यशायाह 10

1 लाणत ए तिना पाँदे जो दुष्टता साथे न्याय करोए ओर तिना पाँदे जो अनर्थ करने री आज्ञा लिखी देओए, 2 सेयो ये इजी खे करोए ताकि सेयो कंगाल़ा रा न्याय बिगाड़ो ओर सेयो मेरे लोका खे सताणे वाल़ेया रा न्याय नि करदे, ताकि सेयो बिदुआ खे लूटो ओर अनाथा रा माल आपणा बणाई लो! 3 तुसा सजा रे दिने ओर मुसीबता रे दिने जो दूरा ते आऊणी क्या करना? तुसा मतादा खे केसगे नठी की जाणा? तुसा आपणी सम्पति केयी राखी की छाडणी?*10:3 अय्यू. 31:14, 1 पत. 2:12 4 सेयो बस गुलामा रे पैरा गे पड़ने ओर मरेया निठे दबे रे पड़े रे रणे। इतणे दे बी यहोवे रा रोष शान्त नि ऊआ ओर तेसरा आथ एबुए तक बढ़ेया दा ए।

अश्शूर रोषो री बजा

5 यहोवा ये बोलोआ, अश्शूरो रे राजे पाँदे लाणत ए, जो मेरे आथो रा ओर मेरे रोषो रा सोठा ए! से मेरा रोष ए। 6 मां से एक नास्तिक जातिया गे पेजणा ओर जिना लोका पाँदे मेरा रोष पड़की रा, तिना रे खलाफ तेसखे आज्ञा देणी कि छुड़ाई की लूटी लो ओर तिना खे सड़का रे चीकड़ो जेड़ा चाड़ी देयो। 7 पर सीरिया रे राजे खे तेसरी एड़ी इच्छा नि ऊणी, ना तेसरे मनो दे एड़ी सोच ए, कऊँकि तेसरे मनो दे ये कि मां बऊत सारिया जातिया नाश ओर तिना रा अन्त करना। 8 कऊँकि से गर्व करी की बोलोआ, "क्या मेरे सारे परदान राजे जेड़े नि ए? 9 क्या कलनो शईर कर्कमीश शईरो जेड़ा नि ए? क्या हमात शईर अर्पाद शईरो जेड़ा ओर सामरिया शईर दमिश्क शईरो जेड़ा नि ए? 10 जिंयाँ मेरा आथ मूर्तिया साथे परे रे तिना राजा पाँदे पऊँचेया जिना रिया मूर्तिया यरूशलेम ओर सामरिया री मूर्तिया ते बढ़ी की थिया ओर जेड़ा मैं सामरिया ओर तिना री मूर्तिया साथे कित्तेया, 11 क्या आऊँ तेड़ा ई यरूशलेम ओर तिना री मूर्तिया साथे नि करुँ?"

अश्शूरो पाँदे न्याय

12 इजी बजा ते जेबे प्रभु सिय्योनो रे पाह्ड़ो पाँदे ओर यरूशलेम शईरो रे आपणा सारा काम पूरा करी चुकोगा, तेबे मां अश्शूरो रे राजे री कमण्डी गल्ला रा ओर कमण्डी आखी रा बदला देणा। 13 अश्शूरो रा राजा गर्व करी की बोलोआ, "आपणी तागती ते ओर अक्ला साथे मैं ये काम करी राखेया, कऊँकि आऊँ उशयार ए, मैं देश-देशो रे बन्ने टायी ते ओर तिना रा राखेया रा तअन लूटी ला, मैं वीरो जेड़े गद्दिया पाँदे बैठणे वाल़े उतारी ते। 14 देश-देशो रे लोका री तअन-सम्पत्ति, चिड़िया रे कोअलेया जेड़ी, मेरे आथो दे आई री ओर जेड़ा कोई छाडे दे अण्डेया खे कट्ठा करोआ, तिंयाँ ई मैं सारी तरती कट्ठी करी ली री ओर कोई पंख फड़फड़ाणे वाल़ा या चूँज खोलणे वाल़ा या चीं-चीं करने वाल़ा नि था।" 15 राजा सोचोआ कि से ये सब आपणे दमो पाँदे करी सकोआ, क्या क्वाड़ी तेसरे खलाफ जो तेसखे बाडोई फफल़्यारापण करो, या आरी तेसरे खलाफ जो तेसखे खिंजोआ बडयाईया करो? क्या सोठा आपणे चलाणे वाल़े खे चलाओ या डण्डा तेसखे चको जो लक्कड़ नि ए! 16 इजी बजा ते प्रभुए मतलब सेना रे यहोवे तेस राजे रे तगड़े योद्धा कमजोर करी देणे ओर तेसरे ऐश्वर्य निठे आगी जेड़ी जल़न ऊणी। 17 इस्राएलो रा प्रयासा, यहोवा तो आग ठईरना ओर इस्राएलो रा पवित्र परमेशर ठईरना ओर तेस तेसरे कांडे-चीट एक ई दिनो रे फूकी देणे। 18 जेड़ा बमारो री दशा कमजोर ऊणे ते ओई, तेड़ी ई तेस तेसरे बण ओर फल़़ देणे वाल़े बगीचे री शोभा पूरी तरअ ते नाश करी देणी। 19 तेस बणो रे डाल़ इतणे थोड़े रयी जाणे कि बच्चे बी सेयो गिणी की लिखी लणे।

