1 उजाड़ जगा ओर रेगिस्तान खुश ऊणे, उजाड़ जगा मगन ऊई की केसरो जेड़े खुश ऊणी, 2 रेगिस्तान बऊत खुश ऊणा ओर तेस खुशिया साथे जयजयकार करनी। रेगिस्तान एड़ा सुन्दर ऊई जाणा जेड़ा लबानोनो री पाह्ड़िया ए, ओर से कर्मेल ओर शारोनो री जमीना जेड़ा तेजोमय ऊई जाणा। तिना यहोवे री सामर्थ ओर म्हारे परमेशरो रा तेज देखणा।

3 इजी री खातर कमजोर आथा खे तागतबर बणाओ ओर थरथराए रे जानूआ खे मजबूत करो।* 4 डरने वाल़ेया खे बोलो, "याओ बानो, डरो नि! देखो, तुसा रा परमेशर बदला लणे ओर फल़ देणे आऊणे लगी रा। आ, परमेशरो आई की तुसा रा उद्धार करना।" 5 तेबे अन्देया रिया आखी खोलिया जाणिया ओर सेयो देखणे लगणे। टऊणेया रे कान बी खोले जाणे ओर सेयो सुणने लगणे। 6 तेबे लंगड़े ईरणो जेड़ा दौड़ना ओर गूँगेया आपणी जीबा साथे परमेशरो री जयजयकार करनी, कऊँकि जंगल़ो ते पाणिए रिया सूबल़ा फूटणियां ओर रेगिस्तान जगा दे नदिया बह्ईणे लगणियां;* 7 बऊत गर्म जमीन ओर सूके मैदान पाणिए री खाड्डा दे बदली जाणे, सूकी जमीना दे सूबल़ा फूटणियां ओर जेते जगा दे सयार बैठेया करो थे तिदे दल-दल काआ, ओर नंगल़ ओर जाड़ ऊणे।

8 तेती एक सड़क, मतलब राजमार्ग ऊणा, तेरे राजमार्गो रा नाओं पवित्र बाट ऊणा, कोई अशुद्ध माणूं तिसिये नि जाई सकणा, से तिना खेई रणा ओर जो तेसा बाटा दे चलणे, से चाए मूर्ख बी ओ, तेबे बी कदी नि पटकणे। 9 तेती शेर नि ऊणा ओर ना ई कोई खतरनाक जानवर तेसा बाटा दे ऊणा, पर सेयो लोक जो परमेशरे गुलामिया ते छुड़ाई राखे तेते बाटा रिये रोज चलेया करने। 10 ओर यहोवे रे छुड़ाए रे लोक वापस ऊई की जयजयकार करदे ऊए सिय्योनो दे आऊणे ओर तिना रे सिरो पाँदे सदा री खुशी ऊणी, तिना खे खुशी ओर आनन्द मिलणा, तिना खे कदी बी शोग ओर दु:ख नि ऊणा।*