यिर्मयाह 40

यिर्मयाह रा यहूदा प्रदेशो दे रणा

1 जेबे अंगरक्षको रे परदान नबूजरदाने यिर्मयाह खे रामाह शईरो दे तिना सबी यरूशलेमी ओर यहूदी बन्दिया बीचे अथकड़िया साथे बानेया दा देखी की, जो बाबेलो खे जाणे वाल़े थे, छुड़ाई ला, तेते ते बाद यहोवे रा ये वचन तेसगे पऊँचेया, 2 अंगरक्षको रे परदान नबूजरदाने यिर्मयाह खे तेस बखते आपू गे बुलाया ओर बोलेया, "एते यहूदा प्रदेशो रे यरूशलेम शईरो दे ये जो मुसीबत पड़ी री, से तेरे परमेशर यहोवे री बोली दी थी। 3 जेड़ा यहोवे बोलेया था तेड़ा ई तिने पूरा बी कित्तेया, तुसे लोके जो यहोवे रे खलाफ पाप कित्तेया ओर तेसरी आज्ञा नि मानी, इजी बजा ते तेरी ये दशा ऊई री। 4 यिर्मयाह, एबे आऊँ तेरी इना अथकड़िया खे बाडी की ताखे छाडी देऊँआ ओर जे मां साथे ताखे बाबेलो खे जाणा सई लगोआ, तो चल, तेती मां तां पाँदे दया करनी ओर जे मां साथे बाबेलो खे जाणा ताखे अच्छा नि लगोआ, तो एथी रयी जा। देख, सारा देश तां सामणे पड़ी रा, ताखे जेती जाणा ठीक लगोआ ओर ठीक जचोआ, तेथी चली जा।" 5 से तेथी था, तेबे नबूजरदाने फेर तेसखे बोलेया, "गदल्याह जो अहीकामो रा पाऊ ओर शापानो रा पोता ए, जो बाबेलो रे राजे यहूदा रे शईरो पाँदे अधिकारी ठराई राखेया, तेसगे वापस चली जा ओर तेस साथे लोका बीचे रओ या जेती केथी ताखे जाणा ठीक लगोआ, तेथी चली जा।" तेबे अंगरक्षको रे परदाने तेसखे कुछ खाणे-पीणे रिया चीजा देई की ओर कुछ पैसा देई की पेजीता। 6 तेबे यिर्मयाह अहीकामो रे पाऊ गदल्याह गे मिस्पा शईरो दे चली गा ओर तेती यहूदा रे जो थोड़े जे लोक बची गे थे तिना साथे रणे लगेया।

यहूदा प्रदेशो रा अधिकारी गदल्याह

7 कुछ यहूदी सिपाई ओर अधिकारी तिना रे कब्जे दे नि ऊए थे सुणेया कि बाबेलो रे राजे अहीकामो रा पाऊ गदल्याह देशो रा अधिकारी ठराई राखेया ओर देशो रे जिना कंगाल़ लोका खे से बाबेलो खे नि लईगा था, क्या मर्द, क्या जवाणस, क्या बाल-बच्चे, सेयो सारे तेसगे सम्बाल़ीते रे, 8 तेबे नतन्याह रा पाऊ इश्माएल, कारेह रा पाऊ योहानान, योनातान ओर तन्हूमेतो रा पाऊ सरायाह, एपै नतोपा दे रणे वाल़े रे पाऊ ओर केसी माका दे रणे वाल़े रा पाऊ याजन्याह आपणे माणूंआ समेत गदल्याह गे मिस्पा दे आए। 9 गदल्याह जो अहीकामो रा पाऊ ओर शापानो रा पोता था, तिने तिना ते ओर तिना रे माणूंआ ते कसम खाई की बोलेया, "बेबीलोनिया रे वशो दे रणे ते नि डरो। एस देशो दे रंदे ऊए ई बाबेलो रे राजे रे वशो दे रओ, तेबे तुसा रा पला ऊणा। 10 आऊँ तो इजी री खातर मिस्पा दे रऊँआ, ताकि जो बेबीलोनी एती आओ, तिना साथे गल्ल बात करेया करुँ, पर तुसे शराब, गर्मिया रे फल ओर तेलो खे कट्ठा करी की आपणे पांडेया दे राखो ओर आपणे लये रे शईरो दे बसे दे रओ।" 11 यहूदा रे सारेया लोके, जेबे मोआबी, अम्मोनी, एदोमी ओर कई ओरी देशा बीचे रणे वाल़े यहूदिये सुणेया कि बाबेलो रे राजे यहूदिया बीचा ते कुछ लोक बचायी ते ओर तिना पाँदे गदल्याह खे जो अहीकामो रा पाऊ ओर शापानो रा पोता था, अधिकारी नियुक्त करी राखेया, 12 तेबे सारे यहूदी जिना-जिना जगा दे तित्तर-बित्तर ऊईगे थे, तेथा ते वापस ऊई की यहूदा प्रदेशो रे मिस्पा शईरो दे राजा गदल्याह गे शराब ओर गर्मिया रे फल कट्ठे करने लगे।

गदल्याह खे काणा

13 तेबे कारेह रा पाऊ योहानान ओर मैदानो दे रणे वाल़े तिना सिपाईया रे परदान जिने आपणे आपू खे तिना रे कब्जे दे नि कित्तेया था, मिस्पा दे गदल्याह गे आई की बोलणे लगे, 14 "क्या तू जाणेया कि अम्मोनिया रे राजा बालीसे नतन्याह रा पाऊ इश्माएल ताखे काणे खे पेजी राखेया?" पर अहीकामो रे पाऊ गदल्याहे तिना पाँदे परोसा नि कित्तेया। 15 तेबे कारेह रे पाऊ योहानाने गदल्याह खे मिस्पा दे चोरिए जे बोलेया, "माखे जाई की नतन्याह रे पाऊ इश्माएलो खे काणे दे ओर केसी खे पता नि लगणा। ताकि से ताखे काई नि सको ओर जितणे यहूदी लोक तांगे कट्ठे ऊई रे सेयो तित्तर-बित्तर नि ओ ओर बचे दे यहूदी लोक नाश नि ओ।" 16 पर अहीकामो रे पाऊ गदल्याहे कारेह रे पाऊ योहानानो खे ज्वाब दित्तेया, "एड़ा काम नि कर, तूँ इश्माएलो रे बारे दे चूठ बोलेया।"