यशायाह 41

इस्राएलो खे परमेशरो री तसल्ली

1 यशायाहे इजी रे खलाफ भविष्यबाणी कित्ती परमेशर बोलोआ, ओ द्धीपो मा सामणे चुप रओ ओर मेरी सुणो, देशो-देशो रे लोक नवां जोर पाओए सेओ नेड़े आई की बोलो; आसे आपू-बीचे न्याय रिया तँईं एकी-दूजे रे नेड़े आईए। 2 किने पूर्व दिशा ते कोई एक सकेल़ेया, जेसखे से तर्मो साथे आपणे पैरा गे बुलाओआ? से जातिया खे तेसरे वशो दे करी देयोआ ओर तेसखे राजेया पाँदे अधिकारी ठराओआ, से आपणी तलवारी साथे तिना खे तूड़ा जेड़ा ओर आपणे धनुषो साथे उडाए रे पूओ जेड़ा करी देयोआ। 3 सीरिया रा राजा तिना खे नठाओआ ओर एड़ी बाटा दे जिदे से कदी नि चलेया था, बिना रोके-टोके आगे बढ़ोआ। 4 किने ये काम करी राखेया ओर शुरूओ ते पीढ़िया खे बुलांदा आई रा? आऊँ यहोवा, आऊँ यहोवा अन्तो तक तेथी रणा।*41:4 प्रका. 1:8, प्रका. 22:13, प्रका. 16:5 5 दूजे देशा रे लोके देखी राखेया कि मैं क्या करी राखेया सेओ डरी गे ओर डरो रे मारे कांबणे लगी रे इजी खे सेओ सब कट्ठे आए। 6 मूर्तिपूजा करने वाल़े एकी दूजे खे शान्ति देओए ओर तिना बीचा ते एक आपणे पाईए खे बोलोआ, "याओ राख!" 7 मिस्त्री सन्यारो खे ओर थौड़ूए साथे बराबर करने वाल़ा निहाईया पाँदे बाणे वाल़े खे ये बोली की याओ बणाओआ, "जोड़ तो ठीक ए" तेबे से परेगा ठोकी-ठोकी की तिजी खे एड़ा पक्का करोआ ताकि से पक्का रओ। 8 पर ओ मेरे दास इस्राएल, ओ मेरे चूणे रे याकूब, ओ मेरे दोस्त अब्राहमो रे कुल;*41:8 याकू. 2:23, बिध. 14:2, पज. 105:6 9 तूँ जो मैं तरतिया रे दूर-दूर देशो ते ल्याया ओर तरतिया रे कूणे ते बुलाई की ये बोलेया, "तूँ मेरा दास ए, मैं तूँ चूणी राखेया ओर छाडेया नि;"*41:9 पज. 107:2,3, पज. 94:14, मत्ती 2:18-22 10 डर नि, कऊँकि आऊँ तां साथे ए, ओरे-पोरे नि देख, कऊँकि आऊँ तेरा परमेशर ए; मां तूँ मजबूत करना ओर तेरी मताद करनी, मां आपणे तर्मी दाँणे आथो साथे तूँ सम्बाल़ना।*41:10 यहो. 1:9, बिध. 31:6 11 देख, जो तां पाँदे रोष करोए, सेयो सारे शर्मिंदा ऊणे; जो तां साथे लड़ाई करोए, तिना रे मूँ काल़े ऊणे ओर सेयो बर्बाद ऊई की राची जाणे। 12 जो तां साथे लड़ोए, सेयो ताखे टोल़दे ऊए पनि मिलणे, जो तां साथे युद्ध करोए, सेयो बर्बाद ऊई की नाश ऊई जाणे। 13 कऊँकि आऊँ तेरा परमेशर यहोवा ए, मां तेरा दाँणा आथ पकड़ी की बोलणा, "डर नि, मां तेरी मताद करनी।" 14 यहोवे बोलेया, "ओ कीड़े जेड़े याकूब, ओ इस्राएलो रे माणूंओ, डरो नि! यहोवे री ये बाणी ए, मां तेरी मताद करनी; इस्राएलो रा पवित्र परमेशर तेरा छुड़ाणे वाल़ा ए। 15 देख, मैं तूँ छुरी वाल़े गाह्णे रा एक नवां ओर शुद्ध यन्त्र ठराई राखेया; तां पाह्ड़ गाह्यी-गाह्यी की, तूड़ बणाई देणे ओर तां पाह्ड़िया पूओ जेड़िया करी देणियां।" 16 तां पाह्ड़ ओर पाह्ड़िया अवा दे फड़ाकणियां ओर सेयो अवा उडाई की लई जाणिया ओर सेयो तूफानो तित्तर-बित्तर करी देणियां। पर तूँ यहोवे रिया बजा ते मगन ऊणा ओर तां इस्राएलो रे पवित्र परमेशरो री तारीफ करनी।

