यशायाह 18

कूशो रिया तँईं परमेशरो रा सन्देश

1 लाणत ए तेसा जमीना खे जो कूशो रिया नदिया साथे-साथे फैली री। ए जमीन टिड्डिया ते परी री ए। तुसे तिना पंखा रा फड़फड़ाणा सुणी सकोए। 2 ओर समुद्रो पाँदे दूता खे नंगल़ो री किस्तिया दे बठयाल़ी की नील नदिया री बाटा ते ये बोली की पेजेया, "ओ फुर्तिले दूतो, एक एड़िया जातिया रे लोका गे जाओ जेसा रे लोक तगड़े ओर सुन्दर ए, जो शुरूओ ते आजो तक डराऊणे ए, जो नापणे ओर केसणे वाल़ा बीए ओर जिना रा देश बड़ी नदिया साथे दो इस्से दे करी राखेया।" 3 सुणो, तरतिया रे सब रणे वाल़े लोको, जेबे लड़ाईया खे चण्डे खे पाह्ड़ो पाँदे खड़ा करो, तो तेसखे देखो! जेबे नरसिंगा बजोगा, तेबे सुणो! 4 कऊँकि यहोवे मांगे ईंयाँ बोली राखेया, "तूपा री तेज गर्मी या बडाईया रे बखतो दे बर्खा वाल़े बादल़ो जेड़ा मां शान्त ऊई की देखणा। 5 कऊँकि अंगूर तोड़ने रे बखतो ते पईले जेबे फूल फूली चुके ओर अंगूरा रे गुच्छे पाकणे लगे, तेबे यहोवे तिना रिया पाँगटिया दाचिया साथे बाडणियां ओर फैली रिया डाल़िया तोड़ी-तोड़ी की लग सेटी देणियां। 6 सेयो अँगूर ओर फैलणे वाल़ी डाल़िया*18:6 सेयो अँगूर ओर फैलणे वाल़ी डाल़िया इथोपिया सिपाईया रिया लाशा पाह्ड़ो रे मासाहारी पंछीया*18:6 मासाहारी पंछीया इल्ला खे ओर बणो रे डांगरा खे खाणे रिया तँईं छाडी देणियां। गर्मिया दे पंछीया इना अँगूरा रिया बेला दे रणा ओर सारे प्रकारा रे बणो रे डांगरा तिना खे खांदे-खांदे ठण्ड बीताणी। 7 तेस बखते जेसा जातिया रे लोक*18:7 जेसा जातिया रे लोक सेयो इथोपिया रे लोक तगड़े ओर सुन्दर ऊणे ओर जो शुरूओ ते ई डराऊणे ऊँदे आई रे ओर नापणे ओर केसणे वाल़े ए ओर जिना रा देश नदिया साथे दो इस्से करी राखेया, तेसा जातिया ते सेना रे यहोवे रे नाओं री जगा, सिय्योन पाह्ड़ो*18:7 सिय्योन पाह्ड़ो यरूशलेम पाँदे सेना रे यहोवे गे पेंट पऊँचाया जाणी।"