इस्राएलो रा उद्धार
1 न्याय रे तेस दिने यहोवे कड़क, बड़ी ओर मजबूत तलवारी साथे लिब्यातान नाओं रे तेज ओर टेडे चलणे वाल़े सापो खे सजा देणी ओर जो अजगर समुद्रो दे रओआ, से बी काई देणा। 2 तेस बखते एक सुन्दर अंगूरा रा बगीचा ऊणा, तुसे तेसरे गीत गाओ। 3 आऊँ यहोवा तेस बागो री रक्षा करूँआ, मां बाग ठीक बखतो पाँदे सिंजेया करना। मां बगीचे री दिन-रात रक्षा करदे रणा, एड़ा नि ओ कि कोई तेसरा नुकशाण करो। 4 आऊँ आपणे माणूंआ ते बऊत दिन तक नराज नि रयी सकदा। जे कोई कई-प्रकारा रे कांडेवाल़े डाल़ मां साथे लड़ने खे खड़े करोआ, तो आऊँ तिना पाँदे पैर बढ़ाई की पूरी तरअ ते फूखी देऊँआ। 5 जे कोई मेरा दुश्मण मेरी शरण लओ, ओर मा साथे मेलजोल करने खे मेरी शरण लओ, सेयो मां साथे मेलजोल करी लओ। 6 आऊणे वाल़े बखतो दे याकूबो रे लोक तेस डाल़ो जेड़े ऊणे जेसरी जड़ खरी ओई ओर इस्राएल फल़णा-फूलणा ओर तेसरे फल़ा साथे दुनिया परी जाऊणी।
7 मैं यहोवे इस्राएली लोका खे इतणी सख्त सजा नि दित्ती, जितणी मैं तिना रे दुश्मणा खे सख्त सजा देई कि काये थे। 8 जेबे तैं आपणे लोका खे गुलामिया दे पेजी की सजा दित्ती, तेबे सोची-समजी की तेसखे दु:ख दित्तेया, तिने पुरवाईया रे दिने से प्रचण्ड अवा साथे उडाई ता रा। 9 इजी ते याकूबो रे पापो रा प्राश्चित करेया जाणा ओर तेसरे पापो रे दूर ऊणे रा प्रतिफल़ ये ऊणा कि तिना बेदिया रे सारे पात्थर चूना बनाणे वाल़े पात्थरा जेड़े चूर-चूर करने ओर अशेरा देवता ओर सूरजो रिया मूर्तिया फेर खड़िया नि रणियां।27:9 रोम. 11:27 10 कऊँकि मजबूत दवाला वाल़ा शईर खाली ऊई रा,27:10 दवाला वाल़ा शईर ऊई सकोआ इस्राएलो रे सारे दवाला वाल़े शईरा खे बताओआ से छाडी री बस्तिया जेड़े खाली ओर जंगल़ ऊईगा रा, तेती बाच्छू चरने ओर तेथी बैठणे ओर तेती तिना डाल़ा री पाँगटिया रे पत्ते खाणे। 11 जेबे अँगूरो रिया पाँगटिया सूकी जाणिया, तेबे सेयो तोड़ी की सेटी देणियां ओर जवाणसा आई की सेयो चकी की फूकी देणियां। कऊँकि यो लोक समजदार नि ए, इजी री खातर इना खे बनाणे वाल़े परमेशरो इना पाँदे फेर दया नि करनी ओर ना इना पाँदे अनुग्रह करना। 12 तेस बखते यहोवे फरात नदिया रे कनारे ते लई की मिस्रो रे नाल़े तक आपणा नज्ज फरकाणा ओर ओ इस्राएलियो, तुसे एक-एक करी की कट्ठे करे जाणे। 13 तेस बखते बड़ा नरसिंगा बजाया जाणा ओर जो अश्शूर देशो दे नाश ऊणे लगी रे थे ओर सेयो इस्राएली लोक जो अश्शूर देशो दे छाडी ते दे थे ओर मिस्र देशो दे बसाई ते दे थे, सेयो मिली की आऊणे ओर तिना यरूशलेम शईरो रे पवित्र पाह्ड़ो पाँदे यहोवे री आराधना करनी27:13 मत्ती 24:31