे अधिकारी, जो अधिकारी बारे लूकी रे थे ओर जो लड़ने लगी रे थे, 2 सेओ सारे लोक यिर्मयाह नबीए रे नेड़े आई की बोलणे लगे, "म्हारी प्रार्थना सुणी की आपणे परमेशर यहोवे ते आसा सबी बचे रे लोका खे प्रार्थना कर, कऊँकि तूँ आपणी आखी साथे देखणे लगी रा कि आसे तो पईले बऊत थे, एबे थोड़े ई रयी गे रे। 3 यिर्मयाह आपणे परमेशर यहोवे ते ये प्रार्थना कर कि आसे किंयाँ आपणा जीवन बिताईए ओर केड़ा जा काम करुँ?" 4 तेबे यिर्मयाह नबीए तिना खे ज्वाब दित्तेया, "मैं तुसा री सुणी राखी, देखो, आऊँ तुसा रे वचनो रे मुताबिक तुसा रे परमेशर यहोवे ते प्रार्थना करूँगा ओर जो ज्वाब यहोवा तुसा खे देयोगा, तेस आऊँ तुसा गे बताऊँगा, मां तुसा ते कोई गल्ल नि छुपाणी।" 5 तेबे तिने लोके यिर्मयाह खे बोलेया, "अगर तेरा परमेशर यहोवा तेरे जरीये आसा खे कोई वचन पऊँचाओ ओर आसे तेतेरे मुताबिक नि करूँगे, तो यहोवा आसा बीचे सच्चा ओर विश्वासो जोगा गवा ठईरो। 6 चाए से खरी गल्ला ओ, चाए बुरी, तेबे बी आसा आपणे परमेशर यहोवे री आज्ञा, जेसगे आसे ताखे पेजूँए, मानणी, कऊँकि जेबे आसे आपणे परमेशर यहोवे री गल्ल मानूँगे, तेबे म्हारा पला ऊणा।"

7 जेबे दस दिन बीतीगे तेबे यहोवे रा वचन यिर्मयाह गे पऊँचेया। 8 तेबे यिर्मयाहे कारेह रे पाऊ योहानानो खे ओर तेस साथले सिपाईया रे परदानो खे ओर छोटे ते लई की बड़े तक जितणे लोक थे, तिना सबी खे बुलाई की तिना खे बोलेया, 9 "इस्राएलो रा परमेशर यहोवा, जेसगे तुसे आऊँ इजी खे पेजेया ताकि तेस सामणे तुसा री प्रार्थना सुणाऊँ, से ईंयाँ बोलोआ: 10 जे तुसे लोक यहूदा देशो देई रयी जाओगे, तेबे तो मां तुसे बणाए दे राखणे ओर तुसे नाश नि करने बल्कि सामर्थी ओर तागतबर बनाणे, कऊँकि तुसा रा जो नुकशाण मैं करी राखेया आऊँ तिजी ते पछताऊँआ। 11 तुसे बाबेलो रे राजे ते डरोए, तेसते नि डरो, यहोवे री ये बाणी ए, तेसते नि डरो, कऊँकि आऊँ तुसा री रक्षा करने ओर तुसा खे तेसरे आथो ते बचाणे खे तुसा साथे ए। 12 मां तुसा पाँदे दया करनी, ताकि से बी तुसा पाँदे दया करी की तुसा खे तुसा रे देशो दे फेर बसायी देयो। 13 पर जे तुसे ये बोली की कि आसा यहूदा प्रदेशो दे नि रणा, आपणे परमेशर यहोवे री गल्ल नि मानोगे ओर बोलो कि आसा तो मिस्र देशो दे जाई की तेथी रणा, 14 कऊँकि तेती ना तो कोई युद्ध ऊणा, ना युद्धो री शुरूआता खे रड़सिंगे री आवाज सुणनी ओर ना आसा खे रोटिया री कमी ऊणी, तो ओ बचे रे यहूदियो, यहोवे रा ये वचन सुणो। 15 ओ यहूदा प्रदेशो दे रणे वाल़ेयो, प्रभुए रा वचन सुणो सेना रा प्रभु, इस्राएलो रे लोका रा परमेशर यहोवा ईंयाँ बोलोआ: जे तुसे सच्ची खेई मिस्रो खे जाणे खे आपणा मूँ करो ओर तेती रणे खे जाओ, 16 तो एड़ा ऊणा कि जेसा लड़ाईया री तलवारी ते तुसे डरोए, तेसा ई तुसे तेती जाई की काई देणे, तेसा मिस्रो दे तुसा रा पीछा नि छाडणा ओर तुसे तेथी मरी जाणे। 17 जितणे माणूं मिस्रो दे रणे खे तेथो रिया तरफा खे मूँ फेरोगे, सेयो सब तलवार, अकाल़ ओर बमारिया साथे मरने ओर जो मुसीबत मां तिना बीचे ल्याऊणी, तेते ते कोई बची नि सकणा।"

18 इस्राएलो रे लोका रा परमेशर सेना रा परमेशर यहोवा ईंयाँ बोलोआ: जिंयाँ मेरा रोष ओर जल़न यरूशलेम शईरो दे रणे वाल़ेया पाँदे पड़की थी, तिंयाँ ई जे तुसे मिस्रो खे जाओगे, तो तुसा पाँदे बी तेड़ी ई पड़कणी कि लोक हैरान ऊणे ओर तुसा रा उदारण देई की स्राप देया करना ओर तुसा री बेजती करेया करनी। तुसा से देश फेर नि देखी सकणा। 19 तेबे यिर्मयाहे आगे बोलेया, "ओ बचे दे यहूदा रे लोको, जो यहूदा री मुसीबता ते बची गे दे ए। यहोवे तुसा रे बारे दे बोली राखेया: मिस्रो दे नि जाओ। तुसे पक्का जाणी लो कि मैं आज तुसा खे सावधान करी की ये गल्ल बताई ती री। 20 कऊँकि जेबे तुसे आऊँ ये बोली की आपणे परमेशर यहोवे गे पेजेया कि आसा री खातर म्हारे परमेशर यहोवे ते प्रार्थना कर ओर जो कुछ म्हारा परमेशर यहोवा बोलोगा तेतेरे मुताबिक ई आसा गे बता ओर आसा तेड़ा ई करना, तेबे तुसे जाणी बूजी की आपू खे ई तोखा देयो थे। 21 देखो, आऊँ आज तुसा खे यहोवे रे ज्वाबो खे बताई देऊँआ, पर ओर जो कुछ तुसा रे परमेशर यहोवे तुसा गे बोलणे खे पेजी राखेया, तेते बीचा ते तुसे कोई गल्ल नि मानदे। 22 एबे तुसे पक्का जाणी लो कि जेते जगा दे तुसे परदेशी ऊई की रणे री इच्छा करोए, तेस मिस्र देशो दे तुसे तलवार, अकाल़ ओर बमारिया साथे मरी जाणे।"