बचे रे इस्राएली लोका री वापसी

20 तेस बखते इस्राएलो रे बचे रे लोक ओर याकूबो रे कराने रे नठे रे लोका, अश्शूरो रे सिपाईया, ओरी देशो रे राजेया पाँदे परोसा नि करना, पर यहोवा जो इस्राएलो रा पवित्र ए, तेस पाँदे ई तिना सच्चाईया साथे परोसा राखणा। 21 याकूबो रे कराने ते बचे रे लोक पराक्रमी परमेशरो रिया तरफा खे फिरने। 22 कऊँकि ओ इस्राएल, चाए तेरे लोक समुद्रो रे बालूए रिया कणियां जेड़े ओ, तेबे बी पक्का ए कि तिना बीचा ते बचे रे लोक ई वापस ऊणे। सत्यानाश तो पूरे न्याय साथे ठाणेया राए। 23 कऊँकि प्रभु सेनाओं रे यहोवे देशो रा सत्यानाश करना ठाणी राखेया।*10:23 रोम. 9:27,28

परमेशरो अश्शूरो खे सजा देणी

24 इजी री खातर सेना रा यहोवा ईंयाँ बोलोआ, "ओ सिय्योनो दे रणे वाल़ी मेरी प्रजा, अश्शूरो ते नि डर; चाए से ताखे सोठे साथे बाओ ओर मिस्रो जेड़ा तां पाँदे सोठा चको। 25 कऊँकि एबे थोड़ी जी देर ए कि मेरी जल़न ओर मेरा रोष तिना रा सत्यानाश करी की शान्त ऊणा। 26 सेना रे यहोवे तेसरे खलाफ कोड़ा चकी की से एड़ा मारना जेड़े तिने ओरेब नाओं री चट्टानी पाँदे मिद्यानी काये थे*10:26 न्याय. 7:24-25 ओर जेड़ा तिने मिस्रिया रे खलाफ समुद्रो रे डण्डा बढ़ाया, तेड़ा ई तेसरी तरफा खे बी बढ़ाणा। 27 तेस बखते एड़ा ऊणा कि तेसरा बोज तेरी कांदा पाँदा ते ओर तेसरा जूँगड़ा तेरी क्याड़िया पाँदा ते चकेया जाणा ओर अभिषेको रिया बजा ते से जूँगड़ा तोड़ी देणा।"

अश्शूरी सेना रा अमला

28 से अय्यात शईरो रे आई रा ओर मिग्रोन शईरो रिये आगे बढ़ी गा रा, मिकमाश शईरो दे तिने आपणा समान राखी राखेया। 29 सेयो काट्टिया ते पार ऊईगे, तिने गेबा शईरो दे रात कटी, रामा शईरो रे लोक डरीगे रे, शाऊलो रे गिबा शईरो रे सब लोक नठीगे रे। 30 ओ गल्लीम शईरो रे लोको मतादा रिया तँईं रोओ! ओ लैशा रे लोको कान लगाओ! हाय बचारा अनातोत!*10:30 अनातोत! एती यिर्मयाह जम्मेया था, यरूशलेमो रिया उत्तर-पूर्बा दे एक शईर 31 मदमेना शईर मारा-मारा फिरोआ, गेबीम शईरो रे रणे वाल़े लोक नठणे खे आपणा-आपणा समान कट्ठा करने लगी रे। 32 आजके दिने ई सीरिया सेना रा दुश्मण नोब*10:32 नोब बिन्यामीन गोत्रो रा एक शईर ए जिदे पुरोईत रओए शईरो दे रूकणा, तेबे तेस सिय्योन रे पाह्ड़ो पाँदे जो यरूशलेमो रा शईर ए आथ चकी की तमकाणे। 33 देखो, सेना रे यहोवे यो डाल़ खतरनाक टंगो दे छाँटणे, ऊच्चे-ऊच्चे डाल़ बाडी देणे ओर जो ऊच्चे ए, सेयो निठे करे जाणे। 34 यहोवे सेयो एड़े बाडणे जेड़े जंगल़ो रे बीचे क्वाड़िये कि डाल़ बाडे जाओए, एथो तक कि लबानोनो रे खरे डाल़ बी टल़ी जाओए!