यशायाह 4

सिय्योन रा नवां बणना

1 तेस दिने जेबे शईरो रे सारे मर्द काई देणे ओर गुलामिया दे लई जाणे, ओर जो कुछ तेती जिऊँदे बचणे तिना ते तिना साता-साता जवाणसा एकी-एकी मर्दो खे आथ जोड़ी की बोलणा, "रोटी तो आसा आपणी ई खाणी ओर टाल्ले बी आपणे ई पईनणे, तेरी कमाई नि आसा खाणी, बस आसा खे आपणी लाड़िया बणाई लो, ओर म्हारी कुआँरिया ऊणे री बेज्जती दूर कर।" 2 तेस बखते इस्राएलो रे बचे दे लोका खे यहोवे री डाल़ी, गईणे ओर महिमा ठईरना ओर जमीना री उपज, बडयाई ओर शोभा ठईरनी।*4:2 यिर्म. 23:5, यशा. 27:6, यूह. 1:14 3 जो कोई सिय्योनो रे बचेया रा रओगा, ओर यरूशलेम शईरो रे रओ, मतलब यरूशलेम शईरो रे जितणेया रे नाओं जिन्दगिया री पर्चिया रे लिखी ते रे, तिना खे पवित्र बोलेया जाणा।*4:3 प्रका. 17:8, प्रका. 20:15 4 ये तेबे ऊणा, जेबे परमेशर न्याय करने वाल़ी ओर फूकणे वाल़ी आत्मा रे जरीये सिय्योनो रे लोका रा मैल तोई चुकणा ओर यरूशलेम शईरो रे खूनो खे दूर करी चुकोगा।*4:4 आगी ते न्याय करना 5 तेबे यहोवे सिय्योन पाह्ड़ो रे एक-एक कअरो पाँदे ओर तेथो रे सभा री जगा पाँदे, दिने तो तुएँ रा बादल़ ओर राथियो खे लूपिया वाल़ी आगी रा प्रयासा बनाणा ओर सारे यरूशलेम शईरो रे वैभवो पाँदे परमेशरो री महिमा रा एक मण्डप छाया दा रणा। 6 से दिन तूपा ते बचाणे खे ओर पऊण-चूखाने ते ओर बर्खा ते बचाणे खे एक शरण ओर लूकणे री जगा ऊणा।