यशायाह 34

परमेशरो आपणे दुश्मणा खे सजा देणी

1 ओ सारे देशो री जातिया-जातिया रे लोको, सुणने खे नेड़े आओ ओर ओ राज-राज रे लोको, त्यानो साथे सुणो! तरती बी ओर जो कुछ तिदे ए, दुनिया ओर जो कुछ तिदे पैदा ओआ, सब कान खोली की सुणो। 2 यहोवा सबी जातिया पाँदे रोष करने लगी रा ओर तिना री सारी सेना पाँदे तेसरा रोष पड़की रा, तिने सेयो तिना रे दुश्मणा रे आथो दे नाश ऊणे ओर संहार ऊणे खे छाडी ते रे। 3 तिना रे लोक काई की बारे सेटी देणे ओर तिना री लाशा ते सड़यान आऊणी, तिना रे खूनो साथे पाह्ड़ बी टखी जाणे। 4 सर्गो रे सारे ग्रह, सूरज, चाँद ओर तारे चूर-चूर ऊई जाणे, सर्ग रूड़ी जाणा ओर तेतेरिया सारिया चीजा रूड़ी जाणिया ओर सर्ग कागजो जेड़ा लपेटी देणा। जिंयाँ अंगूर या दाऊगल़े रे पत्ते सूकी की अल़ी जाओए, तिंयाँ ई सर्गो रे सारे तारेया री चमक जांदी रणी।*34:4 मत्ती 24:29, मर. 13:25, लूक. 21:26, 2 पत. 3:12, प्रका. 6:13,14 5 यहोवा बोलोआ, एड़ा तेस बखते ऊणा जेबे सर्गो दे मेरी तलवार खून पी की रज्जी जाणी, देखो यहोवे री नाश करने वाल़ी तलवार एदोमो पाँदे, ओर जिना पाँदे परमेशरो रा स्राप ए तिना पाँदे पड़नी।*34:5 एदोमी याकूबो रे पाई एसावो रे कुलो रे थे, उत्प. 25:30। 6 यहोवे री तलवार खूनो साथे परी गी री, से चर्बिया साथे, ओर पेडा रे बच्चे, बाकरेया रे खून ओर खाडूआ रे गुर्देया री चर्बिया साथे रज्जी गी री ए। कऊँकि बोस्रा शईरो दे यहोवे रा एक यज्ञ ओर एदोम प्रदेशो दे बड़ा संहार ऊई रा।

7 एदोमिया साथे जंगल़ी सांड, बाच्छू ओर बल़द फाटणे ओर तिना री जमीन खूनो साथे सीजी जाणी ओर तेथो री माट्टी चर्बिया साथे मोटी ऊई जाणी। 8 कऊँकि बदला लणे खे यहोवे रा एक दिन ओर सिय्योनो रा मुकद्दमा चुकाणे खे एक साल ठराई राखेया ए। 9 ओर एदोमो रिया नदिया तारकोल़ा साथे ओर तेथो री माट्टी गन्धको दे बदली जाणी, एदोमो री माट्टी फूकदी ऊई तारकोल़ बणी जाणी। 10 से दिन-रात बल़दी रणी, कोई बी आदमी तेसा आगी खे नि रोकी सकदा तेतेरा तुआँ सदा उठदा रणा। से तरती युगो-युगो तक उजाड़ पड़ी दी रणी, कोई तिसिये ऊई की कदी नि चलणा।*34:10 प्रका. 14:11, प्रका. 19:3 11 पर तेती जंगल़ी पंछी ओर डांगर ऊणे ओर तेती उल्लू ओर कावा रे बसेरे ऊणे। तेस तेते पाँदे गड़बड़िया री डोरी ओर सुनसानिया रा साल़ लगाणा।*34:11 प्रका. 18:2, सप. 2:14 12 तेती ना तो अमीर ऊणे ओर ना कोई एड़ा ऊणा जो राज करने खे ठराया जाओ, तेसरे सबी परदाना रा अन्त ऊणा।*34:12 प्रका. 6:15 13 तेथो रे सारे बांके मईला दे कांडेवाल़े डाल़, गढ़ा दे बिच्छूए रे पौधे ओर जाड़ जमणा। से गीदड़ा रे रणे री जगा ओर शुतुरमुर्गेया रे रणे री जगा बणी जाणी। 14 एदोमो रे रेगिस्तानो रे देशो रे जानवर कुत्तेया साथे मिली की बसणे ओर जंगल़ी बाकरिया एकी-दूजे खे आका पाया करनिया; तेती जानवरा आपणा डेरा पाई की रात कटेया करनी। डराऊणा जानवर चैना साथे रया करना।*34:14 प्रका. 18:2 15 तेती उल्लूआ अण्डे देणे ओर जेबे अण्डे टूटी जाणे, तेबे माया सेयो तिना रे पंख आऊणे तक सेयो टखी देणे, तेती ईला आपणे साथिया साथे मिली की रणियां। 16 यहोवे री कताबा दे टोल़ी की पढ़ो, तिदे क्या लिखी राखेया। इना बीचा ते एक बी गल्ल बिना पूरे ऊणे ते नि रणी, कोई बी पंछी बिना जोड़े ते नि रणा, कऊँकि परमेशरे आपणे मुंए ते ये आज्ञा देई राखी ओर तेसरी आत्मे सेयो कट्ठे करी राखे। 17 ये यहोवा ए तिने ई फैंसला करी राखेया कि एदोम प्रदेशो री जमीना दे कुण रणा, तिने ई आपणे आथो साथे डोरी ओर साल़ लगाई की एदोमो री जमीन पूरी तरआ ते बणो रे जानवरा खे देईती दी ए, से सदा तिना रा ई बणेया दा रणा ओर सेयो पीढ़िया ते पीढ़िया तक तिदे ई बसे रे रणे।