1 ओ इस्राएलो रे लोको तुसा खे रचणे वाल़ा ओर ओ याकूब ताखे रचणे वाल़ा यहोवा एबे ईंयाँ बोलोआ, "डर नि, कऊँकि मैं तूँ छुड़ाई ला रा, मैं तूँ नाओं लई की बुलाई राखेया, तूँ मेरा ई ए। 2 जेबे तूँ समुद्रो बीचे पाणिए बीछीए जाए, मां तां साथे-साथे रणा ओर जेबे तूँ नदिया बीछीए चलेगा, तेबे नदिया ताखे डूबाई नि सकदिया, जेबे तूँ आगी बीछीए चलेगा, तेबे ताखे सेक नि लगणा ओर आगी री लूपिया ताखे फूकी नि सकणियां। 3 कऊँकि आऊँ यहोवा तेरा परमेशर ए, आऊँ इस्राएलो रा पवित्र परमेशर तेरा उद्धार करने वाल़ा ए, मैं तूँ मिस्र देशो री गुलामिया ते छुड़ाया ओर बदले दे ताखे कूश ओर सबा देश आपणे करने खे दित्ते। 4 मेरी नजरा दे तूँ बऊत कीमती ओर इज्जतदार ठईरी रा ओर आऊँ तां साथे प्यार राखूँआ, इजी बजा ते मां तेरे बदले माणूं ओर तेरे प्राणो रे बदले राज-राज रे लोक देई देणे। 5 इजी खे डर नि, कऊँकि आऊँ तां साथे ए, मां तेरा कराना दूरो रे पूर्ब देशो ते लई आऊणा ओर पच्छमा ते बी कट्ठा करना।* 6 मां उत्तर दिशा खे बोलणा, ‘मेरे बाल़क माखे देई दे’, ओर दक्खण दिशा ते बोलणा: मेरे लोका खे बंदी बनाई कि नि राख दूरो-दूरो ते मेरे पाऊआ ओर मेरी बेटिया खे मांगे ली आओ;* 7 हर एकी माणूंए खे जेसखे मेरा बोलेया जाओआ, ओर जो मैं आपणे आदर करने खे बणाई राखे, सेयो सब मेरे ए।"

8 परमेशरे बोलेया, "एड़े लोका खे जिना रे आखी रंदे ऊए अन्दे ए ओर कान रंदे ऊए टऊणे ए तिना खे निकयाल़ी की ली आओ! 9 सबी जातिया रे लोका खे कट्ठे करी देयो ओर सारी दुनिया रे लोक कट्ठे ओ। तिना बीचा ते कुण ये गल्ल बताई सकोआ या बीती रिया गल्ला आसा गे सुणायी सकोआ? सेयो आपणे गवाह् ली आओ, जेते कि सेयो सच्चे ठईरो, सेयो सुणी लो ओर बोलो कि ये सच्च ए।" 10 यहोवा बोलोआ, "तुसे लोक ई मेरे गवाह् ए ओर मेरे दास ए, जो मैं इजी खे चूणी राखे ताकि तुसे समजी की मेरा परोसा करो ओर ये जाणी लो कि आऊँ सेईए। मांते पईले कोई परमेशर नि ऊआ ओर ना मांते बाद कोई ओर परमेशर ऊणा।* 11 आऊँ ई यहोवा ए ओर माखे छाडी की ओर कोई उद्धार करने वाल़ा नि ए। 12 मैं ई सन्देश दित्तेया, ओर उद्धार कित्तेया ओर बताया बी, जेबे तुसा बीचे कोई पराया देवता नि था, इजी री खातर तुसेई मेरे गवाह् ए," यहोवे री ये बाणी ए। 13 आऊँ ई परमेशर ए ओर सदा रणे वाल़ा बी आऊँ ईए, कोई नि ए जो मेरे आथो ते केसी खे छुड़ाई सकोआ, जेबे आऊँ काम करना चाऊँ, तेबे माखे कुण रोकी सकोआ।*

