1 यशायाहे बोलेया, "बेल देवता* ओर नबो देवता* तां आगे चूकी गे, तिना री मूर्तिया डांगरा पाँदे बल्कि करेलू डांगरा पाँदे लदी रिया; जिना चीजा खे तुसे चकी की फिरदे रओए, सेयो एबे पारी बोजा ऊईगिया ओर थके रे डांगरा पाँदे लदी रिया।" 2 यहोवा बोलोआ, "सेयो मूर्तिया चूकी गिया, सेयो एक साथे चूकी गिया, सेयो तेस पारो खे छुड़ाई नि सके ओर आपू बी गुलामिया दे चली गे रे।" 3 ओ याकूबो रे कराने, मेरी सुण! ओ इस्राएलो रे कराने रे सारे बचे रे लोको, मेरी तरफा खे कान लगाई की सुणो; आऊँ तुसा खे तदुओ ते चकी की आई रा, जदुओ ते तुसे पैदा ऊई रे। 4 जेबे तुसे स्याणे ऊणे तेबे बी आऊँ तेड़ा ई रणा ओर मां तुसे स्याणदे बखतो तक साथे राखणे। मैं तुसे बणाए ओर तुसे साथे राखणे; मां तुसे चकी की राखणे ओर तुसा खे छुड़ांदा बी रऊँगा। 5 तुसा मेरी उपमा केस साथे देणी ओर आऊँ केस जेड़ा बताणा, केस साथे मेरा मलाप करना कि आसे एक जेड़े ए। 6 कई लोक सूईने ओर चाँदिए ते अमीर ए। जो थैलिया ते सूईना लटोए ओर ताकड़िया दे चाँदी तोलोए, जो सन्यारो खे मजदूरी देई की तेसते देवते री मूर्ति बणाओए, तेबे सेयो तेसगे माथा टेकोए, बल्कि तेसरी आराधना बी करोए।* 7 सेयो लोक चूठे देवतेया रिया मूर्तिया खे कान्दा पाँदे चकी की फिरदे रओए, सेयो तेसा मूर्तिया खे तेसरी जगा दे राखी देओए ओर से तेथी खड़ी दी रओई; से आपणी जगा ते अटी नि सकदी; जे कोई तेसारी दुहाई बी देयो, तेबे बी से सुणी नि सकदी ओर ना मुसीबता दे तेसरा उद्धार करी सकोई। 8 "तुसे लोके पाप करी राखे। तुसे इना गल्ला खे फेर याद करो ओर त्यान देयो, इजी पाँदे फेर मन लगाओ। 9 जो काम मैं बऊत बखत पईले कित्ते थे तिना खे याद करो, कऊँकि आऊँ ई परमेशर ए, दूजा कोई नि ए, आऊँ ई परमेशर ए ओर मां जेड़ा कोई पनि ए। 10 आऊँ तो अन्तो री गल्ल शुरूओ ते ओर पुराणे बखतो ते बतांदा आई रा जो एबुए तक नि ऊई। आऊँ बोलूँआ, ‘मेरी योजना स्थिर रणी ओर मां आपणी इच्छा पूरी करनी।’ 11 आऊँ पूर्बो ते एक उकाब पंछी, मतलब दूर देशो ते आपणी योजना पूरी करने वाल़े मर्दो खे बुलाऊँआ। मैं ई ये गल्ल बोली राखी ओर मां ये पूरी बी करनी, मैं ये सोची राखेया ओर मां ये सफल बी करनी।* 12 ओ काठे मन वाल़े लोको! मेरी गल्ल सुणो। तुसे जो उद्धारो ते बऊत दूर ए। 13 आऊँ आपणी धार्मिकता नेड़े ल्याऊणे वाल़ा ए, से दूर नि ए ओर मेरे उद्धार करने दे देरी नि ऊणी, मां यरूशलेम बचाणा ओर इस्राएलो खे इज्जत देणी।"