यिर्मयाह 34

सिदकिय्याह खे यिर्मयाह रा वचन

1 जेबे बाबेलो रा राजा नबूकदनेस्सर आपणी सारी सेना समेत ओर तरतिया रे जितणे प्रदेश ओर जातिया री सेना तेसरे वशो दे थे, तिना सबी रे लोका समेत यरूशलेम शईर ओर तेथो रे सारे गाँवो रे लोका साथे लड़ने लगी रा था, तेबे यहोवे रा ये वचन यिर्मयाह गे पऊँचेया, 2 "इस्राएलो रा परमेशर यहोवे माखे ईंयाँ बोलेया कि जाई की यहूदा रे राजा सिदकिय्याह खे बोल, यहोवा ईंयाँ बोलोआ: देख, आऊँ एस यरूशलेम शईरो खे बाबेलो रे राजे रे वशो दे करने वाल़ा ए ओर तेस ये फूकवाई देणा। 3 ओ राजा सिदकिय्याह, तूँ बाबेलो रे राजे रे आथो ते नि बचणा, तूँ जरूर पखड़ना ओर तेसरे वशो रे करेया जाणा ओर तां आपणियां आखी ते बाबेलो रा राजा देखणा, तेस ओर तां आमणे-सामणे गल्ला करनिया ओर तूँ पकड़ी की बाबेलो रे देशो खे लई जाणा। 4 तेबे बी ओ यहूदा रे राजा सिदकिय्याह, यहोवे रा ये वचन बी सुण, जेतेखे यहोवा तेरे बारे दे बोलोआ: ‘तूँ लड़ाईया दे नि काया जाणा। 5 तूँ शान्तिया साथे मरना ओर जेड़ा तेरे पितरा खे, मतलब जो तांते पईले राजा थे, तिना रिया तँईं खुशबूदार द्रव्य बाल़े थे, तेड़े ई लोका तेरिया तँईं बी तूप बाल़ने ओर लोका ये बोली की कि हाय मारे स्वामी! तेरिया तँईं छाती पीटणी, यहोवे री येई बाणी ए।’" 6 यो सारे वचन यिर्मयाह भविष्यबक्ते यहूदा प्रदेशो रे राजा सिदकिय्याह खे यरूशलेम शईरो रे तेस बखते बोले, 7 ये तेस बखते ऊआ जेबे बाबेलो रे राजे री सेना यरूशलेम शईरो रे खलाफ लड़ेया करो थी। बाबेलो री सेना यहूदा रे तिना शईरा रे खलाफ बी लड़ेया करो थी जिना पाँदे कब्जा नि ऊई सको था। सेओ लाकीश ओर अजेका शईर थे। कऊँकि यहूदा रे जो गढ़वाल़े शईर थे तिना बीचा ते बस सेयो ई रयी गे थे।

