1 भविष्यबक्ता यशायाह इस्राएलो रे लोका खे बोलोआ कि यहोवा बोलोआ, "ओ इस्राएलियो, ये गल्ल सुणो, तुसा खे जो इस्राएली बोलेया जाओआ ओर यहूदा री सूबल़ा रे पाणिए ते पैदा ऊई रे; जो यहोवे रे नाओं री कसम खाओए ओर इस्राएलो रे परमेशरो री चर्चा तो करोए, पर सच्चाई ओर तर्मो साथे नि करदे। 2 कऊँकि इस्राएली लोक आपणे आपू खे पवित्र शईर यरूशलेमो रे लोक ऊणे रा दावा करोए ओर इस्राएलो रे परमेशरो पाँदे, जेसरा नाओं सेना रा यहोवा ए, परोसा राखोए।" 3 यहोवा इस्राएलो ते बोलोआ, "मैं ऊणे वाल़िया गल्ला बऊत पईले ते ई बताई ती रिया कि क्या ऊणे वाल़ा ए, मैं अचाणक सेयो बताईया ओर सेयो गल्ला सच्ची ऊईया। 4 आऊँ जाणो था कि तूँ टीठ ए ओर तेरी क्याड़ी लोए री नस ओर तेरा माथा पीतल़ी राए। 5 इजी बजा ते मैं यो गल्ला पईले ते ई तांगे बताईया, तिना रे ऊणे ते पईले ई मैं तांगे बताया, ताकि एड़ा नि ओ कि तूँ बोले कि ये तो मेरे देवते रा काम ए, मेरी बणाई री मूर्तिया री आज्ञा ते ये ऊई रा। 6 तैं सुणी राखेया, एबे इना सबी मेरिया भविष्यबाणिया पाँदे त्यान दे ओर देख, क्या तां इना रा प्रचार नि करना? आजो ते मां ताखे नईया-नईया गल्ला ओर एड़िया गुप्त सुनाणियां जिना खे तूँ नि जाणदा।* 7 सेयो कटना यबु-यबु बणाई राखिया, पईले ते नि; बल्कि आजो ते पईले तैं सुणी पनि राणिया थिया, एड़ा नि ओ कि तूँ बोले कि देख आऊँ तो इना खे जाणूं था। 8 जिना गल्ला रे बारे दे आऊँ तांगे बताणे वाल़ा ए, तैं सेयो कदी नि सुणी राखिया ओर ना ई सेयो पईले ते समजी राखिया, कऊँकि माखे पता था कि तां पक्का मां साथे विश्वासघात करना ओर तेरा नाओं गर्भो ते ई पापी ए। 9 ताकि लोक मेरे नाओं री स्तुति करो आऊँ देरिया ते रोष करूँआ ओर आपणी महिमा रे मुताबिक आऊँ आपू खे रोकी राखूँआ, एड़ा नि ओ कि आऊँ ताखे बाडी देऊँ। 10 देख, मैं तूँ शुद्ध तो कित्तेया, पर चाँदिए जेड़ा नि; मैं तूँ दु:खो री पट्ठिया रे परखी की चूणी राखेया।* 11 आपणे मुताबिक, आ आपणे ई मुताबिक मैं ये कित्तेया, मेरा नाओं अपवित्र कऊँ ठईरो? मां आपणी महिमा दूजे खे नि देणी।"

12 यहोवा बोलोआ, "ओ याकूब, ओ इस्राएल मेरी गल्ल सुण, मेरी तरफा खे कान लगाई की सुण! आऊँ सेईए, आऊँ ई शुरूआत ओर आऊँ ई अन्त ए। 13 आ, मैं आपणे ई आथो साथे तरतिया री निऊँ पायी राखी, ओर मेरे ई दाणे आथे सर्ग फैलायी राखेया, जेबे आऊँ तिना खे बुलाऊँआ, सेयो एकी साथे दिशोए।* 14 तुसे सारे के सारे कट्ठे ऊई की सुणो! तिना बीचा ते किने एकी बी इना गल्ला रे बारे दे बताया? यहोवा तेस साथे प्यार राखोआ, तेस बेबीलोनो पाँदे आपणी इच्छा पूरी करनी ओर तेसरा आथ बेबीलोनो रे लोका पाँदे पड़ना। 15 मैं, आ मैं ई कुस्रू राजा बुलाई राखेया, आऊँ तेसखे ली आई रा ओर तेसरा काम सफल ऊणा। 16 मेरे नेड़े आई की एसा गल्ला खे सुणो, शुरूओ ते लई की एबुए तक मैं कोई बी गल्ल गुप्त नि बोली; जदुओ ते से ऊआ तदुओ ते आऊँ तेती ए। एबे प्रभु यहोवे ओर तेसरी आत्मे आऊँ पेजीता रा।"

17 यहोवा जो ताखे छुड़ाणे वाल़ा ओर इस्राएलो रा पवित्र परमेशर ए, से ईंयाँ बोलोआ, "आऊँ ई तेरा परमेशर यहोवा ए जो ताखे तेरे फायदे रिया तँईं शिक्षा देयोआ ओर जेते बाटा दे तां जाणा ओआ, तेते ई बाटा दे ताखे लई चलूँआ। 18 खरा ऊँदा जे तैं मेरिया आज्ञा त्यानो साथे सुणिया ऊँदिया! तेबे तेरी शान्ति नदिया जेड़ी ओर तेरा तर्म समुद्रो री लईरा जेड़ा ऊँदा; 19 तेरा कराना ओर तेरी ल्वाद बालूए री कणियां जेड़ी ऊँदी; तिना रा नाओं मेरे सामणे ते ना कदी कठदा ओर ना मिटदा।" 20 यहोवा भविष्यबक्ते रे जरीये आपणे लोका ते बोलोआ, "बाबेलो ते निकल़ी जाओ, कसदिया बीचा ते नठी जाओ; जयजयकार करी की एसा गल्ला रा प्रचार करी की सुणाओ, तरतिया रे कूणे तक एसा गल्ला री चर्चा फैलाओ; बोलदे जाओ, यहोवे आपणे दास इस्राएलो रे लोक छुड़ाईते दे ए!"* 21 यहोवा आपणे लोका इस्राएलिया खे रेगिस्तान देशो रे लईगा, तेबे तिना खे त्याय नि लगी; तिने तिना खे चट्टानी ते पाणी काडेया; तिने चट्टान चीरी ओर पाणी निकल़ी गा। 22 पापिया खे कोई शान्ति नि ए, "यहोवे रा येई वचन ए।"