17 जेबे गरीब ओर कंगाल़ लोका खे पाणी टोल़ी की पनि मिलणा ओर तिना रा गल़ा त्याय रे मारे सूकी जाणा, तेबे मां यहोवे तिना री दुहाई सुणनी, आऊँ इस्राएलो रा परमेशर ए ओर मां सेयो छाडणे नि। 18 मां फूखी री पाह्ड़िया ते नदिया ओर मैदाना बीचे सूबल़ा निकयाल़निया; मां जंगल़ तलाब ओर मरूस्थल देशो दे सूबल़ा ई सूबल़ा करी देणियां। 19 मां रेगिस्तानो रे बणो रे देवदार, बबूल, मईंदी ओर जैतून जमाणे; मां अराबा रे सनौबर, चिनार ओर चीला रे डाल़ कट्ठे लगाणे; 20 जिना खे देखी की लोका खे पता लगी जाओ ओर सोची की पूरी तरअ ते समजी लो कि ये यहोवे रे आपणे आथो साथे कित्तेया राए, ओर इस्राएलो रे पवित्र परमेशरो रा बणाया राए।

यहोवे री चूठे देवतेया खे चतौणी

21 यहोवा मूर्तिया खे बोलोआ, "आपणा मुकद्दमा लड़ो," याकूबो रा राजा बोलोआ, "आपणे सबूत देयो।" 22 सेयो तिना खे देई की आसा खे भविष्यबाणी करो कि आऊणे वाल़े बखतो दे क्या ऊणा? बीते रे बखतो रिया कटना बताओ कि शुरूओ दे क्या-क्या ऊआ, जेते कि आसे तिना खे सोची की जाणी सकिये कि आऊणे वाल़े बखतो दे तिना रा क्या फल़ ऊणा; या ऊणे वाल़ी कटना रे बारे दे आसा गे सुणाई देयो। 23 आऊणे वाल़े बखतो दे जो कुछ बितणा से बताओ, तेबे आसा मानणा कि तूँ परमेशर ए, खरा या बुरा, कुछ तो करो कि आसे देखी की हैरान ऊई जाऊँ। 24 देख, तुसे मूर्तिया कुछ नि ए, तुसा दे कुछ नि ऊँदा, जो कोई तुसा खे चाओआ से घृणित ए। 25 मैं एक उत्तर दिशा ते अमला करने खे सकेल़ेया, फारसो रा राजा आई बी गया, से पूर्ब दिशा ते ए ओर मेरा नाओं लओआ; जिंयाँ कुम्हार सीनी माट्टिया खे मांडोआ, तेड़ा ई तेस परदान चीकड़ो दे मांडणे। 26 ये गल्ल पईले ते ई किने बताई राखी थी, जेते कि आसे ये जाणदे? क्या ये पईले तेई किने बताया जेते कि आसे बोलूँ कि से सच्चा ए? कोई बी बताणे वाल़ा नि ए, कोई बी सुनाणे वाल़ा नि ए, तुसा री गल्ला खे सुनाणे वाल़ा कोई नि ए। 27 आऊँ यहोवा, सिय्योनो खे समाचार देणे वाल़ा पईला माणूं था, "देख, इना खे देख ओर मैं यरूशलेम शईरो खे एक शुभ सन्देश देणे वाल़ा पेजेया। 28 मैं देवतेया बीचे बी कोई नि देखेया ओर तिना बीचे कोई मन्त्री नि ए जो मेरे पूछणे ते कोई ज्वाब देई सको। 29 सुणो, तिना सबी मूर्तिया रे काम अनर्थ करने वाल़े ए, तिना रे काम तुच्छ ए ओर तिना री कअड़ी रिया मूर्तिया अवा ओर चूठिया ए।"