1 यहोवे इस्राएलिया ते बोलेया, "ओ मेरे पाऊओ, तुसा रिया माया रा फारगती पत्र केईया, जो मैं तेसा खे त्याग देंदे बखते दित्तेया था? या क्या तुसे सोचोए कि मैं तुसे तेस आदमिए जेड़े गुलाम बणाई की बेचीते जो आपणे बच्चेया खे गुलाम बणाई की बेची देओआ?" सुणो, तुसे आपणे ई बुरे कामो रिया बजा ते बिकी गे ओर तुसा रे पापो रिया बजा ते मैं तुसा री माये छाडी ती। 2 इजी री क्या बजा ए कि जेबे आऊँ कअरे आया तेबे कोई नि मिलेया? जेबे मैं बार-बार आका पाईया, तेबे किने बी ज्वाब नि दित्तेया? क्या तुसे सोचोए कि आऊँ तुसा खे नि बचाई सकदा? क्या माँदे उद्धार करने री शक्ति नि ए? देखो, आऊँ एकी तमकिया साथे समुद्रो खे सुकाई देऊँआ, आऊँ बड़े समुद्रा खे रेगिस्तान बणाई देऊँआ; तिना रिया मछलिया पाणिए ते बिना मरी जाओईया ओर सड़ी जाओईया। 3 आऊँ सर्गो खे मानो शोगो रे काल़े टाल्ले पन्याऊँआ ओर तिना रा टखण टाट* बणाई देऊँआ।

4 प्रभु यहोवे माखे सिखणे वाल़ी जीब देई राखी, ताकि आऊँ थके रे लोका खे आपणे बचना साथे सम्बाल़ी सकूँ। से माखे प्यागा रोज जगाओआ ओर मेरे कान खोलोआ, ताकि आऊँ शिष्य जेड़ा सुणूँ। 5 प्रभु यहोवे मेरे कान खोली राखे ओर मैं तोखा नि कित्तेया, ना ई पीछे आटेया। 6 मैं कोड़ा बाणे वाल़ेया रे सामणे आपणी पीठ ओर मूछा मरोड़ने वाल़ेया रिया तरफा खे आपणी खाखा कित्तिया; मैं बेज्जत ऊणे ओर तिना रे थूकणे ते आपणा मूँ नि लकोया।* 7 कऊँकि प्रभु यहोवा मेरी मताद करोआ, इजी बजा ते मैं शर्म नि कित्ती; बल्कि आपणा माथा चकमक पात्थरो जेड़ा काठा कित्तेया, कऊँकि माखे निश्चा था कि माखे शर्मिंदा नि ऊणा पड़ना। 8 परमेशर जो माखे तर्मी मानोआ, से मेरे नेड़े ए। मां साथे केस मुकद्दमा करना? आसे आमणे-सामणे खड़ी रे। जो माणूं मेरा बिरोदी ए, से मां नेड़े आओ।* 9 देखो, प्रभु यहोवा मेरी मताद करोआ; कोई बी माखे दोषी नि ठराई सकदा। देखो, मां पाँदे दोष लगाणे वाल़े सारे टाल्लेया जेड़े पुराणे ऊई जाणे; सेयो कीड़ेया खाई जाणे। 10 तुसा बीचा ते कुण ए जो यहोवे रा डर मानोआ ओर तेसरे दासो रिया गल्ला सुणाओआ, जो न्हेरे दे चलोआ ओर तेसगे प्रयासा नि ओ? से यहोवे रे नाओं रा परोसा राखो ओर आपणे परमेशरो पाँदे उम्मीद लगाई की राखो। 11 देखो, तुसे सारे जो आग बाल़ोए ओर आगी रे बाणा खे लको रे बानोए! तुसे सारे आपणी लगाई री आगी रे ओर आपणे बाल़े रे आगी रे बाणा बीचे आपू ई चलो। तुसा री ये दशा मां यहोवे री तरफा ते ई ऊणी, तुसे पीड़ा रे पड़े रे रणे।