यशायाह 52

इस्राएलो रा उद्धार ऊणा

1 यशायाह बोलोआ, "ओ सिय्योनो रे लोको जागो! तुसे फेर सामर्थी ऊई जाओ। ओ पवित्र शईर यरूशलेम, आपणे अच्छे टाल्ले पईनी लो; कऊँकि तां बीचे बिना खतना कित्ते रे ओर अशुद्ध लोक तुसा खे सताणे फेर कदी नि आऊणे।*52:1 प्रका. 21:2,10,27 2 आपू पाँदा ते तूड़ चाड़ी दे, ओ यरूशलेम शईरो रे लोको उठो, ओ सिय्योनो रे लोको तुसे गुलाम थे, आपणे गल़ो ते गुलामिया री जंजीर खोली दे।" 3 कऊँकि यहोवा आपणे लोका ते ईंयाँ बोलोआ, "जेबे तुसे गुलाम बणे थे तो तुसा खे कोई पैसा नि दित्तेया था; तिंयाँ ई बिना पैसे देई की छुड़ाए बी जाणे।"*52:3 पज. 44:12, 1 पत. 1:18 4 परमेशर यहोवा ईंयाँ बोलोआ, "मेरी प्रजा पईले तो मिस्रो दे परदेशी ऊई की रणे खे गई थी बादो ते अश्शूरिये बी यहोवे रे लोका पाँदे बिना बजा ते अत्याचार कित्तेया। 5 इजी री खातर यहोवे री ये बाणी ए कि आऊँ एबे एती क्या करुँ जेबे कि मेरी प्रजा मुफ्त लई ली री? यहोवा ये बी बोलोआ कि जो तिना पाँदे राज करोए सेयो उड़दंग मचाणे लगी रे ओर मेरे नाओं री निन्दा लगातार पूरा दिन ऊँदी रओई।*52:5 यहे. 36:20-23, रोम. 2:24 6 इजी बजा ते मेरिया प्रजा मेरा नाओं जाणी लणा कि जो गल्ल करोआ से यहोवा ई ए; देखो, आऊँ ईए।" 7 तेसरे पैर पाह्ड़ो पाँदे कितणे ई अच्छे दिखोए, जो शुभ सन्देश सुनाणे खे ल्याओआ, जो शान्तिया री गल्ला सुणाओआ ओर कल्याणो रा शुभ सन्देश ओर उद्धारो रा सन्देस देयोआ, जो सिय्योनो खे बोलोआ, "तेरा परमेशर राजा ए।"*52:7 प्रेरि. 10:36, रोम. 10:15, नहू. 1:15 8 सुण, तेरे शईरो पईरेदार बुलाणे लगी रे, सेयो मिली की जयजयकार करने लगी रे; कऊँकि सेयो साक्षात देखणे लगी रे कि यहोवा सिय्योनो खे वापस ऊणे लगी रा। 9 ओ यरूशलेम शईरो रे खण्डहरो, मिली की खुश ऊई की जयजयकार करो; कऊँकि यहोवे आपणी प्रजा खे शान्ति देई राखी, तिने यरूशलेम छुड़ाई ला रा। 10 यहोवे सारी‍ प्रजा सामणे आपणी सामर्थ दखाई राखी ओर तरतिया रे दूर-दूर देशो रे सारे लोका म्हारे परमेशरो रा कित्तेया रा उद्धार पक्का देखणा।*52:10 पज. 98:3, लूक. 3:16, 2:31-31 11 दूर ऊई जाओ, दूर, बेबीलोनो ते निकल़ी जाओ, कोई अशुद्ध चीज नि छूँओ; तिना बीचा ते निकल़ी जाओ; ओ यहोवे रे पांडेया खे टोणे वाल़ेयो, आपू खे शुद्ध करो।*52:11 2 कुरि. 6:17, प्रका. 18:4 12 कऊँकि तुसा खे जल्दबाजिया दे नि निकल़ना, ओर न नठदे ऊए चलणा पड़ना कऊँकि यहोवा तुसा ते आगे-आगे अगुवाई करदा ऊआ चलणा ओर इस्राएलो रा परमेशर तुसा पीछे बी रक्षा करदा ऊआ चलणा।

परमेशरो रा सेवक कष्ट सैदा ऊआ

13 यहोवा बोलोआ, "देखो, मेरे दासो दमाको साथे काम करना, से ऊच्चा, महान ओर बऊत महान ऊई जाणा।*52:13 यिर्म. 23:5 14 जेड़े बऊत सारे लोक तेसखे देखी की हैरान ऊए कऊँकि तेसरी शक्ल इतणी बिगड़ी री थी कि से माणूंए जेड़ा नि लगो था ओर से माणूंआ जेड़ा बांका नि रयी गा था,*52:14 पज. 22:6,7; यशा. 53:2,3 15 तिंयाँ ई मेरे दासो देश मेरी आराधना करने जोगा बनाणा; ओर तेसखे देखी की राजा शान्त रणे; कऊँकि तिना एड़ी गल्ल देखणी जेसरी गल्ल तिना रे सुणने रे पनि आई ओर एड़ी गल्ल तिना री समजा रे आऊणी, जो तिने एबुए तक पनि सुणी राखी थी।"*52:15 रोम. 15:21; 1 कुरि. 2:9