यशायाह 2

शान्तिया रा शईर

1 आमोसो रे पाऊ यशायाह रा वचन, जो तिने यहूदा प्रदेश ओर यरूशलेम शईरो रे बारे दे दर्शणो दे देखेया। 2 आऊणे वाल़े दिना दे एड़ा ऊणा कि परमेशर यहोवे रे मन्दरो रा पाह्ड़ सबी पाह्ड़ा पाँदे मजबूत करेया जाणा ओर सबी पाह्ड़िया ते ऊच्चा करेया जाणा ओर हर जातिया रे लोक खाड्डा रे पाणिए जेड़े तेसरी तरफा खे चलणे। 3 तेबे बऊत देशो रे लोक आऊणे ओर तिना आपू-बीचे बोलणा, "आओ, आसे यहोवे रे पाह्ड़ो पाँदे चढ़ी की, याकूबो रे परमेशरो रे मन्दरो रे जाऊँए, तेबे तेस आसा खे आपणी बाट सिखाणी ओर आसा तेसरी बाटा रे चलणा।" कऊँकि यहोवे रा बिधि-बिधान सिय्योनो ते ओर तेसरा वचन यरूशलेम शईरो ते निकल़ना। 4 यहोवे जातिया-जातिया रा न्याय करना ओर देश-देशो रे लोका रे चगड़े मिटाणे और तिना आपणियां तलवारी कूटी की अल़ो रे फाल़े ओर भाल़ेया री दाचिया बनाणियां, तेबे एकी जातिया दूजी जातिया रे खलाफ फेर तलवार नि चलाणी, ना लोका आगो खे युद्ध बिद्या सिखणी।

कमण्डिया रा नाश करी देणा।

5 ओ याकूबो रे कराने, आओ, आसे परमेशर यहोवे रे प्रयासे दे चलूँए।*2:5 इफि. 5:8, 1 यूह. 1:7 6 यहोवा तैं आपणी प्रजा याकूबो रा कराना त्यागी ता रा, कऊँकि तिने आपणी जमीन पूर्बा रे देशा रे रीति रिवाजा ते परीता ओर पलिश्तिया जेड़ा जादू-टोणा करोए ओर सेयो मूर्तिपूजा करने वाल़ेया साथे मिली गे। 7 इस्राएल देश चाँदी ओर सूईने साथे परेया राए और तिना रे राखे रे तअनो री कोई सीमा नि ए, तिना रा देश कोड़ेया साथे परेया राए ओर तिना रे रथ अणगिणत ए। 8 तिना रा देश मूर्तिया साथे परेया राए; ओर सेयो आपणे आथो री बणाई री मूर्तिया री पूजा करोए। 9 सारे माणूं नराश ऊणे, ओर बेज्जत ऊणे, इजी बजा ते ओ यहोवा तिना खे माफ नि कर! 10 ओ माणूं, यहोवे रे डरो रिया बजा ते ओर तेसरे प्रतापो रिया बजा ते चट्टानी रे कूसी जा ओर माट्टिया रे टेरो दे लूकी जा।*2:10 प्रका. 6:15, लूक. 23:30 11 कऊँकि माणूंए रिया कमण्डो साथे परी रिया आखी निठिया करी देणियां ओर माणूंआ रा कमण्ड दूर करेया जाणा ओर तेस न्याय रे दिने बस यहोवा ई ऊच्चिया जगा दे बैठेया दा रणा।*2:11 2 थिस्स. 1:9 12 कऊँकि सेना रे यहोवे रे चूणे रे दिने सब कमण्डी ओर ऊच्ची क्याड़िया वाल़ेया पाँदे ओर तरक्किया ते फूलणे वाल़ेया पाँदे आऊणा ओर सेयो चुकाए जाणे; 13 लबानोनो रे सब देवदारा पाँदे जो ऊच्चे ओर बड़े ए; 14 बासानो रे सारे बाँजो रे डाल़ा पाँदे और सारे ऊच्चे पाह्ड़ ओर पाह्ड़िया पाँदे; 15 सारे ऊच्चे गुम्मटो ओर सारी मजबूत दवाला पाँदे, 16 तर्शीश शईरो रे सारे बपारो रे जाह्जा ओर सुन्दर चित्रकारिया पाँदे यहोवे रे न्याय रा आओआ। 17 माणूंआ रा कमण्ड मिटाई देणा और माणूंआ रा कमण्ड निठा करेया जाणा ओर तेस दिने बस यहोवा ई ऊच्चिया जगा रे बैठेया रा रणा। 18 सारी मूर्तिया नाश ऊई जाणिया। 19 जेबे यहोवा तरतिया खे थरथराणे खे उठणा, तेबे तेसरे डरो रिया बजा ते ओर तेसरे प्रतापो ते बचणे खे लोक गुफा दे, पाह्ड़ा री चट्टानी ओर जमीना दे खड्डे खणी की तिना दे लूकणे खे जाणे। 20 तेस दिने लोका आपणी सूईने-चाँदिए रिया मूर्तिया जो तिने माथा टेकणे खे बणाईया थिया, चूए ओर चमगादड़ा रे सामणे सेटणियां, 21 ओर जेबे यहोवा तरतिया खे थरथराणे खे उठणा, तेबे सेयो तेसरे डरो रिया बजा ते ओर तेसरे प्रतापो रे मारे चट्टानी री दरारा दे ओर पाह्ड़िया रे डवारा दे कूसी जाणे। 22 इजी री खातर ये परोसा नि करो की लोका तुसे बचाणे, जिना रा साआ तेसरी नासा रे ए, कऊँकि तेसरी कीमत आई क्या ए?