14 तुसा रा छुड़ाणे वाल़ा ओर इस्राएलो रा पवित्र यहोवा ईंयाँ बोलोआ, "मां तुसा रिया तँईं सेना बाबेलो रे खलाफ पेजणी। ओर तेथो रे सब रणे वाल़े भगोड़े री दशा दे ओर कसदी लोक बी तिना रे जाह्जो दे चढ़ाई की ल्याऊणे, जिना रे बारे दे सेयो बड़ा बोलोए। 15 आऊँ यहोवा तुसा रा पवित्र, इस्राएलो खे बनाणे वाल़ा, तुसा रा राजा ए।" 16 यहोवा जो समुद्रो दे बाट ओर प्रचण्ड बाढ़ा दे बाट बणाओआ, 17 जो रथा, कोड़ेया ओर शूरवीरा समेत सेना खे निकयाल़ी की ली आओआ, सेयो तो कट्ठे ई तेथी रयी गे ओर फेर नि उठी सकदे, सेयो बीजी गे, सेयो रेशमो री बाठिया जेड़े बीजी गे। से ईंयाँ बोलोआ, 18 पर यहोवे बोलेया, "एबे बीती री गल्ला रे बारे दे नि सोचो, ना ई पुराणे बखतो री गल्ला पाँदे त्यान लगाओ। 19 देखो, आऊँ एक नवीं गल्ल करूँआ, से यबु सामणे आऊणी, क्या तुसे तिजी रे बारे दे अणजाण रणे? मां उजाड़ जगा दे एक बाट बनाणी ओर सूके रेगिस्तान देशो दे पाणिये रिया नदिया बाह्णियां।* 20 गीदड़ ओर शुतुरमुर्गेया बगैरा सबी जंगल़ी जन्तुआ मेरी महिमा करनी, कऊँकि मां आपणी चूणी री प्रजा खे पीणे खे उजाड़ जगा दे पाणी ओर रेगिस्तानो दे नदिया बाह्णियां। 21 ये इस्राएलो रे लोक ए जो मैं आपणियां तँईं बणाई राखे, ताकि सेयो मेरी स्तुति करो।"*

22 यहोवे बोलेया, "तेबे बी ओ याकूब, तैं मांते मतादा रिया तँईं प्रार्थना नि कित्ती; बल्कि ओ इस्राएल, तूँ मांते बोर ऊईगा रा! 23 मेरिया तँईं बलि करने खे तूँ मिन्टू नि ल्याया ओर ना मेलबलि चढ़ाई की मेरी महिमा करी राखी। देख, मैं नज्जो री बलि चढ़ाणे री कठण सेवा तांते नि कराई, ना तांते तूप लई की तूँ थकाया।" 24 तूँ मेरिया तँईं खुशबूदार नंगल़ कीमत देई की नि ल्याया ओर ना मेलबलिया री चर्बिया साथे आऊँ खुश कराया, पर तैं आपणे पापो रिया बजा ते मां पाँदे बोजा लादी ता रा ओर आपणे बुरे कामो साथे आऊँ थकाईता रा। 25 आऊँ सेईए, जो आपणे नाओं रे मुताबिक तेरे पाप खत्म करी देऊँआ ओर तेरे पाप याद नि करूँगा।* 26 माखे याद करो, आसे आपू बीचे बईस करूँए, तूँ आपणी गल्ल बता जेते कि तूँ निर्दोष ठईरे। 27 तेरा मूल़ मर्द* पापी ऊआ ओर जो-जो मेरे ओर तुसा बीचे बीचोले ऊए, सेयो मां साथे बगावत करदे आई रे। 28 इजी बजा ते मैं पवित्र जगा रे हाकिम अपवित्र ठराए, मैं याकूबो रा नाश ओर इस्राएल शर्मिंदा ऊणे दित्तेया।