यशायाह 24

परमेशरो तरतिया रा न्याय करना

1 सुणो, यहोवा तरतिया खे बर्बाद करने वाल़ा ए, तेस तेसरी जगा नाश करी देणी ओर तेसरे लोक तित्तर-बित्तर करी देणे। 2 तेस बखते हर केसी साथे एक जेड़ी कटणा कटणी, जेड़ी यजमानो री तेड़ी पुरोईतो री, जेड़ी दासो री तेड़ी मालको री, जेड़ी दासिया री तेड़ी मालकणिया री, जेड़ी लणे वाल़े री तेड़ी बेचणे वाल़े री, जेड़ी त्वार देणे वाल़े री तेड़ी त्वार लणे वाल़े री, जेड़ी ब्याज लणे वाल़े री, तेड़ी ब्याज देणे वाल़े री, सबी री एक जेड़ी दशा ऊणी। 3 तरती खाली ओर सत्यानाश ऊई जाणी, कऊँकि ये यहोवे ई बोली राखेया। 4 देश उजाड़ ओर दु:खी ऊई जाणा। दुनिया खाली ऊई जाणी ओर कमजोर ऊई जाणी। तरतिया साथे स्वर्ग बी कमजोर ऊई जाओए।*24:4 तरतिया रे सबी ते महान लोक बी नाश ऊई जाणे 5 एसा तरतिया रे रणे वाल़े लोका रिया बजा ते तरती अशुद्ध ऊई गी री, कऊँकि तिने परमेशरो रे बिधि-बिधानो खे नि मानेया ओर बिधि पलटी ती ओर सदा रणे वाल़ी वाचा तोड़ी ती। 6 एसा तरतिया रे रणे वाल़े पापी ए। इजी बजा ते तरतिया खे परमेशरो रा स्राप पड़ना ओर तिदे रणे वाल़े दोषी ठईरने ओर इजी बजा तेई तरतिया रे रणे वाल़े स्वा ऊई जाणे ओर तेती थोड़े ई माणूं रयी जाणे। 7 नया शराब नि रणा, अंगूरा री बेल मुरझाई जाणी ओर जितणे लोक मनो दे खुशी मनाओए, सबी लाम्बा-लाम्बा साआ लणा। 8 डफलिया रा सुख देणे वाल़ा शब्द बन्द ऊई जाणा, खुश रणे वाल़ेया रा आल्ला नि रणा, बीणा रा सुख देणे वाल़ा शब्द शान्त ऊई जाणा।*24:8 यहे. 26:13, प्रका. 18:22 9 एबे लोक जेबे शराब पियोए तेबे खुशिया रे गीत नि गांदे। एबे जेबे आदमी शराब पियोए तेबे से तिना खे कड़ुआ लगणा। 10 गड़बड़ी मचाणे वाल़ा शईर नाश ऊणा, तेसरा हर एक कअर एड़ा बन्द करेया जाणा कि कोई बचणे खे तिदे कूसी नि सकणा। 11 लोक सड़का दे शराबो रिया तँईं खे चींगणे, खुशी खत्म ऊई जाणी, देशो री सारी खुशी चली जाणी। 12 शईर ऊजड़ ई रणा ओर तेथो रे शईरो रे बड़े द्वार तोड़ी की नाश करी देणे। 13 कऊँकि तरतिया पाँदे देश-देशो रे लोका बीचे एड़ा ऊणा जेड़ा कि जैतूनो खे चाड़ने रे बखते या अंगूर तोड़ने ते बाद कोई-कोई फल़ रयी जाओए।

पग्ता रा खुशी मनाणा

14 पर बचे दे लोका आपणा गल़ा खोली की जयजयकार करनी ओर तिना समुद्रो ते ललकारी की बोलणा कि यहोवा महान ए। 15 इजी री खातर पूर्ब देशा रे लोका तेसरी महिमा करनी। समुद्रो रे कनारे रणे वाल़ेया लोका तिना लोका इस्राएलो रे परमेशर यहोवे री स्तुति करनी।*24:15 मला. 1:11, यशा. 42:10 16 तरतिया रे कूणे ते आसा खे एड़े गाणे री आवाज सुणोई कि तर्मिये री महिमा ओर तारीफ ओ। पर मैं बोलेया, "हाय, हाय! आऊँ नाश ऊईगा, नाश! कऊँकि विश्वासघाती विश्वासघात करोए, सेयो बड़ा विश्वासघात करोए।" 17 ओ तरतिया पाँदे रणे वाल़े लोको, तुसा खे डर ओर गड्डा ओर फन्दा ए।*24:17 लूक. 21:35 18 जो कोई डरो रे शब्दो ते नठोगा, से गड्डे दे रूड़ी जाणा ओर जो कोई गड्डे ते निकल़ोगा, से फन्दे रे फसी जाणा। कऊँकि सर्गो रे द्वार खुली जाणे ओर तरतिया री निऊँ ईलणे लगणी। 19 तरती फटी की टुकड़े-टुकड़े ऊई जाणी, तरती बऊत काँबणी।*24:19 नहू. 1:5 20 संसारो दे पाप बऊत पारी ए। तेते पारो ते दबी की ये तरती टल़ी जाणी। ये तरती चूँगड़िया जेड़ी ईलणी ओर नशे दे पड़े दे आदमिए जेड़ी तरती रूड़ी जाणी। ओर फेर नि उठणी। 21 तेस बखते यहोवे सबी रा न्याय करना। सर्गो री सेना*24:21 सर्गो री सेना सर्गो रे देवते खे सर्गो दे ओर तरतिया रे राजेया खे तरतिया पाँदे सजा देणी। 22 स्वर्गो रे प्राणी ओर तरतिया रे राजा बन्दिया जेड़े गड्डे दे कट्ठे करे जाणे ओर जेला दे बन्द करे जाणे ओर कई दिना ते बाद तिना खे सजा देई जाणी। 23 तेस बखते चाँद ओर सूरजो रा प्रयासा कम ऊई जाणा ओर येओ यहोवे सामणे शर्मिंदा ऊई जाणे, कऊँकि सेना रे यहोवे सिय्योनो रे पाह्ड़ो पाँदे ओर यरूशलेम शईरो दे आपणी प्रजा रे बुजुर्गा सामणे प्रतापो साथे राज करना।