दासा साथे बुरा बर्ताव

8 यहोवे रा ये वचन यिर्मयाह गे तेस बखते पऊँचेया जेबे सिदकिय्याह राजे सारी प्रजा खे जो यरूशलेम शईरो दे थी ये वाचा बणाई कि जो यहूदी दास ए तिना खे आजाद करने रा प्रचार करेया जाओ, 9 ताकि सब लोक आपणे-आपणे दास-दासिया खे जो इब्री या इब्रीन ए, आजाद करी की जाणे देयो ओर कोई आपणे यहूदी पाईया ते फेर सेवा नि कराओ। 10 तेबे सारे परदाने ओर सारी प्रजे ये वादा कित्तेया कि आसा आपणे-आपणे दास-दासिया आजाद करी देणे ओर फेर तिना ते आपणी सेवा नि कराणी, इजी री खातर तेसा आज्ञा रे मुताबिक सेयो आजाद करीते। 11 पर इजी ते बाद तिने अधिकारिए ओर लोके जिना गे यहूदी दास थे सेयो फेर बदली गे ओर जो दास-दासिया तिने आजाद करी की जाणे दित्ते थे, सेयो फेर आपणे वशो दे ल्याई की दास-दासिया बणाईते। 12 तेबे यहोवे री तरफा ते ये वचन यिर्मयाह गे पऊँचेया, 13 "यिर्मयाह, इस्राएलो रा परमेशर यहोवा तुसा खे ईंयाँ बोलोआ कि जेस बखते आऊँ तुसा रे पितरा खे गुलामिया रे कअरो ते, मतलब मिस्र देशो ते काडी की बारे ल्याया, तेस बखते मैं आपू तिना साथे ये बोली की वाचा बानी थी कि 14 तुसा रा जो इब्री पाई तुसा रे आथो दे बेचेया जाओ, से तुसे सातुए साले छाडी देणा, छे साल तक तो से तुसा री सेवा करो पर इजी ते बाद तुसे से आजाद करी की आपू गे ते जाणे देणा। पर तुसा रे बुजुर्गे मेरी नि सुणी, ना मेरी तरफा खे कान लगाया।"*34:14 बिध. 15:1,12 15 तुसे यबु बदले तो थे ओर आपणे सबी इस्राएली साथिया खे आजाद करने रा प्रचार करवाई की जो काम मेरी नजरा दे ठीक ए, से तुसे कित्तेया बी था ओर जेतेखे मेरा मन्दर बोलोए, तिदे मां सामणे वाचा बी बानी थी; 16 पर तुसे पटकी गे ओर मेरा नाओं ईंयाँ अशुद्ध कित्तेया कि जिना दास-दासिया खे तुसे आजाद करी की तिना री इच्छा पाँदे छाडी चुके थे, सेयो तुसे लोके फेर आपणे वशो दे करीते ओर सेयो दास-दासिया बणने खे मजबूर कित्ते। 17 इजी बजा ते यहोवा ईंयाँ बोलोआ: तुसे जो मेरी आज्ञा रे मुताबिक आपणे-आपणे यहूदी लोका री आजादिया रा प्रचार नि कित्तेया, तेबे यहोवे रा ये वचन सुणो, "आऊँ तुसा रे ईंयाँ आजाद ऊणे रा प्रचार करूँआ कि तुसे तलवार, अकाल़ ओर बमारिया दे पड़ने ओर मां एड़ा करना कि तुसे तरतिया रे राज-राज दे मारे-मारे फिरने। 18 जो लोक मेरी वाचा खे नि मानदे ओर जो आज्ञा तिने मां सामणे ओर बाच्छूए रे दो इस्से करी की तेसरे दुँईं इस्से बीचे ऊई की कित्तेया पर से पूरा नि कित्तेया, 19 मतलब यहूदा देश ओर यरूशलेम शईरो रे परदान, खुसरे, पुरोईत ओर आम लोक जो बाच्छूए रे इस्से बीचे ऊई की गये थे, 20 मां यहूदा रे राजा सिदकिय्याह ओर तेसरे अधिकारी बी तिना लोका रे आथो दे करी देणे जो तिना खे काणा चाओए। ओर तिना रिया लाशा सर्गो रे पंछिया ओर बणो रे जानवरा खाणिया। 21 मां यहूदा रा राजा सिदकिय्याह ओर तेसरे परदान तिना रे दुश्मण ओर तिना खे काणे वाल़े, मतलब बाबेलो रे राजे री सेना रे वशो दे करी देणे जो तुसा रे सामणे ते चली गी री। 22 यहोवे रा ये वचन ए कि देखो, मां बेबीलोनो री सेना खे फेर वापस आऊणे री आज्ञा देई की यरूशलेम शईरो दे वापस ल्याऊणे ओर तिना लड़ी की ये लई लणा ओर फूकी देणा ओर मां यहूदा रे शईर एड़े उजाड़ी देणे कि तिदे कोई माणूं नि रणा।"