यशायाह 62

सिय्योनो रे उद्धारो रा परोसा

1 भविष्यबक्ता बोलोआ, "सिय्योनो रे बारे दे मां चुप नि रणा ओर यरूशलेम शईरो रे बारे दे मां चैना दे नि रणा, जदुओ तक कि तिना री तार्मिकता प्रयासे जेड़ी ओर तिना रा उद्धार बल़ी रे हुल़े जेड़ा नि दिशेया। 2 ओ यरूशलेम, तेबे जातिया-जातिया रे लोका तुसा रा तर्म ओर सबी राजेया तुसा दे मेरी महिमा देखणी ओर तेरा एक नया नाओं राखेया जाणा जो यहोवे रे मुंए ते निकल़ना।*62:2 प्रका. 2:17, प्रका. 3:12 3 तुसे यहोवे रे आथो दे एक सुन्दर मुकुट ओर आपणे परमेशरो रे आथो दे राजमुकुट ठईरने। 4 तुसा खे फेर त्यागे रे नि बोलेया जाणा ओर तुसा री जमीना खे फेर ऊजड़ी री नि बोलेया जाणा; पर तुसा खे हेप्सीबा*62:4 हेप्सीबा परमेशरो री खुशिया रा शईर ओर तुसा री जमीना खे ब्यूला बोलेया जाणा; कऊँकि यहोवा तुसा ते खुश ए ओर तुसा री जमीन सवागण रणी। 5 कऊँकि जिया जवान मर्द एक कुआँरिया खे ब्याई लओआ, तिया ई तेरे पाऊआ तू ब्याई लणी, ओर जिंयाँ लाड़ा आपणी लाड़िया ते खुश ओआ, तिंयाँ ई तेरा परमेशर तेरी बजा ते खुश ऊणा। 6 ओ यरूशलेम शईरो रे लोको, मैं तुसा री शईरो री दवाला पाँदे पईरेदार बठयाल़ी राखे; सेयो रात-दिन कदी चुप नि रणे। ओ यहोवे खे याद करने वाल़ेयो, चुप नि रओ,*62:6 यहे. 3:17-21, इब्रा. 13:17 7 ओर जदुओ तक यहोवा यरूशलेम शईरो खे स्थिर करी की तेसरी तारीफ पूरी तरतिया रे नि फैलायी देयोगा, तदुओ तक तेसखे बी चैन नि लणे दे। 8 यहोवे आपणे दाँणे आथो री ओर आपणी बाई री तागता री कसम खाई राखी, मां पक्का आऊणे वाल़े बखतो रे तेरा नज्ज एबे फेर तेरे दुश्मणा खे खाणे खे नि देणा ओर परदेशिया रे पाऊआ तुसा रा नया शराब जेतेरिया तँईं तुसे मईणत करी राखी, पी नि सकणे; 9 बस सेयो ई खाई सकोए, जिने से पण्डारा रे राखी राखेया, तिना तेते बीचा ते खाई की यहोवे री स्तुति करनी ओर जिने शराब पण्डारो रे राखी राखेया ओ, सेयो ई तेतेखे मेरे मन्दरो रे आँगणो रे पी सकणे। 10 यरूशलेम शईरो रे लोको, जाओ, बड़े द्वारो रिये बारे जाओ, तुसा रे वापस आऊणे वाल़े लोका खे बाट सुदारो, सड़का सुदारी की ऊच्चिया करो, तेते बीचा ते पात्थर चूगी-चूगी की सेटी देयो, देश-देशो रे लोका खे बाट टोल़ने दे मताद करने खे एक चण्डा खड़ा करो। 11 देखो, यहोवे तरतिया रे कूणे तक एसा आज्ञा रा प्रचार करी राखेया: सिय्योनो रे लोका खे बोलो, देखो, तुसा रा उद्धार करने वाल़ा आऊणे लगी रा, देखो, जो मजदूरी तेसखे देणी, से तेसगे ए ओर तेसरा काम तेस सामणे ए।"*62:11 मत्ती 21:5, प्रका. 22:12 12 ओर लोका यहूदा रे लोका खे पवित्र प्रजा ओर यहोवे रे छुड़ाए रे बोलणा ओर तुसा रे शईरो रा नाओं ग्रहण कित्ती री, मतलब ना छाडी रा शईर पड़ना।